Aizaya 49:1-26
49 Wha gaviezọ kẹ omẹ, whai ikoliko,Re wha gaviezọ ziezi, whai erẹwho nọ e rrọ ugbothabọ.+
Jihova o se omẹ no taure a te ti yẹ omẹ.*+
No anwọ oke nọ mẹ rọ jọ eva edhede oni mẹ ze ọ rọ fodẹ odẹ mẹ.
2 O ru unu mẹ wọhọ ọgbọdọ ọdada;Ọ kuọ omẹ dhere otọ uwoho obọ riẹ.+
O ru omẹ fihọ ose nọ a thọ dada;O si omẹ no họ eva owha-ese riẹ.
3 Ọ ta kẹ omẹ nọ: “Whẹ yọ odibo mẹ, O Izrẹl,+Ọnọ mẹ te rọ ẹkwoma riẹ dhesẹ erru mẹ via.”+
4 Rekọ mẹ ta nọ: “Mẹ ruẹ uye kufiẹ no.
Mẹ rehọ ẹgba mẹ ro ru oware ufofe no, ro ruiruo kufiẹ.
Rekọ evaọ uzẹme, oziẹobro mẹ o rrọ obọ Jihova,*Yọ osa* mẹ o rrọ obọ Ọghẹnẹ mẹ.”+
5 Whaọ enẹna, Jihova, Ọnọ ọ ruẹrẹ omẹ họ no obọ edhede ze re mẹ jọ odibo riẹ,Ọ ta nọ mẹ rehọ Jekọp zihe bru ei ze,Re mẹ ruẹsi koko Izrẹl họ bru ei.+
A te kẹ omẹ orro evaọ aro Jihova,Yọ Ọghẹnẹ mẹ o re ti zihe ruọ ẹgba mẹ.
6 Ọ tẹ ta nọ: “U te he inọ whẹ yọ odibo mẹNọ ọ te kpare erua Jekọp dikihẹJe zihe ahwo Izrẹl nọ a seba uzuazọ ze.
Mẹ tẹ jẹ rehọ owhẹ mu no re whọ jọ elo kẹ erẹwho,+Re esiwo mẹ ọ ruẹsi te oka avọ oka otọakpọ na.”+
7 Enẹ Jihova, Ọnọ ọ dẹ Izrẹl zihe ze, Ọrẹri riẹ,+ ọ ta kẹ ọnọ a jẹ kufiẹ,+ kẹ ọnọ orẹwho na u bi rri tọtọtọ, kẹ ọnọ ọ rrọ odibo isu, inọ:
“Ivie e te ruẹ a vẹ te kparoma,Yọ ikpahwo-esuo i ti guzou kpotọFiki Jihova, ọnọ a re fievahọ na,+Ọrẹri Izrẹl, ọnọ ọ salọ owhẹ no.”+
8 Enẹ Jihova ọ ta:
“Evaọ oke aruoriwo,* me yo kẹ owhẹ,+Yọ evaọ ẹdẹ esiwo, me fiobọhọ kẹ owhẹ;+Mẹ jẹ sẹro ra re mẹ ruẹse rehọ owhẹ kẹ wọhọ ọvọ rọkẹ ahwo na,+Re whọ ruẹrẹ ẹkwotọ na,Re who ru ai wo eria ukuoriọ rai nọ e rrọ ofofe,+
9 Re whọ ta kẹ ahwo nọ a fihọ uwou-odi na nọ, ‘Wha nya lahwe!’+
Jẹ ta kẹ enọ e rrọ ebi+ na nọ, ‘Wha dhesẹ omarai via!’
Akotọ edhere na a te jọ re emu,Akotọ idhere nọ e raha no* na kpobi e te jọ etọ rai nọ erao e rẹ jọ re ẹbe.
10 Ohọo u ti kpe ai hi, yọ uruame u ti kpe ai gbe he,+Yọ ẹrrorro ọgaga hayo uvo u ti mu ai hi.+
Keme Ọnọ ọ be re ohrọ rai o ti su ai,+Yọ o ti su ai evaọ akotọ iyeri-ame.+
11 Me ti ru igbehru mẹ kpobi zihe ruọ edhere,Yọ mẹ te lẹ idhere ilogbo mẹ kpehru.+
12 Rri! Enana i bi no obọ ugbothabọ ze,+Je rri! enana i bi no obọ ẹkpẹlobọ ovatha-ọre ze je no obọ ukiediwo-ọre ze,Yọ enana i bi no obọ ẹkwotọ Saenim ze.”+
