Ġob 2:1-13
2 U waslet il-ġurnata li l-anġli* reġgħu marru quddiem Ġeħova l-Alla l-veru, u Satana wkoll mar quddiem Ġeħova.
2 Imbagħad Ġeħova qal lil Satana: “Minn fejn ġej?” Satana wieġeb lil Ġeħova: “Kont qed indur ’l hemm u ’l hawn fid-dinja u nara x’hemm fiha.”
3 U Ġeħova qal lil Satana: “Rajtu l-qaddej tiegħi Ġob? M’hemm ħadd bħalu fid-dinja. Hu raġel sew u leali,* jirrispettani ħafna,* u ma jagħmilx dak li hu ħażin. Hu baqaʼ leali avolja qed tipprova tikkonvinċini biex neqirdu għalxejn b’xejn.”
4 Imma Satana wieġeb lil Ġeħova: “Wieħed żgur li jkun lest li jagħti kollox jekk ikun hemm ħajtu fin-nofs.
5 Għalhekk, uża l-qawwa tiegħek biex teffettwa s-saħħa tiegħu, u tara kif jgħajrek f’wiċċek.”
6 Imbagħad Ġeħova qallu: “Ħa nħallih f’idejk. Agħmillu li trid, imma toqtlux!”
7 Għalhekk, Satana telaq minn quddiem Ġeħova u mela lil Ġob bi msiemer kbar* minn rasu sa saqajh.
8 U Ġob qabad biċċa fuħħar biex iħokk biha, u qagħad bilqiegħda qalb l-irmied.
9 Fl-aħħar, il-mara tiegħu qaltlu: “Beħsiebek tibqaʼ leali? Isħet lil Alla u mut!”
10 Imma qalilha: “Qed tgħid affarijiet bla sens. Għandna aħna naċċettaw biss dak li hu tajjeb mingħand Alla?” Minkejja dak kollu li ġralu, Ġob ma qal xejn ħażin.*
11 U kien hemm tlett iħbieb taʼ Ġob li semgħu dwar dak kollu li għadda minnu, u ddeċidew li jiltaqgħu u jmorru biex juruh li jinteressahom minnu u jgħinuh iħossu aħjar. Dawn kienu Elifaż it-Temani, Bildad is-Suħi, u Sofar in-Nagħmati.
12 Meta rawh mill-bogħod, m’għarfuhx. Huma bdew jibku b’leħen għoli u jċarrtu ħwejjiġhom, u tefgħu t-trab fl-arja u fuq rashom.
13 Imbagħad huma għamlu ġimgħa bilqiegħda ħdejh, u ħadd ma qallu xejn għax raw li kien muġugħ ħafna.
Noti taʼ taħt
^ Letteralment “it-tfal t’Alla.”
^ Jew “bla ħtija u taʼ integrità.”
^ Letteralment “jibżaʼ minni.”
^ Jew “infafet taʼ wġigħ.”
^ Jew “ma dinibx b’dak li qal.”
