Nalikna so Inkapnek Diad Pangiyaplika ed Saray Prinsipyo na Biblia

MASEGURON akanengneng ka la na pusan akakukot tan singa mansasanggook leleg a naugip—a pakapatnagan itan na inkapnek to. Alay abig no ontan met komon so kipapasen tayo, a walaan na liknaan na inkapnek! Balet, dakel a totoo so agtanto makakalikna na inkapnek, tan magangganon naandi itan. Anto so makasengeg?

Lapud sikatayoy mabetbet a nalilingo lapud ag-itayo ayadyari, tan nepeg tayon anosan met iray kakulangan na arum. Niarum ni, manbibilay itayo la ed peryodo na panaon a tinukoy na Biblia a “saray kaunoran ya agew,” a napatnagan panamegley na “saray panaon a maatap [a mairap a pidenengan].” (2 Timoteo 3:1-5) Anggaman walaray makapaliket tan makapnek a pakanodnonotan legan na inkaugaw tayo, maslak ed sikatayo natan so pirmin nadedetdetan lapu ed sarayan “panaon a maatap.” Posible kasi a nalikna tayo so inkapnek diad sayan panaon?

Imanoen so ibabaga na Kasulatan a sarayan panaon a maatap et mairap a pidenengan, aliwan imposiblin pidenengan. Napidenengan tayo iratan diad pangiyaplika ed saray prinsipyo na Biblia. Nayarin agtayo naresolbe a naynay iray problema tayo, balet anggan panon et makalikna itayo na inkapnek. Usisaen tayo pa so taloran prinsipyo.

Pansiansiaen so Realistikon Panmoria

Pian nalikna so inkapnek, nepeg a pansiansiaen tayo so realistikon panmoria ed dili iran limitasyon tayo tan ed saray limitasyon na arum. Sanen sinulat nen apostol Pablo iray taga-Roma, oniay impabitar to: “Amin nankasalanan, tan makulang ira ed gloria na Dios.” (Roma 3:23) Mairap tayon natebek so inkalaknab na gloria nen Jehova. Sakey lan alimbawa et say simplin katuaan a nidatak diad Genesis 1:31: “Say Dios anengneng to so amin a bengatla a ginawa to, et nia maong iran tuloy.” Kapiganman a kaliktanen nen Jehova a nodnonoten iray ginawa to, lawas ton nibaga a “maong iran tuloy.” Anggapo so too a lawas makapangibaga na ontan. Say pangaksobi ed saray limitasyon tayo et sakey a manunan kundang pian nalikna tayo so inkapnek. Balet, wala ni so nakaukolan. Kaukolan tayon talosan tan awaten so panmoria nen Jehova ed pamaakaran.

Say Griegon salita ya impatalos a “kasalanan” et inaon ed salitan mankabaliksan na “pakamintis ed marka.” Pian iyilustra: Ilitrato pa ed nonot so sakey a manpipirawat a manalo na premyo diad pangikena to na pana ed sakey a puntirya. Taloran pana so walad sikato. Impana to so unona balet ta amintis na sakey metro. Inasigta to so komadua balet amintis nin siansia na sakey piye. Inasi-asigta ton maong ya impana so komatlo tan amintis na sakey labat a pulgada. Dawdawit la itan, balet siansia ni ya agto nakna so puntirya.

Amin tayo et singa satan a dismayadon pumapana. No maminsan et singano abalbaleg so ‘pakakamintis tayo ed marka.’ Wala met iray panaon a singano dawdawit tayo lan nakna so marka balet siansia nin amintis itayo. Nadidismaya  itayo lapud anggan pirmi lay impamasya tayo, siansia ni a kinmulang itan. Isipen pa lamet imay pumapana.

Sikatoy kalkalnan binmeneg, a maer-ermen lapud labalabay ton talaga a naala so premyo. Kabebekta et sikato so tinawag na manangasikaso ed pakontis tan inikdan to na premyo, a kuan to: “Labay kon iter iya ed sika lapud aliketan ak ed ginawam, tan anengneng ko so impamasyam.” Malikeliket so pumapana.

