Aizaya 46:1-13
46 Bẹl o ruwẹ,+ Nibo o zulẹ.
A wọ emedhọ rai fihọ ehru erao, ehru erao nọ e rẹ wọ owha,+Wọhọ owha nọ o be bẹ erao nọ oma o rrọ no.
2 A zulẹ je ruwẹ kugbe;A rẹ sai siwi ewha* na ha,Yọ ae omarai a bi kpohọ igbo.
3 “Gaviezọ kẹ omẹ, O uwou Jekọp, gbe owhai enọ i kiọkọ kpobi evaọ uwou Izrẹl,+Whai enọ mẹ be rẹrote anwọ okenọ a ro yẹ owhai, jẹ be wọ anwọ okenọ wha ro no obọ edhede ze.+
4 Bẹsenọ whọ rẹ who, mẹ te gbẹ jọ epọvo na;+Bẹsenọ eto ra e rẹ fo no, mẹ te gbẹ wọ owhẹ wọhọ owha.
Wọhọ epanọ me ru no vẹre, mẹ te rehọ owhẹ no oria ruọ oria, wọ owhẹ wọhọ owha je siwi owhẹ.+
5 Ono wha rẹ sae rehọ omẹ dhesẹ hayo ru omẹ avọ iẹe jọ ẹrẹrẹe hayo rehọ omẹ wawo,+Nọ ma re ro tho ohwohwo?+
6 Ahwo jọ a riẹ nọ a re mu raha igoru nọ e rrọ ẹmẹkpa-ugho rai;A rẹ wawọ isiliva na evaọ iskeli.
A rẹ rehọ odhogu iruo, o ve duwu iei ro ru ọghẹnẹ.+
Kẹsena a ve bi kiẹzẹ vovao tuotọ kẹe, ẹhẹ, a vẹ be gọe.*+
7 A rẹ wọe fihọ ikoko rai;+A vẹ rọ ere wọe fihọ oria riẹ, ọ vẹ jọ etẹe ọvo.
O re no oria nọ a wọ riẹ fihọ na ha.+
A re bo sei, rekọ ọ rẹ kpunu hu;Ọ rẹ sai siwi ohwo ọvo no uye he.+
8 Wha kareghẹhọ onana re wha kru udu ga.
Wha sei te udu, whai erahaizi.
9 Kareghẹhọ eware nọ e vrẹ no* evaọ oke krẹkri nọ u kpemu,Inọ mẹ họ Ọghẹnẹ, yọ ọfa ọ rrọ họ.
Mẹ họ Ọghẹnẹ, yọ ohwo ọvo nọ ọ wọhọ omẹ ọ rrọ họ.+
10 Evaọ obọ emuhọ mẹ rẹ jọ ta oware nọ u ti no oware ze,Yọ anwọ oke krẹkri nọ u kpemu mẹ rọ ta eware nọ a ri ti ru hu.+
Mẹ ta nọ, ‘Iroro nọ mẹ jẹ no i re dikihẹ,*+Yọ me re ru oware kpobi nọ o were omẹ.’+
11 Me bi se ọvra nọ o re kpe erao no obọ ovatha-ọre ze,+Ẹkwotọ ugbothabọ me bi se ọzae nọ o ti ru ẹjiroro mẹ gba no ze.+
Mẹ ta riẹ no, yọ me ti ru ei.
Mẹ jiroro riẹ no, yọ me ti ru ei gba re.+
12 Wha gaviezọ kẹ omẹ, whai enọ i wo udu ogaga,Whai enọ i thabọ no ẹrẹreokie.
13 Mẹ rehọ ẹrẹreokie mẹ ze kẹle no;O thabọ họ,Yọ esiwo mẹ ọ te raha oke he.+
Mẹ te kẹ esiwo evaọ Zayọn, jẹ rehọ erru mẹ kẹ Izrẹl.”+
Eme-Obotọ
^ Koyehọ, emedhọ nọ a wọ fihọ ehru erao na.
^ Evaọ Hibru, “a ve guzou kpotọ kẹe.”
^ Evaọ Hibru, “eware ọsosuọ.”
^ Hayo “Ẹjiroro mẹ o re dikihẹ.”