Aizaya 35:1-10
35 Udhude na avọ otọ oyaya na e te wereva,+Yọ udhude opraprara na o te ghọghọ jẹ whẹ idodo họ wọhọ ododo safrọn.*+
2 O te siọ idodo ba ẹwhẹhọ họ;+O te ghọghọ je bo ubo oghọghọ.
A te rehọ oruaro Lebanọn kẹe,+Te erru Kamẹl+ avọ ọrọ Sharọn.+
A te ruẹ oruaro Jihova, erru Ọghẹnẹ mai.
3 Ru abọ nọ e ga ha na ga,Je ru ighilawọ nọ i bi nuhu na dikihẹ ga.+
4 Ta kẹ enọ e be jọ udu ruawa nọ:
“Wha kru oma ga. Jọ ozọ u mu owhai hi.
Rri! Ọghẹnẹ rai ọ te nyaze ti ru orukele,Ọghẹnẹ ọ te nyaze te hwosa eware iyoma nọ ahwo a ru.+
Ọ te nyaze ti siwi owhai.”+
5 Evaọ oke yena, ibiaro enọ i tuaro i ti rovie,+Ezọ enọ i diezọ i ti yo ẹme.+
6 Evaọ oke yena, ọmo o ti duola wọhọ orua,+Yọ ẹrọo ọnọ o dienu o ti bo ubo oghọghọ.+
Ame ọ te va no udhude na ze,Yọ iko-ame e te jọ udhude opraprara.
7 Otọ nọ o ya fia kokoroko o ti zihe ruọ ẹtẹre-ame nọ ikpoko* e rrọ,Yọ otọ nọ ame ọ rrọ họ o ti zihe ruọ eyeri-ame.+
Ẹbe ọrọrọ gbe ikpoko* gbe agẹ-ethẹE te jọ ighogho nọ ikozi e jẹ hae wezẹ.+
8 Edhere ologbo jọ ọ te jọ etẹe,+Ẹhẹ, edhere nọ a se Edhere Ọrẹri.
Ohwo nọ ọ fo ho ọ te nyae he.+
A ruẹrẹ e riẹ kpahe kẹ ọnọ ọ be nya evaọ edhere na;Uvumọ ohwo ogheghẹ o ti ghoro ruọ ẹe eva ha.
9 Uvumọ okpohrokpo ọ te jọ etẹe he,Yọ uvumọ erao ijihẹ e te ruọ ẹe eva ha.
A te jọ etẹe ruẹ e rai hi;+Enọ a wariẹ dẹ zihe ze na ọvo e te nya etẹe.+
10 Enọ Jihova ọ ta no igbo i ti zihe ze,+ a vẹ ziọ Zayọn avọ ubo oghọghọ.+
Oghọghọ nọ u wo ekuhọ họ o te wariẹ uzou rai họ.+
A te wereva jẹ ghọghọ,Yọ uweri gbe unuofiẹ e te dhẹ no.+
