Aizaya 33:1-24
33 Uye u te owhẹ, whẹ ọnọ ọ rẹ raha ọraha na nọ a re te raha ha;+Whẹ ọnọ o re vivie ahwo nọ a ri vivie he!
Nọ whọ tẹ raha ọraha na re no, a te raha owhẹ no.+
Nọ who te vivie ahwo re no, a ti vivie owhẹ.
2 O Jihova, dhesẹ aruoriwo kẹ omai.+
Whẹ ma fi ẹruore mai họ.
Jọ ugbobọ* mai+ kohiohiẹ kohiohiẹ,Ẹhẹ, jọ esiwo mai evaọ oke uye.+
3 Nọ ahwo a yo edo ẹvohẹ, a tẹ dhẹ.
Nọ whọ kparoma, erẹwho e tẹ vahabọ.+
4 Wọhọ epanọ ebaka-ẹkpẹ nọ e rẹ re oware muotọ i re su kokohọ na, ere a ti su wariẹ egbo-ẹmo rai họ;Ahwo a ti su viri ai wọhọ ebaka-ẹkpẹ nọ e rrọ gbidi gbidi.
5 A te kpare Jihova kpehru,Keme obọ ihru na ọ be rria.
O ti ru uvioziẹ avọ ẹrẹreokie vọ Zayọn.
6 Ọye họ ọnọ o bi ru oke rai dọmu;Ọnọ ọ be kẹ esiwo+ ologbo, areghẹ, eriariẹ, gbe ozodhẹ Jihova+—Onana họ okwakwa-aghae riẹ.
7 Rri! Egba rai i bi bo evaọ iyẹrẹ;Ewhovuẹ udhedhẹ na e be viẹ whrowhrowhro.
8 A gbabọkẹ idhere ilogbo na no;Ohwo ọvo ọ be nya imidhere na ha.
Ọ* raha ọvọ na no;Ọ siọ ikpewho na no;Ọ rẹ daezọ ohwo-akpọ họ.+
9 Ẹkwotọ na o bi weri* je bi lo no.
Oma o be vuọ Lebanọn;+ o gbo no.
Sharọn ọ wọhọ udhude no,Yọ Beshan avọ Kamẹl a fa ebe no.+
10 Jihova ọ ta nọ, “Enẹna mẹ te kparoma,Enẹna mẹ te kpare omamẹ kpehru;+Enẹna me ti ru omamẹ ruaro.
11 Wha di eva ẹbe ọyaya họ, wha ti yẹ igbeka nọ a gbẹre dhe.
Ẹzi obọrai ọ te mahe owhai no wọhọ erae.+
12 Yọ ahwo a te jọ wọhọ enwo utho elaemo nọ a mahe.
A ti tu erae họ ae wọhọ idhigbo nọ a gbẹre fihọ otọ.+
13 Whai enọ e rrọ ugbothabọ, wha gaviezọ oware nọ me ti ru!
Whai enọ e rrọ ekẹloma, wha vuhu ẹgba mẹ mu!
14 Ozọ u bi mu erahaizi nọ e rrọ Zayọn;+Enọ e siọ orọwọ na no i bi nuhu:
‘Ono evaọ usu mai ọ rẹ sae rria oria nọ ebruerae ọ rrọ?+
Ono evaọ usu mai ọ rẹ sae rria oria nọ erri erae nọ a sai furie he ọ rrọ?’
15 Ọnọ ọ rẹ ruabọhọ nya evaọ ẹrẹreokie,+Ọnọ ọ rẹ ta ẹme nọ ọ gba,+Ọnọ ọ rẹ siọ erere ewhariọ nọ a rẹ rọ iwhayo wo,Ọnọ abọ riẹ ọ rẹ siọ udi-oriọ, ọ rẹ jabọ kru ei hi,+Ọnọ ọ rẹ tehe ezọ riẹ di nọ a tẹ be ta ẹme azẹ-okpe,Ọnọ ọ rẹ fare ibiaro riẹ re ọ siọ oware nọ u yoma ba ẹruẹ
16 —Ọ te rria obọ ehru na;Oria adhẹzọ riẹ nọ o foma* o te jọ eria nọ i siomano evaọ itho,A te kẹe ebrẹdi nọ ọ rẹ re,Yọ oria nọ ame riẹ o bi no ze o te kpọ vievie he.”+
17 Ibiaro ra e te ruẹ ovie nọ ọ vọ avọ erru;A te ruẹ ẹkwotọ ugbothabọ.
18 Whọ te jọ udu ra kareghẹhọ* idudu na:
“Kọ okere-obe na ọ rrọ?
Kọ ọnọ ọ jẹ hwa azọhọ na ọ rrọ?+
Kọ ọnọ o je kele iwou ikpehru na ọ rrọ?”
19 Whọ gbẹ te ruẹ ahwo orivo na vievie he,Ahwo nọ a rẹ kaki wo otoriẹ ẹvẹrẹ rai hi fikinọ o vẹ hẹ,*Enọ ẹrọo rai o re bru ekọkọ nọ whọ sai wo otoriẹ ẹme rai hi.+
20 Rri Zayọn, okpẹwho nọ ma rẹ jọ ru ehaa sa-sa na!+
Ibiaro ra e te ruẹ nọ Jerusalẹm yọ oria odhedhẹ nọ a rẹ rria,Uwou-udhu nọ a te wọ no oria riẹ hẹ.+
A ti wolo ighele uwou-udhu na no vievie he,Yọ a te sawo ifi riẹ ọvuọvo ho.
21 Rekọ etẹe Jihova, Ọnọ O Wo Oruaro na,Ọ te jọ jọ kẹ omai wọhọ ubrotọ nọ u wo ithẹ, nọ u wo iko-ame ekẹkẹe,Oria nọ uhie ekọ-ivi evuevo e te ruọ eva ha,Yọ ekọ ilogbo evuevo i ti bi ei vrẹ hẹ.
22 Keme Jihova họ Obruoziẹ mai,+Jihova họ Ọkẹ-Uzi mai,+Jihova họ Ovie mai;+Ọye họ ọnọ o ti siwi omai.+
23 Ifi ra e te jọ whrehe whrehe;E rẹ sai kru ọkpọ na dikihẹ hẹ, hayo rriẹ ẹwẹ-ohọ okọ na ha.
Evaọ oke yena a te ghale egbo-ẹmo buobu gbidi gbidi;Makọ enọ e ko dede e te kwa eware buobu rehọ.+
24 Yọ ohwo ọvo nọ ọ be rria ẹkwotọ na nọ ọ te ta nọ, “Mẹ be mọ”+ ọ te jariẹ hẹ.
A te rehọ oruthọ ahwo nọ a be rria ẹkwotọ na rọvrẹ rai.+
Eme-Obotọ
^ Hayo “ẹgba.”
^ O be ta kpahe ọwegrẹ na.
^ Hayo o sae jọ nọ, “ọ ya fia no.”
^ Hayo “Oria ukpehru omofọwẹ riẹ.”
^ Hayo “roro didi kpahe.”
^ Evaọ Hibru, “diwi ga hrọ.”
