Aizaya 14:1-32
14 Keme Jihova ọ te re ohrọ Jekọp,+ yọ ọ te wariẹ salọ Izrẹl.+ O ti fi ae họ* ẹkwotọ rai,+ yọ erara nọ e be rria udevie rai i ti kuomagbe ai jẹ talamu uwou Jekọp.+
2 Ahwo a te rehọ ae, a vẹ rehọ ae ziọ oria obọrai, a vẹ te jọ idibo-emezae gbe idibo-emetẹ+ kẹ uwou Izrẹl evaọ ẹkwotọ Jihova; yọ a ti mu ahwo nọ a jọ erigbo kẹ vẹre, ahwo nọ a jẹ gba ae họ ru iruo vẹre* a vẹ te jọ otọ rai.
3 Evaọ ẹdẹ nọ Jihova o te ru edada ra gbe awaọruọ ọgaga ra serihọ no, je si owhẹ no igbo nọ a be jọ rọ uye ogaga bẹ owhẹ no,+
4 who ti bru ohare nana kpahe ovie Babilọn:*
“Rri oghẹrẹ nọ ọnọ ọ be gba amọfa họ ru iruo* o ro ku uzuazọ họ!
Rri oghẹrẹ nọ okienyẹ na o ro kuhọ no!+
5 Jihova o wiri ọkpọ ahwo omuomu na no,Ubiọkpọ isu na,+
6 Ọnọ ọ be rọ ofu bọwo ahwo ego ababọ eriosehọ,+Ọnọ ọ be rọ evedha su erẹwho avọ ukpokpoma nọ u bi kuhọ họ.+
7 Otọakpọ na soso o wo omofọwẹ no enẹna, o gbe wo ukpokpoma ha.
Ahwo a bi bo ubo oghọghọ.+
8 Makọ ire junipa dede e be ghọghọ fiki ra,Te ire sida obọ Lebanọn.
A be ta nọ, ‘Anwẹnọ who ro kie na,Obru-ire ọvo ọ re gbẹ nyaze ti bru omai hi.’
9 Makọ Uki* nọ o rrọ obotọ dede u duwukuNọ a ruẹ owhẹ evaọ etẹe.
Fiki ra, ọ rọwo enọ i whu no nọ i wo ogaga ha kpama,Isu okienyẹ* otọakpọ na kpobi.
O ru ivie erẹwho na kpobi kpama no egbara-uvie rai.
10 Aikpobi a te mu ẹme họ ẹta, be ta kẹ owhẹ nọ,‘Kọ who zihe ruọ ọnọ o wo ogaga ha no wọhọ omai?
Kọ whẹ wọhọ omai no?
11 A rehọ omorro ra ziọ obọ Uki* no,Te edo ekpata-ifi ra.+
Ihoi e ruẹrẹ oma họ obotọ ra wọhọ ehwa,Ezazọ* who ro wowo.’
12 Rri epanọ who kie no obọ odhiwu ze,O ọnọ o bi lo, ọmọzae oke nọ o ke no!
Rri epanọ a gbẹre owhẹ kie fihọ otọakpọ,Whẹ ọnọ ọ raha erẹwho muotọ!+
13 Whọ jọ udu ra ta nọ, ‘Mẹ te gadiẹ kpobọ idhiwu na.+
Mẹ te kpare agbara-uvie mẹ kpobọ ehru vi isi Ọghẹnẹ,+Yọ mẹ te keria ehru ugbehru ẹgwae,Evaọ abọ nọ ọ mai thabọ evaọ obọ ẹkpẹlobọ ovatha-ọre.+
14 Mẹ te nya kpehru vi obọ ehru ẹgho na;Me ti ru omamẹ tho Ọnọ Ọ Mai Kpehru na.’
15 Ukpoye, a te rehọ owhẹ ziọ obọ Uki,*Ziọ obonọ ọ mai kodo evaọ ọgọdọ na.
16 Ahwo nọ a be ruẹ owhẹ a te tẹrovi owhẹ;A te romatotọ rri owhẹ, yọ a be nọ nọ,‘Kọ ọzae nọ o je nuhu akpọ na ọna,Ọnọ o je ru ekwotọ-ivie nuhu na,+
17 Ọnọ o ru otọakpọ na jọ wọhọ udhude naJe fi ikpewho riẹ kparobọ na,+Ọnọ ọ rọwo siobọno ahwo uwou-odi riẹ kpo ho na?’+
18 A ki ivie erẹwho efa kpobiEmamọ ekio, ẹhẹ, aikpobi,Omomọvo rai ọ rrọ eva uki* obọriẹ.
19 Rekọ a gbolo owhẹ kufiẹ ababọ uki nọ a ki owhẹ fihọ,Wọhọ okakọ* nọ u bi tu ohwo oma,Ọnọ ọ rehọ ahwo nọ a rọ ọgbọdọ duwu kpe gọ ẹgọ,Enọ i re kpobọ ọgọdọ nọ itho e vọ,Wọhọ ori nọ a thihi nyaotọ.