Malikeliket! Ontan met so nalikna na balang sakey a makaawat na “langkap” na Dios a bilay ya andi-anggaan diad ayadyarin kipapasen. (Roma 6:23) Kayari na satan, amin lan bengatla a gawaen da et maong, ya agla ran balot namintis ed marka. Sikaray sigpot lan napenek. Kaleganan ni, no pansiansiaen tayo itan ed kanonotan tayo, nawalaan itayo na maabig a panmoria ed inkasikatayo tan ed saramay walad kaliberliber tayo.

Bidbiren a Mankaukolan na Panaon Iray Bengatla

Tua ya amin a bengatla et mankaukolan na panaon. Balet, naiimanom ta no panon kairap so mansiansian napnek sano say bengatlan aalagaren mo et ompatnag a mabaybayag ni nen say impantalaran mo odino singano mabaybayag ya onlabas so agmarakep a kipapasen nen say inilaloan mo? Anggaman kuan, wala ra so akapansiansian napnek anggaman niiyan ira ed ontan a kipapasen. Konsideraen so alimbawa nen Jesus.

Sakbay a linma dia ed dalin si Jesus, sikatoy napanuliranan la ed katutulok diman ed tawen. Balet ta dia ed dalin so ‘akaaralan to na katutulok.’ Panon? “Lapu ed saray bengatlan intepel to.” Naimatonan to manlapud tawen so kairapan balet ta agto nin balot naeksperiensya itan a mismo. Balet sanen wadiad dalin, nagkalalo la manlapud inkabautismoan to diad Jordan ya anggad impatey to diad Golgota, dakel so asagmak to a kairapan. Agtayo amta so amin a detalye no panon a si Jesus et “agawa ya ayadyari” ed sayan pamaakaran, balet amta tayo a kinaukolan na satan so panaon.—Hebreos 5:8, 9.

Tinmalona si Jesus lapud dinalepdep to so “gayaga a niiyan ed arap to,” salanti, say tumang ed katooran to. (Hebreos 12:2) Anggaman ontan, walaray panaon a sikato so “angibagat na pikakasi tan pikekerew . . . tekep na mabiskeg a tagleey tan saray lua.” (Hebreos 5:7) Nayarin ontan met no maminsan so panagpikasi tayo. Panon kasin momoriaen itan nen Jehova? Ipapabitar na satan lanlamang a bersikulo a paborablin dinengel nen Jehova so pikakasi nen Jesus. Ontan met so gawaen na Dios ed biang tayo. Akin?

Lapud amta na Dios iray limitasyon tayo, tan sikatoy ontutulong ed sikatayo. Balang sakey et walaan na limitasyon nipaakar ed bengatlan nasungdoan to. Oniay kaslakan ya ibabaga na saray taga-Benin ed Aprika: “Anggan saray patang et nalener ed kaunoran diad sobran danum.” Mas kabat nen Jehova nen say sikatayo no kasin ngalngali tayo la nasabi so anganggaan tayo. Sikatoy maaron mangipapatnag na “panangasi tan . . . grasya, pian natulongan to itayo sano panaon a kinepeg to.” (Hebreos 4:16) Ontan so ginawa to ed biang nen Jesus, tan gagawaen to met so ontan ed biang na dakel nin totoo. Imanoen no panon a naeksperiensya itan nen Monika.

Binmaleg si Monika ya anggapo iray kapagaan to, a maligligsa tan masayaksak so disposisyon to. Nen 1968, sanen masulok ni labat a 20 so edad to, sikatoy abigla sanen naamtaan to a walay multiple sclerosis to, sakey a sakit a kaslakan  lan manreresulta ed pakaparalisa na arum a parte na laman. Satan so sigpot ya anguman na bilay to tan kinaukolan toy manggawa na baleg a pananguman ed panlilingkor to bilang sigpot-panaon. Naamtaan nen Monika a tuloytuloy so iloor na ontan a sakit. Manga labin-anem a taon so linmabas, oniay inkuan to: “Agnin siansia natambal so sakit ko tan nayarin mansiansia la iya anggad isabi na panaon a napasimbalo la so amin a bengatla panamegley na balon sistema na Dios.” Inaksobi to a talagan mairap so kipapasen to: “Anggaman ibabaga na kakaarok a siansian malikeliket ak tan lawas a maligligsa ak, . . . amta na saray maapit a kakaarok a no maminsan et agko napokpokan so iyagus na saray luak.”

