Aizaya 3:1-26

  • Isu Juda i bi su ahwo na thọ (1-15)

  • A bruoziẹ emetẹ Zayọn nọ i bi gbe-ọfariẹ (16-26)

3  Keme rri! Jihova olori egbaẹmo, Olori uzẹme na,O bi si oghẹrẹ oware kpobi nọ o be kẹ Jerusalẹm avọ Juda uketha avọ emuore no,Oware kpobi nọ u bi fiobọhọ kẹ ai wo ebrẹdi gbe ame,+   Te ọzae ọgaga te ọgbaẹmo,Obruoziẹ avọ ọruẹaro,+ ọgbẹva avọ ọkpako,   Oletu utu ahwo udhuvẹ-gbikpe,+ ohwo ọghọ, gbe ọkiroro,*Ọgba emajiki gbe ọnọ ọ riẹ epanọ a re ru araomuomu fihọ ruru.+   Me ti fi emezae gheghe họ re a jọ ikpahwo-esuo rai,Yọ enọ i wo ẹme obọ họ* i ti su ae.   Ahwo na a ti kienyẹ ohwohwo,Ọvuọ ọrivẹ riẹ o ti kienyẹ.+ Ọmọzae ọ te họre ọkpọkuọzae,Yọ ọnọ a rri nọ o fioka ha o ti rri ọnọ a be kẹ adhẹẹ vo.+   Omomọvo o ti kru oniọvo-ọmọzae riẹ evaọ uwou ọsẹ riẹ, ọ vẹ ta nọ: “Who wo otogbo—jọ ọnọ o wuzou mai. Su oria nana nọ a raha kuotọ no na.”   Rekọ evaọ ẹdẹ yena ọ te se inọ: “Mẹ rẹ jọ ọnọ ọ rẹ rẹrote omola rai* hi;Me wo emuore hayo iwu evaọ uwou mẹ hẹ. Wha fi omẹ họ ọnọ o wuzou ahwo na ha.”   Keme Jerusalẹm o zoruẹ no,Yọ Juda o kie no,Fikinọ a be rọ ẹmeunu gbe iruẹru rai rọ wọso Jihova;A be wọso evaọ iraro ọnọ o wo oruaro na.*+   Oghẹrẹ nọ a ru ovao rai u bi se isẹri kpe ai,Yọ a bi woro uzioraha rai wọhọ ahwo Sọdọm;+A be tubẹ ko ẹe dhere dede he. Uye u te ae, keme a bi si okpẹtu se omobọ rai! 10  Ta kẹ ikiẹrẹe na nọ eware e te riẹ nya kẹ ae;A te hwa ae osa eware nọ a bi ru.*+ 11  Uye u te ohwo omuomu na! Okpẹtu o ti tei,Keme epanọ ọ rehọ abọ riẹ ru a ti ru ei re! 12  Rọ kpahe ahwo mẹ, ahwo nọ a be kẹ ai iruo a be lahiẹ ae,Yọ eyae họ enọ i bi su ae. Ahwo mẹ, isu rai e be lẹliẹ owhai ghoro,Yọ a bi ru nọ wha gbẹ be riẹ edhere nọ wha rẹ nya ha.+ 13  Jihova o bi dikihẹ ẹta riẹ re o gu ẹkẹ unu riẹ;O bi dikihẹ re o bruoziẹ ahwo. 14  Jihova o ti lele ekpako gbe ikpahwo-esuo ahwo riẹ gu ẹdhọ. “Wha mahe ọgbọ evaene na no,Yọ oware nọ wha tho mi oyogbe o rrọ iwou rai.+ 15  Ono ọ kẹ owhai udu inọ wha pẹhẹ ahwo mẹJe wuhu ovao iyogbe na evaọ otọ na?”+ ere Olori nọ Ọ Mai Kpehru na, Jihova olori egbaẹmo ọ ta. 16  Jihova ọ ta nọ: “Fikinọ emetẹ Zayọn i wo omorro,Be nya kpare ovao* rai wha,*Be rehọ ibiaro rai lẹliẹ ahwo, be nya gọlọ,Be rehọ ifiare nọ a gba fihọ awọ ru edo, 17  Jihova ọ te rọ emẹvorẹ* tehe uzou emetẹ Zayọn,Yọ Jihova o ti ru aruezo rai jọ rioriorio.+ 18  Evaọ ẹdẹ yena Jihova o ti si erru emero ekwawọ rai no,Te eware nọ a rẹ rọ gba uzou gbe ifiare nọ a ru wọhọ ọvẹre nọ ọ kpahe obọ,+ 19  Te emero-ezọ,* ifiare-abọ, gbe iveli,* 20  Te itu uzou, ifiare awọ, gbe egbivie,*Te emekpe idẹ nọ i re gbo ore awere gbe ibi ifiare ohawha, 21  Te emero iziabọ gbe emero unwe, 22  Te iwu ithethei nọ a re ro ru ehaa, iwu ehru, itogbo, gbe emekpa usiobọ, 23  Ighẹgbe obọ+ gbe iwu ohọ-olọlọhọ,*Itu-udhọfọ gbe iveli.* 24  Viukpọ ewhri balsam,+ kọ ore ugbogbo o te jariẹ;Viukpọ umueku, kọ ufi;Viukpọ eto nọ a me wowoma, kọ uzou nọ o fa eto no;+Viukpọ iwu eghaghae, kọ iwu ehọ-ekpa;*+Viukpọ erru, kọ oma nọ a rọ oware orrorro ka oka họ. 25  Ọgbọdọ a ti ro kpe ezae nọ e rrọ eva ra,Je kpe ezae egaga ra evaọ ẹmo.+ 26  Eria nọ a rẹ rọ ruọ ẹe eva e te viẹ je weri,+Yọ ọ te keria otọ ababọ.”+

Eme-Obotọ

Hayo “ọkohrẹ.”
Hayo “enọ e rẹ jiroro ọvo dhobọ họ.”
Hayo “osiwi rai.”
Evaọ Hibru, “evaọ ibiaro oruaro riẹ.”
Evaọ Hibru, “a te re ibi nọ i no iruẹru rai ze.”
Evaọ Hibru, “izou.”
Evaọ Hibru, “avọ uriohọ (uvou) rai nọ a rriẹ fihọ.”
Hayo “evrọrọ.”
Hayo “ibi ifiare.”
Ohọ ovrovro nọ a sai ro ruru uzou, ovao, hayo rọ whaliẹ oma.
Hayo “ewẹ-ohọ ithethei nọ a rẹ rọ gba eku hayo whaliẹ oma.”
Hayo “iwu otọ-oma.”
Ohọ ovrovro nọ a sai ro ruru uzou, ovao, hayo rọ whaliẹ oma.
Hayo “ehọ-ẹkporo.”