Raica sara na lewena

RA TAROGA NA ITABAGONE

Meu Papitaiso?​—Wase 1: Na iBalebale ni Papitaiso

Meu Papitaiso?​—Wase 1: Na iBalebale ni Papitaiso

E veiyabaki era dau papitaiso e levu na itabagone era susu ena vuvale iVakadinadina i Jiova. Vakacava o vakasamataka tiko mo papitaiso? Ena vinakati mada mo kila na ibalebale ni yalayala kei na papitaiso.

 Na cava na papitaiso?

Na papitaiso e tukuni ena iVolatabu e kena ibalebale meda tabadromuci ena wai, e sega ni kena vakamiriki wale ga na wai. E bibi sara na kena ibalebale.

  • Nomu tabadromuci ena wai, o sa vakaraitaka e matanalevu ni o sa sega ni qai vakaliuca na ka o vinakata.

  • Nomu lamata mai wai, e vakaraitaka ni o sa tekivutaka e dua na ivakarau ni bula vou mo cakava na ka e vakamarautaka na Kalou.

Ni o papitaiso, o sa vakaraitaka e matanalevu ni dodonu me lewa ga o Jiova na ka e donu, kei na ka e cala. O sa vakaraitaka tale ga e matanalevu, ni o sa yalataka oti vei Jiova mo cakava na ka e vinakata.

Vakasamataka mada: Na cava mo vakaraitaka kina e matanalevu ni o sa vakatulewataka mo talairawarawa vei Jiova ena nomu bula taucoko? Raica na 1 Joni 4:19 kei na Vakatakila 4:11.

 Na cava na yalayala?

Ni bera ni o papitaiso, e dodonu mo yalataka mada nomu bula vei Jiova. O na cakava vakacava qori?

O iko sara ga vakataki iko mo masu vei Jiova, mo tukuna vua ni o sa yalataka mo qaravi koya me tawamudu. O na cakava tale ga na ka e vinakata se mani cava e yaco, se mani cava tale ga era vakatulewataka eso tale.

Na papitaiso e vakaraitaka e matanalevu na yalayala qori. Era na kila kina eso tale ni o sa sega ni qai lewai iko, o sa nei Jiova.—Maciu 16:24.

Vakasamataka mada: E vakavinakataki vakacava noda bula nida nei Jiova? Raica na Aisea 48:17, 18 kei na Iperiu 11:6.

 Na cava e bibi kina meda papitaiso?

O Jisu sara ga e kaya ni dodonu mera papitaiso na nona tisaipeli. (Maciu 28:19, 20) Kena ibalebale, e vinakati vei ira na lotu vaKarisito mera papitaiso. E kaya mada ga na iVolatabu nida na vakabulai kina.—1 Pita 3:21.

Ia e dodonu me inaki ni nomu papitaiso na nomu lomani Jiova, kei na nomu vakavinavinakataka na ka e cakava. Me duavata na nomu rai kei na ka e vola na daunisame: “Na cava au na dolea vei Jiova ena vuku ni veika vinaka kece sa cakava vei au? . . . Au na qai kaciva na yaca i Jiova. Au na vakayacora na noqu bubului vei Jiova.”—Same 116:12-14.

Vakasamataka mada: Na ka vinaka cava sa cakava vei iko o Jiova? O na sauma lesu vakacava vua? Raica na Vakarua 10:12, 13 kei na Roma 12:1.