Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Na Cava Meu Veivuke Kina?

Na Cava Meu Veivuke Kina?

 Rua na ka bibi era lecava e levu

Ka bibi #1: Ni o soli ka, ena rawa ni saumi tale vei iko!

Ena laurai ni o dau lomasoli. De dua era na rawa ni lomasoli vei iko. E kaya na iVolatabu:

  • “Moni dau soli ka, ena qai soli vei kemuni. . . . Na ivakarau oni vakarautaka ena vakarautaki tale vei kemuni.”​—Luke 6:38.

  • “Na ivakarau o vakayacora ena vakayacori tale vei iko.”​—Luke 6:38, Contemporary English Version.

Ka bibi #2: Ni o veivuke, o sa vukei iko tiko!

Ni o caka vinaka ena vakalevutaka nomu veidokai, o na vakila tale ga na lomavakacegu e vu mai na soli ka. E kaya na iVolatabu:

  • “E marau vakalevu o koya e solia na ka, vakalailai o koya e taura na ka.”​—Cakacaka 20:35.

  • “Ni o vakarautaka na magiti, sureti ira na dravudravua, na lokiloki, na gera, kei na mataboko. O na marau ni sega vei ira na ka mera sauma vei iko.”​—Luke 14:13, 14.

 Ira na itabagone dau kauai

Era tiko na itabagone dau kauai! Raica mada eso na ivakaraitaki.

E kaya o Casey, e dua na goneyalewa yabaki 14, “Ena so na gauna niu via dabe meu sara retioyaloyalo, au dau vakasamataki Na kei Ta ni rau cakacaka tiko, rau na oca ni rau lesu mai vale. Au mani tucake, au sava veleti, au sasamaki. Au vakarautaka tale ga na kofi ni rau taleitaka. Ni yaco mai vale o Na, ena kaya, ‘U, totoka sara ga na vanua qo! E boivinaka tale ga. Vinaka vakalevu, noqu lewa!’ Au dau marau ni cakava na ka vinaka va qori vei Na kei Ta.”

E kaya o Holly, e dua na goneyalewa yabaki 22, “Rau dau tokoni au na noqu itubutubu, rau vakarautaka na ka kece au gadreva. Ni leqa na motoka ena yabaki sa oti, au vola sara e dua na jeke me vakavinakataki kina, qori e dua na ilavo levu. E macala ga ni rau sega ni vinakata meu sauma, ia e dreve nodrau sasaga. Qori e lailai wale ni vakatauvatani kei na levu ni ka erau cakava. Au marau niu lomasavu, meu solia vei rau e dua na ka.”

O bau kila? Era marau e levu na itabagone iVakadinadina i Jiova nira veivuke mera veivakavulici ena iVolatabu. Era toki eso ena vanua e vinakati kina vakalevu na veivakavulici ena iVolatabu.

E kaya o Evan, e dua na gonetagane yabaki 20, “Au biuti Merika meu toki i Mexico meu veitokoni ena veivakavulici ena iVolatabu. E ka ni sasaga toka ena so na gauna meu solia na ilavo se so tale na ka, ni lailai na ka e tu vei au. Ia au raica niu solia noqu gauna kei na igu ena cakacaka vakaitalatala, e marautaki vakalevu mai na noqu soli ka vakayago.”

 Au na veivuke vakacava?

O via vakila na marau ni o veivuke? Qo e vica na vakatutu.

Vukea nomu vuvale:

  • Ke o sega ni kerei, vakacava mo sasamaki, sava veleti, se samaka na rumu

  • Vakasaqa

  • Vola e dua na ivola ni vakavinavinaka vei rau na nomu itubutubu

  • Vukei tacimu ena nona ka ni vuli

Veivuke ena taudaku ni vuvale:

  • Vakau ivola vua e dua e tauvimate

  • Samaka nona lomanibai e dua na itabaqase

  • Sikova e dua sa tu ga e vale

  • Voli iloloma vua e dua e sotava tiko na ka dredre

iVakasala: Vakatura eso na ka o nanuma. Me nomu isausau mo vukea e dua ena macawa qo. O na rawa ni kurabuitaka na levu ni nomu marau!

E kaya o Alena, sa yabaki 16, “O na marau ni o veivuke. O kila ni o sa cakava rawa e dua na ka, o qai raica nira marautaka. O na taleitaka mo cakava qori dina mada ni o nanuma ni na sega ni rawa. E vaka ga ni o sega ni vakauai iko, ni levu sara na ka o rawata kina.”