SAY unor a libro na Biblia ya atawag a Puyan, odino Apocalipsis, so mangiiter na ilalo ed totoo. Sayan libro ya insulat nen apostol Juan et lugan to ray nantutumbokan a puyan a mansumpal ed pakagawa na amin a gagala nen Jehova.

Diad unonan puyan, kokomendaan tan ipepetek na apaolin Jesus so pigaran kongregasyon. Say tinmumbok et nipaakar ed trono na Dios ed tawen, a saray espiritun pinalsa so mangidadayew ed sikato.

Legan a nagagawa so gagala na Dios, say Kordero, si Jesu-Kristo, so akaawat na sakey a lukot a walaan na pitoran selyo. Sanen alukasan so unonan apatira a selyo, walaray anengneng a simbolikon akalugan ed kabayo. Say unona et si Jesus ya akalugan ed amputin kabayo tan akoronaan bilang Ari. Insan tinmutumbok iray akalugan ed kabayon walaan na nanduruman kolor, ya unong ed propesiya et mangirerepresenta ed guerra, eras, tan saray salot—amin na saratan so nagawa legay unor iran agew na saray sistema ed sayan mundo. Say inkalukasan na komapiton selyo so manresulta ed pangipaknol ed pitoran simbolikon trumpeta, a mankabaliksan na proklamasyon na panangukom na Dios. Saraya so manresulta ed pitoran simbolikon salot, odino sanok na Dios.

Say Panarian na Dios, ya insimbolo na nianak ya ugaw a laki, so niletneg ed tawen. Agaway impanlaban ed tawen, si Satanas tan saray mauges ya anghel to so nibantak ed dalin. ‘Kasi la so dalin,’ so nadngel ed maksil a boses. Say Diablo so pirmin sinmanok lapud amta ton antikey lay nakekeran panaon to.—Apocalipsis 12:12.

Anengneng nen Juan si Jesus ed tawen a nirepresenta bilang kordero, tan kaiba toy 144,000 ya apili ed totoo. Saraya so “miari” ed si Jesus. Kanian ipaparungtal na Apocalipsis a say komaduan membro na bini et manbilang na 144,000.—Apocalipsis 14:1; 20:6.

Saray manuuley ed dalin so natipon ed Armagedon, say “bakal na baleg ya agew na Dios, a Makapanyarin-amin.” Sikaray mibakal ed samay akayurong ed amputin kabayo—si Jesus, a mangidadaulo ed saray armada ed tawen. Amin a manuuley ed sayan mundo so naderal. Baloren si Satanas. Insan la manuley si Jesus tan say 144,000 ed interon dalin ed loob na “sanlibon taon.” Diad sampot na sanlibon taon et deralen la si Satanas.—Apocalipsis 16:14; 20:4.

Antoy naawat na matulok a totoo ed Panuley nen Kristo ed Sanlibon taon tan saray kakaiba to? Oniay insulat nen Juan: “Punasen [nen Jehova] so amin a lua ed kamataan da; tan anggapo la naani ipatey; tan anggapo la naani onnangis o dageyem, o ot-ot. Ta saray una a bengatla sikara so linmabas la.” (Apocalipsis 21:4) Say dalin so magmaliw lan paraiso!

Sasampotan sirin na libro na Apocalipsis so mensahe na Biblia. Panamegley na Mesianikon Panarian, napasanto so ngaran nen Jehova tan say inkasoberano to et sigpot lan nigloria ed andi-angga!

—Nibase ed libron Apocalipsis.