Aizaya 40:1-31
40 “Sasa ae oma, sasa ahwo mẹ oma,” ere Ọghẹnẹ rai ọ ta.+
2 “Ta ẹme te udu* Jerusalẹm,Whowho kẹe nọ etoke iruo ọgbahọ riẹ i kuhọ no,Inọ a hwosa abe-ọriọ riẹ no.+
Ọ jọ obọ Jihova wo osa vọvọ* no fiki izieraha riẹ kpobi.”+
3 Uvou ohwo jọ o be jọ obọ udhude na woro nọ:
“Wha ruẹrẹ edhere Jihova kpahe!+
Ru edhere ologbo ọliọliọ+ fihọ udhude na kẹ Ọghẹnẹ mai.+
4 Jọ a lẹ ukiekpotọ kpobi kpehru,Je ru ugbehru gbe ukpehru kpobi kpotọ.
Otọ nọ o rrọ kothi kothi na o re zihe ruọ otọ opraprara hrọ,Yọ otọ nọ o rrọ igbigburu na o ti zihe ruọ ukiekpotọ opraprara.+
5 A ti dhesẹ oruaro Jihova via,+Yọ uwo kpobi o* te ruẹ e riẹ,+Keme unu Jihova o ta riẹ no.”
6 Gaviezọ! Ohwo jọ ọ be ta nọ: “Woro via!”
Omọfa ọ tẹ nọ nọ: “Eme me re woro via?”
“Uwo kpobi* yọ ẹbe ọrọrọ.
Uyoyou nọ o rẹ hiẹ hẹ nọ a wo kpobi o wọhọ ododo obọ ẹwọ.+
7 Ẹbe ọrọrọ na o bi whu no,Ododo na o bi lo no,+Fikinọ ẹwẹ* Jihova o bi fou ku ai.+
Uzẹme riẹ họ ahwo na yọ ẹbe ọrọrọ gheghe.
8 Ẹbe ọrọrọ na o bi whu no,Ododo na o bi lo no,Rekọ ẹme Ọghẹnẹ mai ọ rẹ jọ bẹdẹ bẹdẹ.”+
9 Nya kpobọ ehru ugbehru ukpekpehru jọ,Whẹ aye nọ ọ be wha emamọ usi bru Zayọn ze.+
Rehọ ogaga kpare uvou ra,Whẹ aye nọ ọ be wha emamọ usi bru Jerusalẹm ze.
Kpare uvou ra, jọ ozọ u mu owhẹ hẹ.
Woro kẹ ikpewho Juda nọ: “Ọghẹnẹ rai ọna.”+
10 Rri! Jihova Olori nọ Ọ Mai Kpehru na ọ te nyaze avọ ogaga,Yọ ugbobọ riẹ u ti su rọ kẹe.+
Rri! Osohwa riẹ o riẹe obọ,Yọ osa nọ ọ te hwa o rrọ aro riẹ.+
11 Wọhọ othuru-igodẹ, ọ te rẹrote* uthuru riẹ.+
Ọ te rehọ ugbobọ riẹ koko imigodẹ na họ,Ọ te wọ ae fihọ igbama riẹ.
Ọ te rọ ẹmẹrera su enọ e gbẹ be kẹ emọ rai evie.+
12 Ono ọ rehọ ẹkuobọ riẹ wawọ ame na kpobi no+Jẹ rehọ okẹkẹe evabọ* riẹ ma epanọ idhiwu na e rro te?
Ono o koko ẹkpẹ otọakpọ na fihọ owawọ-eware no+Hayo wawọ igbehru na evaọ iskeliJẹ wawọ ikpehru na evaọ iskeli no?
13 Ono ọ wawọ* ẹzi Jihova no,Yọ ono ọ rẹ sae jọ ọkohrẹ riẹ re o wuhrẹ iẹe?+
14 Ono ọ nọ mi re o te ti wo otoriẹ,Hayo ono o re wuhrẹ iẹe edhere uvioziẹ,Hayo wuhrẹ iẹe eriariẹ,Hayo dhesẹ edhere uvi otoriẹ kẹe?+
15 Rri! Erẹwho na e wọhọ ogẹ-ame nọ u su no ubokiti ze,Yọ ọ rehọ e rai wọhọ ovu nọ ọ rrọ ehru iskeli.+Rri! O re gbolo ikoliko na kpehru wọhọ ovu.
16 Makọ Lebanọn dede o te epanọ o re ro ru erae re e seba efu hu,*Yọ erao ẹwọ riẹ i bu te epanọ a rẹ rọ rehọ ai dhe idhe emahọ họ.
