Aizaya 37:1-38
37 Nọ Hẹzikaya ovie na ọ nwani yo eme nana, ọ tẹ bẹre iwu riẹ jẹ rehọ ehọ-ekpa* zuo, ọ tẹ ruọ eva uwou Jihova.+
2 Kẹsena o te vi Elayakim, ọnọ ọ jẹ rẹrote ahwo uwou* na, Shẹbna okere-obe na, gbe ekpako izerẹ na bru Aizaya ọruẹaro na,+ ọmọzae Emọz, avọ ehọ-ekpa* nọ a ku họ oma.
3 A tẹ ta kẹe nọ: “Enẹ Hẹzikaya ọ ta, ‘Ẹdẹ inẹnẹ na yọ ẹdẹ idhọvẹ, ẹdẹ ọwhọkuo,* gbe ẹdẹ omovuọ; keme oke nọ a re ro yẹ emọ na u te no,* rekọ ẹgba nọ a re ro yẹ ai ọ riẹ hẹ.+
4 Ẹsejọhọ Jihova Ọghẹnẹ ra o ti yo eme Rabshakẹ na, ọnọ ovie Asiria olori riẹ o vi ze te poviẹ Ọghẹnẹ nọ ọ rrọ uzuazọ na,+ ọ vẹ te rehọ iẹe guẹdhọ fiki eme nọ Jihova Ọghẹnẹ ra o yo na. Fikiere lẹ olẹ+ fiki ikiọkotọ nọ e zọ na.’”+
5 Ere idibo Hẹzikaya ovie na a rọ nyabru Aizaya,+
6 Aizaya ọ tẹ ta kẹ ae nọ: “Enẹ wha rẹ ta kẹ olori rai, ‘Enẹ Jihova ọ ta: “Jọ ozọ u mu owhẹ hẹ+ fiki eme nọ who yo na, eme-aghọ nọ idibo ovie Asiria+ e ta kpahe omẹ na.
7 Me bi fi iroro jọ họ udu riẹ,* o ti yo usi jọ, o ve ti zihe kpobọ ẹkwotọ obọriẹ;+ me ti ru re a rehọ ọgbọdọ kpei evaọ ẹkwotọ obọriẹ.”’”+
8 Nọ Rabshakẹ na o yo nọ ovie Asiria o no Lekish no, o te zihe bru ei, ọ tẹ ruẹ nọ ọ be họre Libna.+
9 Whaọ ovie na o te yo eme nọ a ta kpahe Tẹheka ovie Ẹtiopia, inọ: “Ọ wọ lahwe ze te họre owhẹ no.” Nọ o yo onana, ọ tẹ wariẹ vi enyukọ bru Hẹzikaya,+ inọ:
10 “Enẹ wha rẹ ta kẹ Hẹzikaya ovie Juda, ‘Whọ kuvẹ hẹ re Ọghẹnẹ ra nọ whọ rẹroso na ọ viẹ owhẹ họ inọ: “A te rehọ Jerusalẹm họ obọ ovie Asiria ha.”+
11 Rri! Who yo kpahe oware nọ ivie Asiria i ru ekwotọ na kpobi nọ a rọ raha ae muotọ.+ Kọ whẹ ọvo a ti siwi?
12 Kọ eghẹnẹ erẹwho nọ esẹ-esẹ mẹ e raha na i siwi rai?+ Kọ Gozan, Heran,+ Rizẹf, gbe ahwo Idẹn nọ a jọ Tẹl-asa e rrọ?
13 Kọ ovie Hemat, ovie Apad, gbe ovie ikpewho Sefaveyẹm,+ avọ ọrọ Hina, gbe ọrọ Iva e rrọ?’”
14 Hẹzikaya ọ tẹ rehọ ileta na no obọ enyukọ na, o te se ai. Kẹsena Hẹzikaya ọ tẹ nya kpobọ uwou Jihova, o te rovie ai* fihọ aro Jihova.+
15 Hẹzikaya o te muhọ ẹlẹ se Jihova,+ inọ:
16 “O Jihova olori egbaẹmo,+ Ọghẹnẹ Izrẹl, ọnọ ọ keria agbara-uvie riẹ evaọ obehru* chẹrub na, whẹ ọvo họ Ọghẹnẹ uzẹme ọrọ ekwotọ-ivie kpobi nọ e rrọ otọakpọ na. Whẹ ọ ma idhiwu na gbe otọakpọ na.
