Iyaansakit na Dios Iray Maedad La
Iyaansakit na Dios Iray Maedad La
ALIWA lan makapasurprisa no akin a dakdakel natan so maedad lan naaabuso. Abayag lan impasakbay na Biblia a diad “saray kaunoran ya agew” na sayan agmaridios a sistema, saray totoo et magmaliw a ‘maaro ed lamalaman da, anggapo so aro ra a nianakan.’ (2 Timoteo 3:1-3) Say Griegon salita a nipatalos ya ‘aro a nianakan’ so nayarin mangilaktip ed panangaro a sipor lan nipapatnag ed loob na pamilya. Mitunosan ed propesiya na Biblia, say ontan a panangaro et mapatpatnag lan ombebetel natan.
Midumaan a tuloy ed saramay manmamaltrato ed saray maedad la, si Jehova a Dios so mamapablin tuloy tan mangiyaansakit ed saray maedad la. Konsideraen no panon a nipabitar iya diad Biblia.
“Ukom na Saray Balo a Bibii”
Diad Hebreon Kasulatan et mabitabitar so pangiyaansakit nen Jehova a Dios ed saray maedad la. Alimbawa, diad Salmo 68:5 et tinawag nen David so Dios bilang “ukom na saray balo a bibii,” a maslak ed saraya et maedad la. * Diad arum a patalos na Biblia, say salitan “ukom” so nipatalos a “manangidepensa,” “managprotekta,” tan “manangiyagel.” Malinew ya iyaansakit nen Jehova iray balo a bibii. Diad tua, ibabaga na Biblia a no sikaray naabuso, ondalang so sanok to. (Exodo 22:22-24) Saray balo a bibii—tan amin a matoor a maedad la—so papablien a tuloy na Dios tan saray lingkor to. Say Uliran 16:31 so angibalikas ed panmoria nen Jehova a Dios tan saray totoo to, sanen imbaga na satan: “Say ubanan ya ulo sikato so balanget na gayaga; naromog ed dalan na inkatunong.”
Agpankelawan a say panagrespeto ed saray mamatakken la et sakey ya importantin kabiangan na Ganggan ya inter nen Jehova ed Israel. Niganggan iray Israelita: “Onalagey ka naani ed arapan na ubanan ya ulo, et pagalangan mo naani lupa na masiken, tan nepeg mo so ontakot ed Dios mo: Siak si Jehova.” (Levitico 19:32) Kanian, diad Israel, say panrespeto na sakey a too ed saray maedad la et mikonektaan ed mismon relasyon to ed si Jehova a Dios. Agto nayarian ya ibagan inaro to so Dios no mamaltratoen to iray maedad la.
Saray Kristiano et agla nisilong ed Mosaikon Ganggan. Balet, nisilong ira ed “ganggan nen Kristo,” say pirmin mangiimpluensya ed kondukta tan awawey da, ontan met ed panangipatnag da na panangaro tan panagpaga ed saray atateng da tan ed saray maedad la. (Galacia 6:2; Efeso 6:1-3; 1 Timoteo 5:1-3) Tan saray Kristiano so mangaaro, aliwa labat a lapud igaganggan iran gawaen da itan, noagta sikaray napapakiwas manlapud puso ra. “Manaaroan kayo komon a malet ya angga ed utel na puso yo,” so impaseseg nen apostol Pedro.—1 Pedro 1:22.
Inikdan itayo nen babangatan a Santiago na kaaruman nin rason pian asikasoen iray maedad la. Oniay insulat to: “Say relihyon a malinew tan andi tilol ed arap na Dios tayo tan Ama sikato ya: Dalawen so saray ulila tan babalo a bibii ed kaermenan da, tan say pansiansia ya andi-mantsa to ed mundo.” (Santiago 1:27) Si Santiago so mangipapabitar na makapatenyeg-kanonotan a punto. Ipapaimano to ed sikatayo ya ontan lan kaimportante ed si Jehova irayan pinabpabli tayo.
Kanian, aliwan magenap so basta agpanmaltrato ed saray maedad la. Imbes, nepeg tayon ipatnag so masimoon a panagpaga ed sikara diad panggawa na makagunggona iran kimey. (Nengnengen so kahon a “Say Aro ya Ipapatnag ed Gawa,” diad pahina 6-7.) Oniay insulat nen Santiago: “Say pananisia ya andi-gawa inatey.”—Santiago 2:26.