20 Who ti kuomagbe ae evaọ uki hi,Keme whọ raha ẹkwotọ obọra,Who kpe ahwo obọra.
A gbe ti se odẹ emọ irumuomu ofa vievie he.
21 Wha ruẹrẹ oria nọ a te jọ kpe emezae riẹ họFiki abe-ọriọ esẹ-esẹ rai,Re a gbẹ kparoma ze jẹ rehọ otọakpọ na no hoA vẹ bọ ikpewho rai vọ ẹkwotọ na.”
22 “Mẹ te kparoma wọso ae,”+ ere Jihova olori egbaẹmo ọ ta.
“Yọ me ti voro odẹ, ikiọkotọ, ahwo uyẹ, gbe oge obaro no Babilọn,”+ ere Jihova ọ ta.
23 “Me ti ru Babilọn fihọ oria nọ ivuẹ e be rria gbe ubrotọ nọ ame avọ ọloho ọ rrọ, yọ mẹ te rehọ uhwere ọraha muotọ ro hwere iei,”+ ere Jihova olori egbaẹmo ọ ta.
24 Jihova olori egbaẹmo o duwu iyei no inọ:
“Nwane wọhọ epanọ mẹ gwọlọ na, ere o te via,Yọ nwane wọhọ epanọ mẹ jiroro na, ere o te via dẹẹ.
25 Mẹ te pẹhẹ ohwo Asiria nọ ọ rrọ ẹkwotọ mẹ na no,Yọ me ti thihi ei evaọ ehru igbehru mẹ.+
Me ti si owhowha riẹ no oma ahwo mẹ,Yọ me ti si owha riẹ no ẹkoko rai.”+
26 Onana họ oware nọ ọ jiroro riẹ no* inọ o ti ru otọakpọ na soso,Yọ onana họ obọ nọ o rriẹ fihọ rọsuọ* erẹwho na kpobi.
27 Keme Jihova olori egbaẹmo ọ jiroro no,Kọ ono ọ rẹ sae raha iẹe?+
Obọ riẹ o rriẹ fihọ,Kọ ono ọ rẹ sai kpiri ei zihe?+
28 Evaọ ukpe nọ Ehaz ovie na o ro whu,+ a whowho ovuẹ nana:
29 “Who du ghọghọ họ, Filistia, ohwo ọvo evaọ usu rai o du ghọghọ họ,Fikinọ a wiri ubiọkpọ ọnọ ọ be fa owhai na no.
Keme araomuomu+ nọ o wo obi o ti no uyẹ araomuomu na ze,+Yọ ọmọ riẹ ọ te jọ araomuomu nọ o wo erae nọ ọ be rra.*
30 Emọ ọsosuọ iruori na e te re eva vọYọ iyogbe i ti kiẹzẹ avọ omofọwẹ,Rekọ mẹ te rọ ohọo kpe uyẹ ra no,Yọ a ti kpe ahwo ra nọ a kiọkọ no.+
31 Kuenu oviẹ, O unuẹthẹ! Bo via, O okpẹwho!
Udu u ti no owhai kpobi awọ, O Filistia!
Keme iwiri jọ i bi no obọ ẹkpẹlobọ ovatha-ọre ze,Yọ ohwo ọvo o bi sienẹ họ emu evaọ usu itu ẹmo riẹ hẹ.”
32 Ẹvẹ u fo nọ a re yo kẹ enyukọ orẹwho na?
A ti yo kẹ ae nọ Jihova ọ wọ otọhotọ Zayọn họ no,+Gbe nọ iruori nọ e rrọ usu ahwo riẹ a te dhẹ ruọ eva riẹ.
Eme-Obotọ
^ Hayo “O ti ru ai wo omofọwẹ evaọ.”
^ Hayo “enọ i je dhe iruo kẹ ae.”
^ Hayo “who ti se ovie Babilọn ẹkoko nana.”
^ Hayo “ọnọ o re dhe iruo kẹ ahwo na.”
^ Evaọ Hibru, “Ikri.”
^ Hayo “Edha.”
^ Evaọ Hibru, “uwou.”
^ Hayo “ogha ure.”
^ Evaọ Hibru, “ẹjiroro nọ ọ jiroro riẹ no.”
^ Hayo “o ruẹrẹ oma kpahe re o kpe.”
^ Hayo “araomuomu nọ o wo obi nọ o bi vo.”
