Aizaya 41:1-29
41 “Wha fibo re wha gaviezọ kẹ omẹ,* whai ikoliko;Jọ erẹwho na e wariẹ wo ẹgba rai.
Jọ a nyaze; kẹsena a vẹ ta ẹme.+
Joma kokohọ kẹ ẹdhoguo.
2 Ono ọ rehọ ohwo jọ mu evaọ obọ ovatha-ọre na,+Nọ o se rie ziọ awọ Riẹ re o ru uvioziẹ gba,*Re ọ rehọ erẹwho kẹeRe o je ru ei su ivie?+
Ono o zihe i rai ruọ ovu evaọ aro ọgbọdọ riẹ,Wọhọ ẹbe ọyaya nọ ofou o fou kufiẹ evaọ aro uze riẹ?
3 O bi le ai, be nyavrẹ ababọ ọzadheEvaọ idhere nọ awọ riẹ ọ re nya vẹre he.
4 Ono ọ jowọ je ru onana,Nọ o se ige na kokohọ no anwọ emuhọ ze?
Mẹ Jihova, mẹ họ Ọrọ Ọsosuọ na;+Yọ epọvo na mẹ te jọ makọ rite erọ urere.”+
5 Ikoliko na e ruẹ e riẹ no, yọ ozọ u bi mu ai.
Oka avọ oka otọakpọ na i te muhọ enuhu.
A bi kokohọ jẹ nya lahwe.
6 Omomọvo o bi fiobọhọ kẹ ọrivẹ riẹJẹ be ta kẹ oniọvo riẹ nọ: “Kru oma ga.”
7 Fikiere ọwena na ọ be bọ odhogu na ga;+Ọnọ ọ rẹ rehọ ogbokọ tehe eware fihọ kpakpala naỌ be bọ ọnọ ọ be tehe oware evaọ ehru ogbẹ ulogbo na ga.
Ọ be ta kpahe oware nọ a be tehe kugbe na nọ: “O rrọ wowoma.”
Kẹsena a tẹ rehọ ibubẹ tehe iẹe yawo re o seba evre kie.
8 “Rekọ whẹ Izrẹl yọ odibo mẹ,+Whẹ Jekọp yọ ọnọ mẹ salọ no,+Ọmọ* Abraham ogbẹnyusu mẹ,+
9 Whẹ yọ ọnọ mẹ rehọ no oka avọ oka otọakpọ na ze,+Whẹ yọ ọnọ me se no eria otọakpọ na nọ e mai thabọ ze.
Mẹ ta kẹ owhẹ nọ, ‘Whẹ yọ odibo mẹ;+Mẹ salọ owhẹ no; mẹ re siọ owhẹ hẹ.+
10 Jọ ozọ u mu owhẹ hẹ, keme mẹ rrọ kugbe owhẹ.+
Whọ ruawa ha, keme mẹ họ Ọghẹnẹ ra.+
Me ti ru owhẹ ga, ẹhẹ, me ti fiobọhọ kẹ owhẹ,+Mẹ te rehọ obọze ẹrẹreokie mẹ kru owhẹ kekeke.’
11 Rri! Ahwo kpobi nọ a bi mu ofu ọgaga kẹ owhẹ, a ti ru oma vuọ ae je hrẹ ae kpotọ.+
Ahwo nọ a bi lele owhẹ họre, a ti ru ai jọ oware ufofe je whu no.+
12 Whọ te kiẹ gwọlọ ezae nọ i bi lele owhẹ họre, rekọ whọ te ruẹ e rai hi;Ezae nọ i bi lele owhẹ fi ẹmo a ti zihe ruọ oware nọ o rrọ họ, wọhọ oware ufofe.+
13 Keme mẹ Jihova Ọghẹnẹ ra, me bi kru obọze ra kekeke,Ọnọ ọ be ta kẹ owhẹ nọ, ‘Jọ ozọ u mu owhẹ hẹ. Me ti fiobọhọ kẹ owhẹ.’+
14 Jọ ozọ u mu owhẹ hẹ, whẹ Jekọp adha* na,+Whai ahwo Izrẹl, me ti fiobọhọ kẹ owhai,” ere Jihova ọ ta, Ọnọ ọ dẹ owhai zihe ze,+ Ọrẹri Izrẹl na.
15 “Rri! Me ru owhẹ fihọ ẹwẹ akpala nọ a re ro si ibi no igbe no,+Okwakwa okpokpọ nọ a re ro si ibi no igbe nọ o wo akọ ivẹ.
Who ti thihi igbehru na nyaotọ jẹ guọghọ ae noJe ru ikpehru na wọhọ ehọrọ.
