Ġob 39:1-30
39 “Taf meta jwelldu l-mogħoż tal-muntanji?
Ġieli rajt iċ-ċriev iwelldu?
2 Taf kemm-il xahar idumu tqal?
Taf meta jwelldu?
3 Huma jitbaxxew meta jkunu se jwelldu liż-żgħar tagħhom,U ma jibqax ikollhom l-uġigħ tal-ħlas.
4 Iż-żgħar tagħhom isiru b’saħħithom u jikbru fis-salvaġġ;Huma jitilqu u ma jerġgħux lura għandhom.
5 Min ħeles lill-ħmar salvaġġ,U min ħall il-ħbula tiegħu?
6 Jien tajtu d-deżert bħala d-dar tiegħuU l-art li fiha l-melħ bħala l-post fejn joqgħod.
7 Hu jevita l-istorbju tal-belt;U ma jismax il-leħen taʼ dak li jikkmandah biex jaħdem.
8 Idur fl-għoljiet biex jirgħaU jfittex kull tip taʼ ħaxix.
9 Il-barri salvaġġ se jħallik taħdem bih?
Se jqattaʼ l-lejl fl-istalla* tiegħek?
10 Tistaʼ torbot barri salvaġġ biex taħrat bih,Jew se jiġi warajk fil-wied biex jaħrat?
11 Se tafda fis-saħħa kbira tiegħuU tħallih jagħmel xogħol iebes għalik?
12 Se tistrieħ fuqu biex iġiblek il-ħsad* tiegħek id-dar?
U se jiġbru hu fil-post fejn jiġu sseparati ċ-ċereali?*
13 In-nagħma* tħabbat ġwinħajha bil-ferħ,Imma jistgħu ġwinħajha jitqabblu maʼ taċ-ċikonja?
14 Hi tħalli l-bajd tagħha mal-artU żżommhom sħan fit-trab.
15 Hi tinsa li xi ħadd jistaʼ jgħaffiġhom,Jew li jistaʼ jgħaddi minn fuqhom xi annimal salvaġġ.
16 Hi tittratta ħażin lill-frieħ tagħha, bħallikieku mhumiex tagħha;Ma jimpurtahiex jekk tkun biedet għalxejn.
17 Għax Alla la taha* l-għerfU lanqas l-abbiltà li tifhem.
18 Imma meta tqum u tħabbat ġwinħajha biex taħrab,Hi tidħaq biż-żiemel u b’dak li jkun riekeb fuqu.
19 Jaqaw int tagħti s-saħħa liż-żiemel,Jew tlibbislu għonqu b’xagħar twil?
20 Tistaʼ ġġiegħlu jaqbeż bħal ġurat?
L-infiħ qawwi tiegħu hu tat-twerwir.
21 Hu jagħti b’saqajh fil-wied u jifraħ bil-qawwa tiegħu;Hu jidħol għall-battalja.*
22 Ma jiddejjaqx mill-periklu u ma jibżaʼ minn xejn.
U lanqas idur lura minħabba x-xabla.
23 Il-barżakka tal-vleġeġ iċċekċek xħin tħabbat miegħu,U l-lanza tleqq meta jiġi d-dawl fuqha.
24 Hu jitriegħed bl-eċitament u jiġri ’l quddiem,*M’għandux paċenzja joqgħod wieqaf mal-ħoss tal-qarn.*
25 Meta jindaqq il-qarn hu jiżher.
Ixomm il-battalja mill-bogħod,U jismaʼ l-għajjat tal-kmandanti u l-ħoss tal-battalja.
26 Jaqaw int għallimtu l-falkun itirU jiftaħ il-ġwienaħ lejn in-Nofsinhar?
27 Jew hu bil-kmand tiegħek li l-ajkla ttir ’il fuqU tagħmel il-bejta fl-għoli?
28 Hi tqattaʼ l-lejl fuq l-irdumU tgħix f’post protett fuq blata.*
29 Minn hemm hi tfittex l-ikel;Għajnejha jħarsu fil-bogħod.
30 Il-frieħ tagħha jixorbu d-demm;U fejn ikun hemm xi ħaġa maqtula, hemm tkun hi.”
Noti taʼ taħt
^ Jew “fil-maxtura.”
^ Letteralment “iż-żerriegħa.”
^ Jew “fil-qiegħa tad-dris.” Ara Termini tal-Bibbja Spjegati.
^ Jiġifieri ostrich.
^ Letteralment “nessieha.”
^ Letteralment “joħroġ jiltaqaʼ mal-armi.”
^ Letteralment “u jiblaʼ l-art (id-dinja).”
^ Jew forsi “Ma jistax jemmen il-ħoss tal-qarn.”
^ Letteralment “fuq is-sinna taʼ blata.”