Balet, oniay inkomento to: “Naaralan koy magmaliw a maanos tan manliket ed anggan sankamelagan a tanda na iyaabig ko. Inmelet so personal a relasyon ko ed si Jehova diad impakamoriak ya anggapon talaga so nagawaan na too ed pilalaban to ed sakit. Si Jehova lambengat so sigpot a makapaabig ed satan.” Diad tulong nen Jehova, apansiansia nen Monika so inkapnek to tan natan et sikatoy masulok lan 40 a taon a manlilingkor a sigpot panaon.

Tua, aliwan mainomay iray kipapasen a singa ed si Monika. Balet ta seguradon naliknam so pirmin inkapnek no moriaen mo a walaray bengatla a mankaukolan na mas andukey nin panaon nen say iilaloan mo. Singa si Monika, makapanmatalek ka a ‘tulongan to ka nen Jehova ed panaon a kinepeg to.’

Agmangikokompara—Mangiletneg na Saray Nadampot a Kalat

Sika so nikabiig ed arum a totoo. Anggapo so eksakton mipara ed sika. Oniay simplin diparan na lenguahen African Gun nipaakar ed sayan katuaan: “Aliwan parepareho so karukey na amin a gamet.” Agmakabat so pangikompara ed sakey a gamet ed sananey. Nayarin agmo labay ya ikompara ka nen Jehova ed arum a too, tan agton balot gawaen itan. Balet, diad limog na totoo et kaslakan la so tendensian mangikompara tan agda la ingen nalilikna so inkapnek lapud satan. Imanoen pa no panon a saya so maranet ya inyilustra nen Jesus, unong a nabasa tayo diad Mateo 20:1-16.

Sinaglawi nen Jesus so nipaakar ed sakey a “makankien na ubasan” a mankaukolan na saray komikimey. Sikatoy nananap na pigaran lalaki a manmemeneng tan pinankimey to ra diad “masakbay ed kabuasan,” a nayarin diad oras na alas-6. Inmabobon ira ed kaslakan ya upa ed sanagew diad saman a panaon, sakey a denario parad 12-oras a pankimey ed sanagew. Seguradon aliketan irayan lalaki lapud awalaan ira na trabaho tan lapud makaawat ira na kaslakan ya upa. Diad saginonor, say katawan so nananap na sananey nin grupo na lalakin manmemeneng tan pinankimey to ira—diad oras na alas-9 ed kabuasan, alas-12 ed kaagwan, alas-3 ed ngarem, tan diad alas-5 ni ingen ed mansirunget. Anggapo ed sarayan grupo so mantrabaho ed interon sanagew. Nipaakar ed upa ra, insipan na makankien na ubasan ya iter to ed sikara so “kanepegan,” tan inmabobon ira.

Sanen asumpal so sanagew, ingganggan na makankien na ubasan so panagpiyaan to a bayaran to so upa ra. Inkuan to a tawagen to iray komikimey tan bayaran to nin unona iramay unor ya inalan mantrabaho. Sakey oras labat so impantrabaho na saraya, balet makapakelaw ta say naawat da et parad sanagew ya upa. Nilitrato tayo ed isip tayo so agawan impanpupulpiaan. Inisip na saramay nantrabaho ed loob na 12 ya oras a mas baleg so naawat da. Balet ta parehon kantidad so naawat da.

Antoy reaksion da? “Sanen sikato so naawat da, nantalabutob ira sumpa ed ama na sankabaley, a kuan da, Sarayan unor sakey oras lambengat so impankimey da, et impiparam ira’d sikami, a sinakbat mi so awit a sanagew, tan say makaatong a petang.”

