An Siyahan nga Surat ha mga Taga-Tesalonica 1:1-10
1 Tikang kan Pablo, kaupod hira Silvano*+ ngan Timoteo,+ para ha kongregasyon han mga taga-Tesalonica nga kahiusa han Dios nga Amay ngan han Ginoo nga hi Jesu-Kristo:
Makarawat unta niyo an diri matupngan nga pagkabuotan ngan kamurayawan.
2 Pirme kami nagpapasalamat ha Dios kon gin-uunabi namon kamo ngatanan ha amon mga pag-ampo,+
3 kay padayon namon nga nahinunumdoman an iyo matinumanon nga buhat, an iyo pagbudlay tungod han gugma, ngan an iyo pagpailob tungod han iyo paglaom+ ha aton Ginoo nga hi Jesu-Kristo ha presensya han aton Dios ngan Amay.
4 Kay maaram kami, mga kabugtoan nga hinigugma han Dios, nga ginpili niya kamo,
5 kay an maopay nga sumat nga iginsasangyaw namon waray umabot ha iyo pinaagi la ha pulong kondi pinaagi liwat ha gahum ngan ha baraan nga espiritu ngan ha marig-on nga pagsarig, sugad han iyo hinbabaroan kon nagin ano nga klase kami hin mga tawo dida ha iyo para ha iyo kaopayan.
6 Ngan ginsubad niyo kami+ ngan an Ginoo,+ kay ginkarawat niyo an pulong bisan kon nakaeksperyensya kamo hin damu nga kasakitan+ nga may kalipay nga tikang ha baraan nga espiritu,
7 salit nagin susbaranan kamo ha ngatanan nga tumuroo ha Macedonia ngan ha Acaya.
8 Ha pagkamatuod, diri la nabatian an pulong ni Jehova* tikang ha iyo ha Macedonia ngan Acaya kondi nahibantog an iyo pagtoo ha Dios ha tagsa nga lugar,+ salit diri na kami kinahanglan magyakan hin bisan ano.
9 Kay hira mismo nagpipinanumat mahitungod han siyahan nga pakig-istorya namon ha iyo ngan kon paonan-o niyo ginbayaan an iyo mga idolo+ basi magpauripon ha buhi ngan tinuod nga Dios,
10 ngan basi maghulat ha iya Anak tikang ha langit,+ nga iya ginbuhi tikang ha mga patay, nga amo hi Jesus, nga nagtatalwas ha aton tikang ha tiarabot nga kapungot.+