17 Fi ezọ ra hotọ, O Jihova, re who yo!+ Rovie aro ra, O Jihova, re whọ ruẹ!+ Yo eme kpobi nọ Senakẹrib o vi ze te rọ poviẹ Ọghẹnẹ nọ ọ rrọ uzuazọ na.+
18 Uzẹme o ginẹ rrọ, O Jihova, inọ ivie Asiria e raha ekwotọ na kpobi+ jegbe ẹkwotọ obọrai no.
19 Yọ a gbolo eghẹnẹ rai fihọ erae no,+ keme eghẹnẹ a jọ họ rekọ iruo abọ ahwo-akpọ,+ ure gbe utho. Oyejabọ nọ a sae rọ raha ae na.
20 Rekọ enẹna, O Jihova Ọghẹnẹ mai, siwi omai no obọ riẹ re a ruẹse jọ ekwotọ-ivie kpobi nọ e rrọ otọakpọ na riẹ nọ whẹ ọvo họ Ọghẹnẹ, O Jihova.”+
21 Aizaya ọmọzae Emọz o te vi uwou nana se Hẹzikaya, inọ: “Enẹ Jihova Ọghẹnẹ Izrẹl ọ ta, ‘Fikinọ whọ lẹ se omẹ kpahe Senakẹrib ovie Asiria na,+
22 ẹme nọ Jihova ọ ta kpahe iẹe ọna:
“Ọmọtẹ-kọkọ Zayọn ọ be jẹ owhẹ kufiẹ, o bi se owhẹ ẹkoko.
Ọmọtẹ Jerusalẹm o bi nuhu uzou riẹ be hwẹ owhẹ.
23 Ono whọ poviẹ+ jẹ ta eme-aghọ kpahe na?
Ono whọ kpare uvou ra ta ẹme wọso na+Jẹ kpare aro oheri ra rri?
Rọ kpahe Ọrẹri Izrẹl!+
24 Whọ rehọ idibo ra poviẹ Jihova+ jẹ ta nọ,‘Mẹ te rehọ ekẹkẹ ẹmo ibuobu mẹRọ gadiẹ kpohọ obehru igbehru,+Kpohọ eria nọ e mai thabọ evaọ Lebanọn.
Me ti bru ire sida ilogbo riẹ fihọ otọ, emamọ ire junipa riẹ.
Mẹ te ruọ eva eria riẹ nọ i siomano nọ e mai kpehru, ewhawho riẹ nọ e mai si di.
25 Mẹ te tọ eza jẹ da ame;Mẹ te rehọ evawọ mẹ ru ito* Ijipti kpọ no.’
26 Kọ who ri ti yo? No anwọ oke krẹkri nọ u kpemu ze mẹ rọ jiroro* oware nana.+
No anwọ edẹ nọ i kpemu ze mẹ rọ ruẹrẹ iẹe* kpahe no.
Me ti ru ei gba enẹna.+
Who ti zihe ikpewho nọ a di ogba wariẹ họ* ruọ eria nọ a raha kuotọ no nọ e rrọ ofofe.+
27 A te ruẹ ohwo fiobọhọ kẹ ahwo nọ a be rria ae he;Ozọ u ti mu ai gaga, yọ a ti ru oma vuọ ae.
A te jọ wọhọ ẹbe ẹwọ gbe ẹbe ọrọrọ,Wọhọ ẹbe nọ ọ rrọ ehru uwou nọ ofou obọ ovatha-ọre ọ to no.