17 Erẹwho na kpobi e wọhọ oware nọ o rrọ họ evaọ aro riẹ;+O rri rai fihọ oware ufofe, a wọhọ oware nọ u muẹro ho.+
18 Ono wha sae rọ wawo Ọghẹnẹ?+
Uwoho vẹ wha sai ro dhesẹ iẹe?+
19 Ọwena o re ru ẹmẹdhọ,*Odhogu ọ vẹ rehọ igoru tamu* oma riẹ soso,+O ve je duwu egbregba isiliva.
20 Ọ rẹ salọ ure re o jọ ẹkẹ azọhọ riẹ,+Ure nọ u re gbo ho.
Ọ rẹ gwọlọ ọwena nọ o wo onaaRe o ru ẹmema nọ a kare nọ o ti vre kie he.+
21 Kọ wha gbẹ riẹ?
Kọ wha ri ti yo?
Kọ a re te vuẹ owhai no anwọ emuhọ ze?
Kọ wha ri wo otoriẹ no anwọ otọhotọ otọakpọ na ze?+
22 Ọjọ ọ riẹ nọ ọ be rria obehru otọakpọ ogheghelie na,+Yọ ahwo nọ a be rriae a wọhọ ebaka.
Ọ be rriẹ idhiwu na fihọ wọhọ ohọ ovrovro,Yọ ọ be rriẹ ai fihọ wọhọ uwou-udhu nọ a rẹ rria.+
23 O re ru ahwo ologbo esuo zihe ruọ oware nọ u fioka haO ve ru ibruoziẹ* otọakpọ na họ oware ufofe.
24 Udugaga a re ro kporo ae họ otọ,Udugaga a rẹ rọ kọ ae,Udugaga igbe rai e rẹ rọ ta awọ fihọ otọ,Yọ ofou o re fou rai, i ve lo no,Ofou na ọ vẹ wọ ae vrẹ wọhọ ẹbe ọyaya.+
25 “Ono wha rẹ sae rehọ omẹ dhesẹ re wha ru omẹ avọ iẹe jọ ẹrẹrẹe?” ere Ọrẹri na ọ ta.
26 “Wha kpare aro rai rri odhiwu re wha ruẹ.
Ono ọ ma eware nana?+
Ọye họ Ọnọ o bi su ai wọhọ ogbaẹmo, bi kele ai ọvuọvo;Ọvuọ odẹ riẹ o re ro se aikpobi.+
Fiki ẹgba ologbo riẹ nọ o bi ruiruo ẹsikpobi gbe ogaga riẹ nọ u re mu ọwhewhe,+Ọvuọvo rai o re voi ẹro ho.
27 O Jekọp, fikieme whọ rọ ta eme nana, O Izrẹl, fikieme who ro whowho eme nana inọ,‘Edhere mẹ o dhere no Jihova,Yọ Ọghẹnẹ o bru uvioziẹ kẹ omẹ hẹ’?+
28 Kọ wha gbẹ riẹ? Wha ri ti yo?
Jihova, Ọmemama nọ ọ ma eware kpobi nọ e rrọ otọakpọ na yọ Ọghẹnẹ ebẹdẹ bẹdẹ.+
O rẹ bẹe vievie he, yọ oma o rẹ rrọe he.+
A rẹ sae kiẹ otọ eware nọ ọ riẹ otọ rai via ha.*+
29 Ọ rẹ kẹ ọnọ oma o rrọ no ogagaJẹ kẹ enọ i wo ẹgba ha ẹgba ologbo.+
30 O te bẹ emezae no, oma o vẹ te jẹ rrọ ae no,Yọ izoge emezae na i ti zoruẹ je kie,
31 Rekọ enọ i fi ẹruore họ Jihova a te wariẹ wo ogaga.
A te rehọ ibekpe rra wọhọ igo.+
A te dhẹ ohrẹ yọ oma o te rrọ ae he;A te nya onya yọ o te bẹ ae he.”+
Eme-Obotọ
^ Hayo “Ta ẹme omosasọ kẹ.”
^ Hayo “akuava.”
^ Hayo “ahwo-akpọ kpobi a.”
^ Hayo “Ahwo-akpọ kpobi.”
^ Hayo “ẹzi.”
^ Hayo “sẹro.”
^ No ẹroro uziobọ-uzou rite uziobọ-oka na nọ a tẹ gha iziabọ na fihọ. Rri Ẹme-Ofiba B14.
^ Hayo o sae jọ nọ, “o wo otoriẹ.”
^ Hayo “ọ sae rehọ ire erae nọ i re te ze he.”
^ Hayo “ẹmema nọ a ghra ayọno ro ru.”
^ Hayo “ruru.”
^ Hayo “isu.”
^ Hayo “A rẹ sai wo otoriẹ eware nọ ọ riẹ otọ rai hi.”