13 Wha bo ubo oghọghọ whai idhiwu, re wha ghọghọ, whai otọakpọ.+
Jọ igbehru na e wereva avọ ubo oghọghọ.+
Keme Jihova ọ sasa ahwo riẹ oma no,+Yọ ọ be re ohrọ ahwo riẹ nọ a be reoja.+
14 Rekọ Zayọn ọ be ta nọ:
“Jihova o gbabọkẹ omẹ no,+ mẹ thọrọ Jihova ẹro no.”+
15 Kọ ọmọ-unuevie nọ aye o yẹ ọ rẹ sae thọrọ iẹe ẹroHayo kọ ọ rẹ siọ ọdawẹ ba ewo kẹ ọmọzae nọ o no edhede riẹ ze?
O tẹ make thọrọ eyae nana ẹro dede, wha rẹ thọrọ omẹ ẹro vievie he.+
16 Rri! Me kere odẹ ra fihọ evabọ mẹ no.
Igbẹhẹ ra e rrọ aro mẹ ẹsikpobi.
17 Emezae ra i siawọ zihe ze.
Enọ i kporo owhẹ kuotọ jẹ raha owhẹ e te nyasiọ owhẹ ba.
18 Kpare aro ra re who rri wariẹ họ.
Aikpobi a bi kokohọ.+
A be nyabru owhẹ ze.
Jihova ọ ta nọ, “Nọ mẹ rrọ uzuazọ na,Whọ te rehọ aikpobi gọ ẹgọ wọhọ eware osẹ,Je ku ai họ oma ra wọhọ epanọ ọmọtibobo o re ru na.
19 Dede nọ eria ra e jọ eria nọ a raha jẹ jọ ofofe, ẹkwotọ ra ọ tẹ jẹ raha kuotọ,+Enẹna o te keke hrọ kẹ ahwo nọ a be rria etẹe,+Yọ enọ e lọ owhẹ no+ e te jọ ugbothabọ.+
20 Emezae nọ a yẹ evaọ okenọ emọ ra i whu no e te ta kẹ owhẹ nọ,‘Oria nana o keke hrọ kẹ omẹ.
Ru oria jọ kẹ omẹ nọ mẹ rẹ rria evaọ etenẹ.’+
21 Whọ vẹ te jọ udu ra ta nọ,‘Kọ ono họ ọsẹ emọ nana nọ a rọ kẹ omẹ na,Nọ orọnọ mẹ yọ aye nọ emọ riẹ i whu no, mẹ tẹ jẹ rrọ ọga na,Ọnọ a mu kpohọ orẹwho ọfa jẹ rrọ uwou-odi?
Ono ọ yọrọ enana?+
Rri! Mẹ ọvo ọ jọ goli,+Kọ bovẹ enana i no ze?’”+
22 Enẹ Jihova Olori nọ Ọ Mai Kpehru na ọ ta:
“Rri! Mẹ te kpare obọ mẹ kpehru kẹ erẹwho na,Jẹ te kpare oware oka* mẹ kpehru kẹ ahwo na.+
A te wọ emezae ra fihọ abọ* rai zeJẹ te wọ emetẹ ra fihọ ikoko rai ze.+
23 Ivie e te rẹrote owhẹ,+Yọ emetẹ-ivie na e te yọrọ owhẹ.
A ti guzou kpotọ kẹ owhẹ avọ ovao rai nọ a vẹ tuotọ+Jẹ lalọ ovu nọ ọ rrọ awọ ra,+Whọ vẹ te riẹ nọ mẹ họ Jihova;Enọ i fi ẹruore họ omẹ, a ti ru oma vuọ ai hi.”+
24 Kọ a rẹ sai mi ọgba enọ o mu tobọ no,Hayo kọ a rẹ sai siwi enọ osu ọgeva o mu?
25 Rekọ enẹ Jihova ọ ta:
“Makọ enọ ọgba o mu dede, a te rehọ ae vrẹ,+Yọ a ti siwi enọ osu ọgeva o mu.+
Mẹ te wọso enọ e be wọso owhẹ,+Yọ me ti siwi emezae obọra.
26 Me ti ru enọ i bi gboja kẹ owhẹ re uwo-oma obọrai,Yọ azẹ obọrai o ti mu ai wọhọ ẹsenọ enwaene ọwewere u bi mu ai.
Ahwo kpobi a* vẹ te riẹ nọ mẹ họ Jihova,+Osiwi ra+ gbe Ọnọ ọ dẹ owhẹ zihe ze,+Ọnọ Ọ Rrọ Ọgba Jekọp.”+
Eme-Obotọ
^ Evaọ Hibru, “no obọ edhede ze.”
^ Hayo “Jihova o ti bru uvioziẹ kẹ omẹ.”
^ Hayo “osohwa.”
^ Hayo “emamọ eva.”
^ Hayo o sae jọ nọ, “ikpehru ifofe.”
^ Evaọ Hibru, “igbama.”
^ Hayo “ọkpọ oka.”
^ Evaọ Hibru, “Uwo kpobi o.”