28 Rekọ mẹ riẹ owhẹ ziezi, mẹ riẹ okenọ whọ rẹ keria, okenọ whọ rẹ ruọ otafe, okenọ whọ rẹ ruọ eva,+Gbe okenọ who te bi mu ofu rọsuọ omẹ,+
29 Keme ofu nọ who mu kpahe omẹ+ gbe enuodo ra i do te ezọ mẹ no.+
Fikiere mẹ te jẹ oghọlọ mẹ họ unwe ra jẹ jẹ ufi-anyenya+ mẹ họ udevie igbenu ra,Mẹ vẹ te rehọ edhere nọ whọ rọ nyaze na su owhẹ zihe.”
30 “‘Onana o te jọ oka kẹ owhẹ:* Ukpe nana whọ te re eware nọ eye ọvo e dhẹ no otọ ze;* yọ evaọ ukpe avọ ivẹ whọ te re ibi ekakọ nọ e dhẹ no eyena ze; rekọ evaọ ukpe avọ esa wha te kọ ibi jẹ kọrọ, yọ wha te kọ egbọ evaene jẹ re ibi rai.+
31 Ahwo uwou Juda nọ a vabọ, enọ i kiọkọ,+ a te ta awọ fihọ otọ jẹ mọ ibi fihọ ehru.
32 Keme ikiọkotọ i ti no Jerusalẹm vrẹ, yọ enọ e zọ i ti no Ugbehru Zayọn vrẹ.+ Jihova olori egbaẹmo o ti ru onana avọ ajọwha.+
33 “‘Fikiere, enẹ Jihova ọ ta kpahe ovie Asiria:+
“Ọ te ruọ eva okpẹwho nana ha+Hayo sa ose evaọ etẹe heHayo rehọ ojese họre iẹe heHayo ma igbuhru ro koi họ họ.”’+
34 ‘Edhere nọ ọ rọ nyaze o ti ro zihe;Ọ te ruọ eva okpẹwho nana ha,’ ere Jihova ọ ta.
35 ‘Mẹ te thọ okpẹwho nana+ je siwi ei fiki odẹ mẹ+Jegbe fiki Devidi+ odibo mẹ.’”
36 Ukọ-odhiwu Jihova ọ tẹ nya, o te kpe ezae idu udhuzii-gbisoi (185,000) evaọ evuẹ ahwo Asiria. Nọ ahwo a rọwo ze evaọ irioke, a tẹ ruẹ ahwo na kpobi nọ a whu fihọ otọ.+
37 Fikiere Senakẹrib ovie Asiria ọ tẹ nyavrẹ, o te zihe kpobọ Nanivi,+ ọ tẹ jọ obei.+
38 Evaọ oke nọ o je guzou kpotọ evaọ uwou* Nisrọk ọghẹnẹ riẹ, emezae obọriẹ Adramelẹk avọ Shariza a tẹ rehọ ọgbọdọ duwu iei kpe,+ a tẹ dhẹ vabọ kpobọ ẹkwotọ Ararat.+ Isa-hadọn+ ọmọzae riẹ o te zihe ruọ ovie evaọ ẹta riẹ.
Eme-Obotọ
^ Hayo “ehọ-ẹkporo.”
^ Hayo “ehọ-ẹkporo.”
^ Hayo “ighẹ ovie.”
^ Hayo “ekela.”
^ Evaọ Hibru, “emọ na i te unu edhede na no.”
^ Evaọ Hibru, “ẹzi jọ họ oma riẹ.”
^ Evaọ Hibru, “ei.”
^ Hayo o sae jọ nọ, “udevie.”
^ Hayo “iko-ame Naele.”
^ Hayo “me ro ru ei.”
^ Hayo “e rẹ bẹ ẹvẹruọ.”
^ Evaọ Hibru, “me ro ru.”
^ Hayo “ibi nọ e va fihọ otọ nọ e dhẹ ze.”
^ Koyehọ, Hẹzikaya.
^ Hayo “etẹmpol.”