Ligliwa “ed Kaermenan Da”
Wala ni sananey a punto a naaralan manlapud saray salita nen Santiago. Imanoen ya inkuan nen Santiago ed saray Kristiano a dalawen odino asikasoen da iray balo a bibii “ed kaermenan da.” Say Griegon salita a nipatalos a “kaermenan” et manunan mankabaliksan na kagogonigon, kasasakitan, odino paniirap ya epekto na makapadesdes iran sirkumstansya ed bilay tayo. Agpanduaruwaan a dakel ed saray maedad la so makakaeksperiensya na ontan a gonigon. Walaray maneermen lapud pambukbukor da. Arum so pirmin naeermenan lapud limitado lay nagawaan da a resulta na itatakken. Anggan saramay aktibon manlilingkor ed Dios et nayarin nadismaya met. Imanoen pa si John, * a matoor a manangiyabawag na Panarian na Dios ed masulok lan apataplon taon, a say unor a talomplon taon ed satan et inusar to ed espisyal a sigpot-panaon a serbisyo. Natan et masulok lan 80 so edad nen John, balet aaksobien to a no maminsan et sikatoy nadidismaya. Inkuan to: “Mabetbet kon iisipen tan nonodnonoten so dakel ya agawaan kon lingo. Pinonot kon naynay a magmaong ni komon so agawaan ko.”
Naligliwa iratan a sinansakey no naamtaan da ya anggaman perpekto si Jehova, sikatoy aliwan perpeksyonista. Amta to a nalilingo itayo, balet oniay ibabaga na Biblia nipaakar ed sikato: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) On, agnenengnengen nen Jehova iray lingo tayo noagta tetebeken to so walad dalem na puso. Panon tayon amta itan?
Si Arin David, a sikaton mismo et akapankasalanan tan agmet ayadyari, so pinuyanan na Dios a manibukel ed saray onggendan a salita, a nikurit diad Salmo 139:1-3: “O Jehova, sika sinukayan mo ak, et akabatan mo ak. Sika antam so kayuyurong ko tan say kakaalagey ko; sika natalosan mo so nonot ko a wala ni ed arawi. Sika sukayan mo so basbas ko tan say kadudukol ko, tan kabat mo so saray amin a kagagawak.” Say balikas dia a “sukayan” et literal a mankabaliksan na “sapiten,” a mipadpara ed panyakayak na sakey a dumaralos ed taep pian say ilik labat so natilak. Diad madibinon panangipuyan, pinaseguroan itayo nen David ya amta nen Jehova no panon a sapiten iray maabig a ginawa tayo tan lawas ton nodnonoten iratan.
On, nonodnonoten tan papablien na mapangasin mangatatawen ya Ama tayo iray maabig a ginawa tayo legan a manmamatoor itayo ed sikato. Ibabaga na Biblia a moriaen ton agmakatunongan so pangilingwan ed gagawaen tayo tan ed aron ipapatnag tayo parad ngaran to.—Hebreos 6:10.
‘Saray Inmuna a Bengatla so Linmabas la’
Ipapabitar na Biblia a saray problema ed itatakken so agkabiangan na gagala na Dios parad katooan. Asagmak lambengat na too iray makapakapuy ya epekto na itatakken sanen nanrebelde so inmunan atateng tayo ed Manamalsa ra. (Genesis 3:17-19; Roma 5:12) Saya so agmantultuloy lawas.
Unong a nibaga la, dakel ed saray mauges a kipapasen a nasasagmak tayo natan—laktip lay panagmaltrato ed saray maedad la—so manutugyop ed ebidensya a manbibilay itayo la ed ‘kaunoran iran agew’ na sayan sistema na bengabengatla. (2 Timoteo 3:1) Gagala na Dios a paandien iray epekto na kasalanan, laktip la iray makaderal ya epekto na itatakken tan ipapatey. Oniay ibabaga na Biblia: “Punasen [na Dios] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.”—Apocalipsis 21:4.
