Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Na Cava Meu Cakava Niu Tauvimate?—Wase 2

Na Cava Meu Cakava Niu Tauvimate?—Wase 2

E duidui na mate.

  • Eso e laurai na kena ivakatakilakila e yagoda, eso tale e vakilai e lomada.

  • Eso na mate e oti totolo, eso tale e balavu qai mosimosi.

  • Eso e rawa ni wali se qaravi, eso tale e bibi, e rawa ni tinia ga o mate.

E levu na mate qori e tauvi ira na itabagone. O na wilika ena ulutaga qo na nodratou ivakaraitaki e va na itabagone eratou tauvimate. Ke o tauvimate tiko, ena rawa ni uqeti iko na nodratou ivakamacala.

 GUÉNAELLE

E dredre sara ga meu ciqoma ni vakaiyalayala na ka au rawata. Au via cakava e levu na ka, ia ena vakatau qori ena kequ ituvaki ena dua na siga.

E tauvi au na mateniua (motor-neuromuscular disorder) e tarova na kena vakauitukutuku ina veitikiniyagoqu na noqu mona. Ena so na gauna e dau ninini se mate eso na tikiniyagoqu mai uluqu ina qeteqeteniyavaqu. E dredre meu cakava eso na cakacaka rawarawa, me vaka na veitosoyaki, vosa, wilivola, se kilai ira eso tale. Ni sa qai dredre tiko ga na noqu itosotoso, era dau mai masu vata kei au na qase ni ivavakoso au lewena. Au vakila sara ga na vakacegu.

Se mani veivakatovolei cava au sotava, au vakila ni dau tokoni au na Kalou o Jiova. Au sega ni vinakata me tarova na kequ mate na noqu qaravi koya mai vu ni lomaqu. Au vakaliuca mera vukei eso tale mera kila na ka e yalataka na iVolatabu me baleta na parataisi ena vakarautaka na Kalou o Jiova e vuravura, ena oti kina vakadua na rarawa.​—Vakatakila 21:1-4.

Mo vakasamataka: Sala cava o na vakatotomuri Guénaelle kina mo dau veinanumi?​—1 Korinica 10:24

 ZACHARY

Niu yabaki 16, e tauvi au na kenisa ni mona. Era kaya vei au na vuniwai ni sa vo ga vei au e walu na vula. Au vosota tiko na kequ mate me tekivu mai na gauna qori.

Na vanua e tiko kina na vuce ena noqu mona e vakavuna me mate na yasaqu imatau. Niu sega ni taubale rawa, ena dua me tiko vata kei au e vale me vukei au ena noqu veitosoyaki.

Na bi ni kequ mate e vakadredretaka meu vosa vakamatata. Niu se gone au dau taleitaka na vakasisisi e delaniwai, basketball, kei na volleyball. Niu iVakadinadina i Jiova, au dau gu ena cakacaka vakavunau. Vaka vei au, e levu era sega ni kila vinaka na kequ ituvaki, niu sa sega ni cakava rawa na ka au dau taleitaka.

E veivakayaloqaqataki na ka e tukuni ena Aisea 57:15, e vakadeitaka vei au ni dau tokoni ira na “yalolailai” na Kalou o Jiova qai kauaitaki au. E yalataka tale ga na Kalou o Jiova ena Aisea 35:6, niu na taubale tale au qai qaravi koya ena bula vinaka.

E dredre ena so na gauna meu vosota na kequ mate, ia au vakadeitaka ni tokoni au tiko ga o Jiova. Niu masu e tiko e dua meu vosa vua niu yalolailai, seu leqataka na noqu bula. E sega na ka me tawasei au mai na loloma i Jiova.​—Roma 8:39.

E vakacegu o Zachary ni sa yabaki 18, ni oti e rua na vula nona vakatarogi. E dei tu ga nona vakabauta me baleta na vosa ni yalayala ni Kalou me baleta na veivakaturi ena vuravura parataisi.

Mo vakasamataka: Me vakataki Zachary, e yaga vakacava na masu mo tiko ga kina ena loloma ni Kalou?

 ANAÏS

Niu se gone dramidrami e tauvi au na mate ni mona, e vakavuna me malumalumu na yagoqu kece, vakabibi na yavaqu.

Nikua, au rawa ni taubale ga vakalekaleka niu vakaititoko, ia levu na gauna au vakayagataka na idabedabe qiqi. Dau tadre tale ga na noqu masela e vakadredretaka meu cakava eso na cakacaka rawarawa me vaka na volavola.

Io e sega ni rawarawa toka na noqu qaravi vakavuniwai. Vakavica ena loma ni macawa meu dau vakaukaua yago kei ira na kenadau. Niu se qai yabaki lima e caka vei au na imatai ni veisele levu, me yacova mai qo sa oti tale e tolu. E sega ni rawarawa vei au na iotioti ni rua na veisele, ni tolu na vula noqu biubiu tu mai vale.

Dua na ka nodratou veitokoni noqu vuvale. Ni keitou dau veidredrevaki, e vakaseavutaka noqu yalolailai. E dau kauaitaka o Na kei rau na taciqu me vinaka tu ga na kequ irairai. E ca sara ga vei au niu sega ni dara rawa na ivava titeqe. Au a saga meu dara niu se gone, oya niu dara e ligaqu au qai qasi wavoki e vale, dua na ka na kena lasa vei keitou!

Au saga me kua ni vakayalolailaitaki au na kequ mate. Au mani vulica eso tale na vosa. Sa dredre meu vakatokaua (surf) se vakasisisi ena ucacevata, ia au se rawa ni qalo. Niu iVakadinadina i Jiova, au taleitaka meu lako ena cakacaka vakavunau meu wasea na noqu vakabauta. E vaka mera vakarorogo vinaka e levu niu dau vosa vei ira.

Rau se vakavulica makawa vei au na noqu itubutubu, ni na lekaleka wale ga na kequ ituvaki. Tekivu mai na gauna qori, au saga me dei na noqu vakabauti Jiova kei na nona vosa ni yalayala me vakaotia na rarawa kece, wili kina na noqu. Qori e vakayaloqaqataki au meu toso tiko ga.​—Vakatakila 21:3, 4.

Mo vakasamataka: Me vakataki Anaïs, na cava o rawa ni cakava me kua ni ‘vakayalolailaitaki’ iko kina na kemu mate?

 JULIANA

E tauvi au e dua na mate mosimosi ena rawa ni vakaleqa na utoqu, noqu yatevuso, kei na noqu dra. Ia qo sa vakaleqa tiko noqu ivi.

Niu se qai yabaki tini, e tauvi au na matenikuli na lupus, e mate mosi, au oca, e veiveisau na ivakarau ni lomaqu. Ena so na gauna, au nanuma ni sega na betequ.

Niu yabaki 13, e lako mai vale e dua na iVakadinadina. E wilika vei au na Aisea 41:10, e kaya kina o Jiova: “Mo kua ni rere niu tokoni iko . . . Au na tokoni iko ena ligaqu imatau daudina.” Au mani vulica na iVolatabu kei ira na iVakadinadina i Jiova. Me yacova mai nikua sa walu na yabaki noqu qarava na Kalou ena lomaqu taucoko, au vakadeitaka sara ga me kua ni lewai au na kequ mate. Au vakila ni solia vei au o Jiova na “kaukaua e uasivia na kaukaua ni tamata,” me donu tiko ga kina na noqu rai.​—2 Korinica 4:7.

Mo vakasamataka: E uqeti iko vakacava na Aisea 41:10 me donu tiko ga nomu rai me vakataki Juliana?