Aizaya 43:1-28

  • Jihova ọ wariẹ koko ahwo riẹ họ (1-7)

  • A dawo eghẹnẹ na (8-13)

    • “Whai họ isẹri mẹ” (10, 12)

  • A siobọno ai no Babilọn (14-21)

  • “Joma gu ọvuọ ẹkẹ unu riẹ ze” (22-28)

43  Enẹna, enẹ Jihova ọ ta,Ọmemama nọ ọ ma owhẹ, O Jekọp, Ọnọ ọ ruẹrẹ owhẹ họ, O Izrẹl:+ “Jọ ozọ u mu owhẹ hẹ, keme mẹ dẹ owhẹ zihe ze no.+ Mẹ rehọ odẹ ra se owhẹ. Mẹ họ ọnọ o wo owhẹ.   Okenọ whọ te nya ame obuobu na vrẹ, mẹ te jọ kugbe owhẹ,+Yọ okenọ whọ te nya ithẹ na vrẹ, ame na o ti le owhẹ no ho.+ Okenọ whọ te nya erae vrẹ, e te mahe owhẹ hẹ,Yọ erri erae na o ti mu owhẹ hẹ.   Keme mẹ họ Jihova Ọghẹnẹ ra,Ọrẹri Izrẹl na, osiwi ra. Mẹ rehọ Ijipti hwosa ẹtanigbo ra no,Jẹ rehọ Ẹtiopia avọ Siba nwene owhẹ no.   Keme whọ rrọ ghaghae evaọ ẹro mẹ,+Mẹ kẹ owhẹ ọghọ, me te je you owhẹ.+ Fikiere mẹ te rehọ ahwo nwene oria raJẹ rehọ erẹwho nwene uzuazọ* ra.   Jọ ozọ u mu owhẹ hẹ, keme mẹ rrọ kugbe owhẹ.+ Mẹ te rehọ ọmọ* ra no obọ ovatha-ọre zeJe koko owhẹ họ no obọ ukiediwo-ọre ze.+   Mẹ te ta kẹ ẹkpẹlobọ ovatha-ọre nọ, ‘Siobọno ae!’+ Jẹ ta kẹ obọze ovatha-ọre nọ, ‘Whọ whaha ae he. Rehọ emezae mẹ no ugbothabọ ze, jẹ rehọ emetẹ mẹ no oka avọ oka otọakpọ na ze,+   Ohwo kpobi nọ a be rehọ odẹ mẹ se,+Enọ mẹ ma rọkẹ oruaro obọ mẹ,Enọ mẹ ma je ru.’+   Rehọ ahwo nọ a tuaro dede nọ a wo ibiaro na lahwe,Gbe enọ i diezọ, dede nọ a wo ezọ.+   Jọ erẹwho na kpobi i kokohọ oria ovo,Re a je koko ahwo na họ.+ Ono evaọ usu rai ọ rẹ sae ta onana? Hayo kọ a rẹ sai ru re ma yo eware ọsosuọ na?*+ Jọ a rehọ isẹri rai ze re a dhesẹ nọ a rease,Hayo jọ a yo re a ta nọ, ‘Uzẹme na oye!’”+ 10  “Whai họ isẹri mẹ,”+ ere Jihova ọ ta,“Ẹhẹ, odibo mẹ nọ mẹ salọ no,+Re wha ruẹse riẹ je fi ẹrọwọ họ omẹ*Wha ve wo otoriẹ inọ mẹ họ Omọvo na.+ Ọghẹnẹ ọfa ọ kake rehọ omẹ jọ họ,Yọ u te no omẹ no, ọfa ọ re jọ họ.+ 11  Mẹ—mẹ họ Jihova,+ yọ u te no omẹ no osiwi ọfa ọ rrọ họ.”+ 12  “Mẹ họ Ọnọ o whowho je siwi je dhesẹ viaOkenọ ọghẹnẹ orẹwho ọfa ọ jọ udevie rai hi.+ Fikiere, whai họ isẹri mẹ,” ere Jihova ọ ta, “yọ mẹ họ Ọghẹnẹ.+ 13  Ofariẹ, mẹ họ Omọvo na ẹsikpobi;+Yọ ohwo ọvo ọ sai fru oware ovo no obọ mẹ hẹ.+ Nọ me te bi ru oware jọ, ono ọ rẹ sae whaha iẹe?”