Onlad karga

Onlad saray karga

 SEKSION 20

Say Impatey nen Jesu-Kristo

Say Impatey nen Jesu-Kristo

Inggapo nen Jesus so balon seselebraan; sikatoy atraidor tan impasak

KAYARI talora tan kapalduan taon ya impanpulong tan impanbangat nen Jesus, amta ton magano lan manampot so bilay to ed dalin. Saray Judion lider na relihyon so nankokomplot a mamatey ed sikato, pero tinakotan da iray dakel a totoon manisia a sikatoy sakey a propeta. Inimpluensyaan nen Satanas so sakey ed 12 apostol nen Jesus—si Judas Iscariote—pian mantraidor. Si Judas so inopresian na saray lider na relihyon na 30 pilak a barya pian itapat si Jesus.

Nen unor lan labi antis na ipatey to, tinipon nen Jesus iray apostol to pian selebraan so Paskua. Kayari ton pinaalis si Judas, inggapo toy balon seselebraan, say Pangdem na Katawan. Sikatoy angala na tinapay, nampikasi, tan impasa to itan ed 11 ya apostol to. “Saya sikatoy laman ko a niiter nisengeg ed sikayo,” so inkuan to. “Gawa yo’ya a pakanodnonotan ed siak.” Ontan met so ginawa to ed alak, a kuanto: “Saya a kopa sikato so balon sipan dia ed dalak.”Lucas 22:19, 20.

Dakel so imbilin nen Jesus ed saray apostol to ed saman a labi. Inikdan to ira na balon ganggan, salanti, manaaroan ira ed sakey tan sakey. Inkuan to: “Lapu ed saya amin a too nabidbiran da a sikayo ray babangatan ko, no wala so aro yo ed sakey tan sakey.” (Juan 13:34, 35) Binilin to iran agkomon naguloy kanonotan da ed magano lan makapakebbiew iran nagawa. Masimoon ya impikasi ira nen Jesus. Sikaray nankakansion na panangidayew tan linma ira ed hardin na Getsemani anggano labi la.

Ditan et tinmalimukor si Jesus tan masimoon a nampikasi ed Dios. Kabekta et sinmabi iray de-armas a sundalo, saserdote, tan arum ni pian mangaresto ed sikato. Inangoban nen Judas si Jesus pian nabidbir da. Sanen erelen la na saray sundalo si Jesus, binmatik iray apostol to.

Impaamta nen Jesus a sikatoy Anak na Dios diad arap na atagey a korte na saray Judio. Sikatoy impasen na korte a nankasalanan lapud agto kuno pinagalangan so Dios kanian nepeg a pateyen. Insan inawit si Jesus ed Romanon Gobernador a si Poncio Pilato. Anggaman parad sikato et inosente si Jesus, inyawat toy Jesus ed totoon mangipipilit a sikatoy pateyen.

Si Jesus so inyakar da ed Golgota, tan diman impasak na saray Romanon sundalo ed sakey a poste. Mamilagron binmilunget anta agew ni. Sanen ngarem la, inatey si Jesus, tan yinmegyeg na maksil. Imponpon day bangkay to ed inungiban a baleg a bato. Diad tinmumbok ya agew, sinaraan a malet na saray saserdote so angiponponan tan impaguardiaan da. Kasin nansiansia so bangkay nen Jesus ed angiponponan ed sikato? Andi. Say sankabalegan ed amin a milagro et magano lan nagawa.

Nibase ed Mateo kapitulo 26 tan 27; Marcos kapitulo 14 tan 15; Lucas kapitulo 22 tan 23; Juan kapitulo 12 anggad 19.

^ par. 15 Parad kaaruman ya impormasyon nipaakar ed kaimportantian na masakripisyon impatey nen Jesus, nengnengen so kapitulo 5 na libron Anto so Peteg ya Ibabangat na Biblia?