Balet, aliwan ontan so impanmoria na say makankien na ubasan. Impamoria to a say inawat da et unong ed nampaknaan da tan anggapo so kulang. No nipaakar ed arum, denesidi to ya ikdan ira na upa a parad sanagew, a maseguron babaleg itan nen say inilaloan da. Diad tua et anggapo so angawat na kulang ed say nampaknaan da, tan dakel ed sikara so angawat na babaleg nen say inilaloan da. Kanian bilang panampot, oniay intepet ed sikara na makankien na ubasan: “Agta makatunongan ed siak so panggawak na labay ko ed kayarian ko lanlamang?”

 Natan, isipen pa no say panagpiyaan et binayaran to nin unona imay akaunan grupo insan la ra tinmaynan a tampol. Nayarin apenek la ira ed naawat da. Sikara labat so ag-apenek sanen anengneng da a parehon upa so naawat na arum parad aganggano ya impankimey. Sinmanok ira lapud satan, a nanmeremere ni ra ingen sumpa ed samay makankien na ubasan ya akisalamatan da diad gapo lapud inikdan to ira na trabaho.

Malinew ya iyiilustra na saya so nagawa sano ikompara tayoy inkasikatayo ed arum. No dalepdepen mo so personal a relasyon mo ed si Jehova tan apresyaen mo so pamebendisyon to ed sika, naliknam so inkapnek. Agmo ikokompara so situasyon mo ed arum. No ompatnag a denesidi nen Jehova a manggawa na nagkalalo parad arum, manliket ka parad sikara tan miliket ka.

Balet, wala so bengatlan iilaloan nen Jehova ed sika. Anto itan? Oniay ibabaga na Galacia 6:4: “Balang sakey patnagen to komon so gawa ton dili, et dia ed ontan wala naani sirin so like’to nipaakar ed sikato.” Diad arum a panangibaga, mangiletneg ka na saray kalat a sarag mon dampoten. Nonot mon maong no anto so nasarag mo, tan pankimeyan mo itan. No adampot mo la so kalat mo, “wala naani so liket mo” ed satan. Naliknam so inkapnek.

Walaray Nagamoran a Tumang

Ipapatnag na say taloran prinsipyo a kinonsidera tayo ya anggan diad sarayan kaunoran ya agew tan anggaman ag-itayo ayadyari et nalikna tayo so inkapnek diad pangiyaplika ed saray prinsipyo na Biblia. Diad inagew-agew a pambabasam na Biblia, akin ya agmo nengnengen iray prinsipyo, balang lan atukoy iratan a direkta odino andi diad saray salaysay tan ilustrasyon?

No liknaen mon sika so agnapepenek, pambanikelan mon anapen so peteg a sengegan. Insan nengnengen iray prinsipyo a nayarian mon iyaplika pian nipetek so situasyon mo. Singa bilang, nayarian mon nengnengen iray pahina 110-11 na libron “All Scripture Is Inspired of God and Beneficial.” * Ditan et siningbat so libro na Uliran, tan naromog mo so dakel a napanpilian iran prinsipyo tan simbawa a nidatak diad silong na 12 a paulo. Alay abig met iran impormasyon so naromog diad The Watch Tower Publications Index * tan Watchtower Library a walad CD-ROM. * Diad pangusar ed saratan, napaaligwas moy dunong mo ed panag-anap na saray prinsipyo a nayarian mon iyaplika.

Nasabi panaon et ipagamor nen Jehova ed saray makanepegan so bilay ya andi-anggaan diad ayadyarin kipapasen ed paraison dalin. Diad ontan et sigpot lan napenek so bilay da.

[Paimano ed leksab]

[Blurb ed pahina 12]

“Amin nankasalanan, tan makulang ira ed gloria na Dios.”—Roma 3:23

[Blurb ed pahina 13]

‘Naaralan nen Jesus so katutulok lapu ed saray bengatlan intepel to.’—Hebreos 5:8, 9

[Blurb ed pahina 15]

“Wala naani sirin so like’to nipaakar ed sikato, [“tan aliwan diad pangikompara ed arum a too,” NW].”—Galacia 6:4