Aizaya 63:1-19
63 Kinọ ono o bi no obọ Edọm+ ze na,Nọ o bi no obọ Bọzra+ ze avọ iwu ekọlọ enwranwra,*Ọnọ ọ gọ ẹgọ owowoma na,Nọ o bi thihi avọ ogaga ulogbo riẹ na?
“Mẹ, Ọnọ ọ be ta oware nọ u kiẹrẹe,Ọnọ o wo ogaga ulogbo nọ o re ro siwi.”
2 Fikieme ẹgọ ra ọ rọ rrọ wawae,Kọ fikieme iwu ra e jẹ wọhọ erọ ohwo nọ o bi thihi ibi-ire evaọ ọgọdọ udi-uruo?+
3 “Mẹ ọvo me thihi ibi-ire na evaọ ọgọdọ nọ a rẹ jọ ru enwaene na.
Ohwo ọvo nọ o no obọ ahwo na ze ọ jọ kugbe omẹ hẹ.
Evedha me je ro thihi ai,Yọ ofu me je ro thihi ai nyaotọ.+
Azẹ rai ọ frẹ ku iwu mẹ,O wholo iwu mẹ kpobi no.
4 Keme ẹdẹ orukele ọ rrọ udu mẹ,+Yọ ukpe nọ mẹ rẹ rọ dẹ ahwo mẹ zihe ze u te no.
5 Me rri, rekọ ohwo ọvo ọ jariẹ nọ o re fiobọhọ họ;U gbe omẹ unu gaga inọ ohwo ọvo ọ fialoma ze nọ ọ rẹ tha omẹ uke he.
Fikiere ugbobọ mẹ o tẹ wha esiwo* se omẹ,+Ofu obọmẹ o tẹ tha omẹ uke.
6 Mẹ rehọ evedha thihi ahwo nyaotọ,Mẹ kẹ rai ofu mẹ da bẹ+Je ku azẹ rai fihọ otọ.”
7 Mẹ te fodẹ eware nọ Jihova o ru ro dhesẹ uyoyou nọ o rẹ hiẹ hẹ,Eware nọ i fo ejiro nọ Jihova o ru,Fiki eware kpobi nọ Jihova o ru kẹ omai no,+Eware iwoma buobu nọ o ru kẹ uwou Izrẹl no,Fiki ohrọ riẹ gbe uyoyou ulogbo riẹ nọ o rẹ hiẹ hẹ.
8 Keme ọ ta nọ: “Ababọ avro, ahwo mẹ a rrọ, emezae nọ e te nyasiọ omẹ ba ha.”*+
Fikiere o te zihe ruọ Osiwi rai.+
9 Evaọ etoke uye rai kpobi, o jẹ kẹe uye re.+
Ọnyukọ obọriẹ nọ ọ mae kẹle iẹe* o te siwi ai.+
Ọ dẹ rai zihe ze fiki uyoyou gbe ọdawẹ riẹ,+Yọ ọ kpare rai kpehru jẹ wọ ae evaọ oke nọ u kpemu na kpobi.+
10 Rekọ a tẹ wọso ẹe+ je ru eva dha ẹzi ọfuafo riẹ.+
O te zihe ruọ ọwegrẹ rai,+Ọ tẹ họre ai.+
11 A tẹ kareghẹhọ oke nọ u kpemu,Oke Mosis odibo riẹ, inọ:
“Kọ Ọnọ ọ rehọ ithuru-igodẹ uthuru riẹ+ rọ rehọ ae no abade+ na ze na ọ rrọ?
Kọ Ọnọ o fi ẹzi ọfuafo Riẹ+ họ iẹe oma na ọ rrọ,
12 Ọnọ o ru re ugbobọ oruaro Riẹ o jọ kugbe obọze Mosis,+Ọnọ ọ hẹriẹ ame obuobu na evaọ aro rai+Re o ru omariẹ wo odẹ ebẹdẹ bẹdẹ,+
13 Ọnọ o ru rai nya ame nọ o bi fi ẹkporo* vrẹ,A tẹ nyavrẹ ababọ ezoruẹ,Wọhọ anyenya nọ ọ rrọ oria uvevẹ?*
14 Nwane wọhọ epanọ erao i re kpohọ ukiekpotọ opraprara nyai serihọ na,Ere ẹzi Jihova o ru rai serihọ.”+
Ere who ro su ahwo ra,Re who ru omara wo odẹ ulogbo.*+
15 Rri no obọ odhiwu ze re whọ ruẹNo oria ukpehru ra nọ o rrọ ọrẹri je wo oruaro* na ze.
Kọ ajọwha ra gbe ẹgba ra e rrọ,Oware nọ o rẹ wọ owhẹ dhesẹ ọdawẹ+ na* gbe ohrọ ra?+
Who gbe bi dhesẹ ae kẹ omẹ hẹ.
16 Keme whẹ họ Ọsẹ mai;+Dede nọ Abraham ọ riẹ omai hiYọ Izrẹl ọ rẹ sai vuhu omai hi,O Jihova, whẹ họ Ọsẹ mai.
Ọnọ ọ dẹ omai zihe ze evaọ oke krẹkri nọ u kpemu họ odẹ ra.+
17 O Jihova, fikieme whọ rọ kẹ omai uvẹ* ghoro no idhere ra?
Fikieme whọ rọ kuvẹ re udu mai o jọ* gaga, nọ ma gbẹ be rọ dhozọ ra ha?+
Zihe ze, fiki idibo ra,Enọ e rrọ erua ukuoriọ ra.+
18 Ahwo ọrẹri ra a wo rie evaọ omoke kpẹkpẹe.
Ewegrẹ mai i thihi aruẹri ra nyaotọ no.+
19 Ma rrọ wọhọ ahwo nọ who ri su ẹdẹvo ho kri ga hrọ no,Wọhọ enọ a re rehọ odẹ ra se ẹdẹvo ho.
Eme-Obotọ
^ Hayo o sae jọ nọ, “nọ e rrọ wawae gbagbagba.”
^ Hayo “obokparọ.”
^ Hayo “nọ i ti ru epanọ a ta gba.”
^ Hayo “Ukọ-odhiwu nọ ọ rẹ jọ aro riẹ.”
^ Hayo “ame odidi.”
^ Hayo “udhude.”
^ Hayo “owoma.”
^ Hayo “erru.”
^ Evaọ Hibru, “Ekwakwa obeva ra nọ i re duwuku na.”
^ Hayo “who ro ru omai.”
^ Evaọ Hibru, “who ro ru udu mai.”