Diad balon mundo na Dios, saray makapaot-ot ya epekto na itatakken so magmaliw lan kabiangan na apalabas. Anggapo met la so manmaltrato ed saray maedad la. (Miqueas 4:4) Anggan saramay inaatey a walad pakanodnonotan na Dios so napaoli ed bilay, ta pian nawalaan met ira na pankanawnawan manbilay ya andi-angga diad paraison dalin. (Juan 5:28, 29) Diad satan a panaon et lalon napaneknekan a si Jehova a Dios so mangiyaansakit, aliwa labat ed saray maedad la, noagta pati ed amin ya ontutulok ed sikato.
[Saray paimano ed leksab]
^ par. 5 Siempre, say arum a balo a bibii et aliwa nin maedad. Singa bilang, say katuaan ya iyaansakit met na Dios iray malangwer nin bibii et napatnagan diad Levitico 22:13.
^ par. 11 Aliwan peteg a ngaran to.
[Kahon/Saray litrato ed pahina 6, 7]
Say Aro ya Ipapatnag ed Gawa
Diad limog na saray Tasi nen Jehova, saray mamatatken ed kongregasyon so mangidadaulo ed panangasikaso ed saray maedad la. Ipapapuso ra so simbawa nen apostol Pedro: “Pastolan yo so saray pulok na Dios a wala ed sikayo.” (1 Pedro 5:2) Say pangasikaso ed saray maedad la diad praktikal iran paraan et kabiangan na panangasikaso ed pulok na Dios. Balet anto so lalanoren na saya?
Nakaukolan so inkaanos ontan met ed mabetbet ya ibisita tan pitotongtong pian naamtaan no kaunongan kalaknab so pankaukolan na sakey a maedad la. Nayarin mankaukolan ira na tulong diad pansaliw tan panlinis, transportasyon parad iyaatendi ed Makristiano iran pantitipon, pangibasa ed sikara na Biblia tan saray Makristianon publikasyon, tan dakel ni ra. No posible et kaukolan so panggawa na praktikal tan malet iran uksoyan tan sumpalen iratan. *
Balet, anto so gawaen no walay masiken odino akulaw lan agi diad kongregasyon a talagan mankakkaukolan na tulong, a nayarin diad pinansyal? Unona, maabig no amtaen ni no kasin walaray anak odino kakanayon to a makatulong. Mitunosan itan ed say ibabaga na 1 Timoteo 5:4: “No wala so balo a wala’ra so anak to odino apo, amtaen na saraya komon ya unona ya ipanengneng so kasimpitan da ed kaamong dan dili, tan tumangan da so kaatengan da: ta saya sikato so makapalikliket ed arap na Dios.”
Nayarin mankaukolan met na tulong so sakey a maedad la diad pangamta no kasin sikatoy kualipikado parad antokaman a probisyon ya itatarya na gobierno. Nayarin makatulong so arum ya agagi diad kongregasyon. No anggapo iray ontan a probisyon, saray mamatatken so makapandesidi no kasin kualipikado so indibidual parad panulong na kongregasyon. Walaray kipapasen a saya so inabuloyan diad kongregasyon nen inmunan-siglo, lapud oniay insulat nen apostol Pablo ed kakimeyan ton si Timoteo: “Iyan mo ed listaan na bibiin balo so siopaman a walad saray onggendan: ag-onkulang ed anemaplo so taon to, aminpinsan ya akiasawa, kabkabat na karaklan a maong so ginagawa to, pinabaleg to iray anak to ed masimpit a panagbilay, sinasangkaili to iray anggan agto kabat, nampaabeba diad impanlingkor to’d kapara ton Kristiano, tinmulong ed saray walad kairapan, tan insaklang toy bilay to’d panggaway amin a kamaongan.”—1 Timoteo 5:9, 10, Maung a Balita.
[Paimano ed leksab]
^ par. 25 Parad kaaruman nin ikonsidera, nengnengen so artikulon “Meeting the Needs of Our Older Ones—A Christian Challenge,” diad Hulyo 15, 1988, ya isyu na The Watchtower.
[Litrato ed pahina 5]
Inasikaso nen Dorcas iray mankaukolan a bibiin balo.—Gawa 9:36-39