Tepetepet na Saray Manbabasa

Diad Mosaikon Ganggan, akin ya ipapasen so pigaran natural ya usar na sekso a pagmaliwen ton ‘agmalinis’ so sakey a too?

Intarya na Dios so sekso pian parakelen so poli na too tan parad panliket na saray sanasawa. (Genesis 1:28; Uliran 5:15-18) Anggaman ontan, naromog tayo diad kapitulo 12 tan 15 na Levitico iray detalyadon totontonen nipaakar ed ag-inkalinis lapud ipapaway na semilya, panagregla, tan panag-anak. (Levitico 12:1-6; 15:16-24) Saratan a ganggan ed kadaanan ya Israel so angiyalibansa na malinis ya estilo na panagbilay, angitandoro ed atagey iran estandarte ed moral, tan angidanet ed inkasagrado na dala tan ed pankaukolan na pananakbong ed saray kasalanan.

Saray kakaukolanen ed Mosaikon Ganggan nipaakar ed saray usar na sekso so nagkalautlan amaabig ed inkalapagan a bunigas na saray Israelita. Oniay ibabaga na The Bible and Modern Medicine: “Say pangunor ed totontonen ya ipaliis ed pisekso legan na panagregla so apaneknekan ya epektibon mangipaliis manlapud saray sakit ed sekso . . . tan seguradon naamper met na satan so kiwala tan ilesa na saray kanser ed kuwelyo na matris.” Saratan a ganggan so angipaliis ed saray totoo na Dios manlapud sakisakit a nayarin agda amta odino agda ni ingen nasukayan. Say inkalinis ed seksual a pamaakaran so lalon amabuna ed nasyon ya angisipanan na Dios a sikaray ondakel tan onaligwas. (Genesis 15:5; 22:17) Nagmaliw met a maabig so emosyonal a kipapasen na saray totoo na Dios. Diad impangunor da ed sarayan ganggan, naaralan na kaasawaan a lalaki tan bibii a kontrolen so pantindek da parad sekso.

Balet, say manunan isyu a nalalanor ed oniaran nengneng na ag-inkalinis a resulta na seksual iran pamaakaran et say pamparala odino pakaandi na dala. Saray ganggan nen Jehova nipaakar ed dala et aglambengat angipurek ed saray Israelita a sagrado so dala noagta impurek met na satan so espisyal ya usar na dala diad panagdayew ed si Jehova, salanti, diad saray bagat tan pananakbong ed saray kasalanan.—Levitico 17:11; Deuteronomio 12:23, 24, 27.

Sirin, saray detalyadon kakaukolanen na Ganggan nipaakar ed saya so maapit a misiglaotan ed ag-inkayadyari na too. Amta na saray Israelita a kayari na impankasalanan nen Adan tan Eva, agla ra makapawala na ayadyarin ananak. Amin a kailalakan da so managmak ed saray epekto na atawir a kasalanan—say ag-inkayadyari tan ipapatey. (Roma 5:12) Lapud saya, saray atateng so makapangiyalis lambengat na ag-ayadyari tan makasalanan a bilay, anggaman saray organo ra ed panag-anak et datin denisinyo a mangiyalis na ayadyarin bilay diad panamegley na uksoyan ed panangasawa.

Kanian, say kakaukolanen na Ganggan a panaglinis so aglabat mangipanonot ed saray Israelita ya akatawir ira na kasalanan noagta sikaray mankaukolan met na dondon bagat pian nasakbongan iray kasalanan tan nipawil so too ed inkayadyari. Siempre, ag-iratan agawaan na saray imbabagat dan ayayep. (Hebreos 10:3, 4) Say gagala na Mosaikon Ganggan et pian nitonton ira ed si Kristo tan pian nipatebek ed sikara a nagamoran da lambengat so tuan kaperdona diad panamegley na ayadyarin bagat nen Jesus bilang too, a satan so angilukas na pankanawnawa pian nagamoran na saray matoor a sinansakey so bilay ya andi-anggaan.—Galacia 3:24; Hebreos 9:13, 14.