+ 14  Enẹ Jihova ọ ta, Ọnọ ọ dẹ owhai zihe ze,+ Ọrẹri Izrẹl:+ “Me ti vi ai kpobọ Babilọn fiki rai re a fa ekpọ nọ a rọ kare inuethẹ na kpobi fihọ otọ,+Yọ ahwo Kaldia na a te jọ ekọ ilogbo rai bo via fiki uye.+ 15  Mẹ họ Jihova, Ọrẹri rai,+ Ọmemama nọ ọ ma Izrẹl,+ Ovie rai.”+ 16  Enẹ Jihova ọ ta,Ọnọ o bi ru edhere fihọ abade naJe ru edhere fihọ ame obuobu nọ ẹkporo ọ vọ dede,+ 17  Ọnọ ọ rẹ rehọ akẹkẹ ẹmo na avọ anyenya na lahwe,+Te ogbaẹmo na avọ egbaẹmo egaga na: “A ti kiẹzẹ yọ a te kpama ha.+ A ti furie ai no, furie ai wọhọ uwhiki nọ o be ware.” 18  “Wha kareghẹhọ eware nọ e vrẹ no ho,Yọ wha du roro kpahe oke nọ o vrẹ no ho. 19  Rri! Me bi ru oware okpokpọ jọ;+Makọ enẹna u mu oma họ ẹrọvia no. Kọ wha bi vuhu iei mu? Me ti ru edhere fihọ igbrẹwọ na+Je ru ithẹ fihọ udhude na.+ 20  Arao ojihẹ ẹwọ na ọ te kẹ omẹ ọghọ,Te ikozi te igomugoro na,Keme me bi ru re ame ọ jọ igbrẹwọ na,Je ru ithẹ jọ udhude na+Rọkẹ ahwo mẹ nọ mẹ salọ,+ re a da, 21  Ahwo nọ mẹ ma kẹ omamẹRe a ruẹsi whowho ujiro mẹ.+ 22  Rekọ who ri bo se omẹ hẹ, O Jekọp,+Fikinọ mẹ bẹ owhẹ no, O Izrẹl.+ 23  Whọ re rehọ igodẹ se omẹ rọkẹ idhe emahọ ra haHayo rehọ idheidhe ra kẹ omẹ oruaro ho. Mẹ re gba owhẹ họ nọ whọ kẹ omẹ okẹ hẹ,Yọ me ri ru oma rrọ owhẹ ẹkwoma frankinsẹns+ nọ mẹ be ta nọ whọ rehọ ze he. 24  Whọ rehọ ugho ra dẹ uti omemere kẹ omẹ hẹ,Yọ whọ rehọ iwhri idheidhe ra ru omẹ eva were he.+ Ukpoye, whọ rehọ izieraha ra wọ owha ogbẹgbẹdẹ fihọ omẹ uzouJẹ be rehọ iruthọ ra ru oma rrọ omẹ.+ 25  Mẹ, mẹ họ Ọnọ o bi voro iruthọ* ra no+ fiki odẹ mẹ,+Yọ mẹ te kareghẹhọ izieraha ra ha.+ 26  Kareghẹhọ omẹ otẹrọnọ oware jọ o thọrọ omẹ ẹro; joma gu ọvuọ ẹkẹ unu riẹ ze;Gu ẹkẹ unu ra re who dhesẹ nọ whọ rease. 27  Ọsẹ-esẹ ọsosuọ ra ọ raha uzi,Yọ etota* obọra e wọso omẹ no.+ 28  Fikiere me ti zue isu oria ọrẹri na oma,Me ti siobọno Jekọp re a raha iẹeJe ti ru Izrẹl re a lae eka.+

Eme-Obotọ

Evaọ Hibru, “nifẹsh.” Rri oria Otofa Eme.
Evaọ Hibru, “ubi.”
O sae jọ nọ o be ta kpahe eware ọsosuọ nọ e te via evaọ obaro.
Hayo “je fievahọ omẹ.”
Hayo “iruẹru ọwọsuọ.”
O sae jọ nọ o be ta kpahe iwuhrẹ nọ i re wuhrẹ ahwo uzi na.