16 Whọ te frẹ rai kpehru,Ofou na o ve ti fou rai kufiẹ;Ofou ọwhibo ọ te vaha ae.
Whọ te ghọghọ fiki Jihova,+Yọ who ti seha fiki Ọrẹri Izrẹl.”+
17 “Enọ ọbẹwẹ ọ rrọ oma gbe iyogbe na e be gwọlọ ame, rekọ ame ọvo ọ riẹ hẹ.
Ẹrọo rai ọ ya fia no fiki uruame.+
Mẹ Jihova, mẹ te kẹ ae uyo.+
Mẹ Ọghẹnẹ Izrẹl, me ti gbabọkẹ ae he.+
18 Me ti ru ithẹ su evaọ ehru ikpehru ifofe+Je ru iyeri-ame su evaọ ikiekpotọ epraprara na.+
Me ti zihe udhude na ruọ ẹtẹre-ame nọ ikpoko* e rrọJe ru ẹkwotọ nọ ame ọ rrọ họ zihe ruọ iyeri-ame.+
19 Mẹ te kọ ure sida fihọ udhude na,Gbe ure akasha gbe ure idodo, gbe ure epaene.+
Mẹ te kọ ure junipa fihọ udhude opraprara na,Jegbe ure ash gbe ure siprẹs,+
20 Re ahwo kpobi a ruẹse ruẹ jẹ riẹ,Jẹ gaviezọ re a wo otoriẹInọ obọ Jihova u ru onana,Yọ Ọrẹri Izrẹl ọ ma riẹ.”+
21 “Wha gu ẹkẹ unu rai ze,” ere Jihova ọ ta.
“Wha rehọ imuẹro rai ze,” ere Ovie Jekọp ọ ta.
22 “Wha rehọ oware imuẹro ze re wha vuẹ omai eware nọ e te via.
Vuẹ omai kpahe eware nọ e vrẹ no,*Re ma ruẹsi roro kpahe ae* jẹ riẹ oware nọ u no rai ze.
Hayo vuẹ omai eware nọ e be tha.+
23 Wha vuẹ omai eware nọ e te via evaọ obaro,Re ma ruẹse riẹ nọ whai yọ eghẹnẹ.+
Ẹhẹ, wha ru oware jọ, te uwoma hayo uyoma,Re o ruẹsi gbe omai unu nọ ma tẹ ruẹ e riẹ.+
24 Rri! Whai yọ oware nọ o rrọ họ,Yọ oware nọ wha wo te obọ ufofe.+
Ohwo kpobi nọ ọ salọ owhai ọ rrọ tọtọtọ.+
25 Mẹ rehọ ohwo jọ mu no evaọ obọ ẹkpẹlobọ ovatha-ọre, yọ ọ te nyaze,+Ọnọ o no obọ ovatha-ọre ze+ nọ o ti se odẹ mẹ.
O ti thihi isu* nyaotọ wọhọ ẹsenọ a rrọ ọviẹ,+Wọhọ ọmebẹ nọ o re thihi ọviẹ nọ ọ rrọ vuavo.
26 Ono ọ ta ẹme kpahe onana no emuhọ ze, re ma sae riẹ,Hayo no oke nọ o vrẹ no ze, re ma sae ta nọ, ‘Ọ ta gba’?+
Evaọ uzẹme, ohwo ọvo o whowho i rie he!
Ohwo ọvo ọ ta riẹ hẹ!
Ohwo ọvo o yo oware ovo mi owhai hi!”+
27 Mẹ họ ohwo ọsosuọ nọ ọ ta kẹ Zayọn nọ: “Rri! Eware na ena!”+
Yọ me ti vi ọnọ ọ rẹ wha emamọ usi+ bru Jerusalẹm.
28 Rekọ me gbe je rri, yọ ohwo ọvo ọ jariẹ hẹ;Ọvuọvo ọ jọ usu rai nọ ọ rẹ kẹ ohrẹ hẹ.
Mẹ tẹ gbẹ jẹ nọ ae re a kẹ uyo.
29 Rri! Aikpobi yọ oware eviẹhọ.*
Iruo rai ifofe.
Emema ayọno rai* yọ ofou gbe oware nọ u muẹro ho.+
Eme-Obotọ
^ Hayo “Wha fibo evaọ aro mẹ.”
^ Koyehọ, re ọ gbodibo Kẹe.
^ Evaọ Hibru, “Ubi.”
^ Hayo “azazọ.” Koyehọ, ọnọ o wo oware ovo nọ o rẹ thọe he jẹ rrọ oruori.
^ Hayo “ekiara.”
^ Evaọ Hibru, “eware ọsosuọ.”
^ Hayo “fi udu mai họ ae.”
^ Hayo “ethabọ-isu.”
^ Hayo “oware nọ o rrọ họ.”
^ Hayo “emema rai nọ a ghra ayọno ro ru.”