Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Cava me Vulici Kina e Dua Tale na Vosa?

Cava me Vulici Kina e Dua Tale na Vosa?

Ena vakatovolei nomu yalomalua kei na yalomalumalumu ni o vulica e dua tale na vosa. Vakacava e yaga na sasaga qori? Levu na itabagone era vakadinata ni yaga dina na sasaga qori. Na ulutaga qo ena vakamacalataka na vuna era cakava kina.

  • Na cava era cakava kina?

  • Na ituvaki dredre cava e sotavi kina?

  • Na cava ena rawati kina?

  • Ka era kaya nomu icaba

Na cava era cakava kina?

Levu era vulica e dua tale na vosa baleta ni tiki ni lesoni e koronivuli. Eso tale e nodra isausau sara ga mera vulica e dua tale na vosa. Kena ivakaraitaki:

  • O Anna mai Ositerelia, e via vulica na vosa vakaLatvia na vosa ni sucu nei tinana. E tukuna o Anna: “Keitou lalawataka vakavuvale me keitou gade i Latvia, au vinakata sara ga me’u vosa vei ratou na wekaqu e kea ena nodratou vosa ga.”

  • O Gina, e dua na iVakadinadina i Jiova e Merika, e vulica na vosa vagalu ni Merika (ASL), qai toki i Belize me vakarabailevutaka nona veiqaravi vakaitalatala. E kaya: “O ira na galu era na veimaliwai ga vakalevu kei ira era veikilai vosa, ia dua na ka nodra kurabui niu vulica na vosa vagalu ni Merika, meu rawa ni vakavulica na iVolatabu ena nodra vosa ga!”

O bau kila? Na iVolatabu e parofisaitaka ni na kacivaki na itukutuku vinaka ni Matanitu ni Kalou ena “veimatanitu, na veiyavusa kei na duivosavosa.” (Vakatakila 14:6, ivakamacala e ra) E dina na parofisai qori vei ira e levu na itabagone iVakadinadina i Jiova nira vakarabailevutaka nodra cakacaka vakaitalatala ena nodra vanua se dua tale na vanua nira vulica e dua tale na vosa.

Na ituvaki dredre cava e sotavi kina?

E kaya e dua na itabagone o Corrina: “Au nanuma ni vulici ga na vosa vou, ia e vauci kina na vulici ni itovo vakavanua kei na nodra ivakarau ni rai. Ia ena taura na gauna na vulici ni dua na vosa vou.”

Ena vinakati na yalomalumalumu. E kaya o James e dua na itabagone e vulica na vosa vakaSipeni: “E lasa na vulici ni vosa vou, baleta ena levu nomu cala. Ia qori e tiki kece ni vuli.”

Kena dina: Ena totolo ga nomu vulica e dua tale na vosa ke o dau walia na ituvaki dredre o sotava kei na cala lalai o cakava.

iVakasala: Kua ni soro ke totolo nodra tobotobo eso tale. E kaya na iVolatabu: “Ia me dikeva na tamata yadua na nona cakacaka, ena qai marau ga kina vakalevu, ena sega ni vakatauvatani koya kei na dua tale.”​—Kalatia 6:4.

Na cava ena rawati kina?

E levu na ka e rawati ni vulici e dua na vosa vou. Kena ivakaraitaki, e kaya e dua na goneyalewa o Olivia: “Ni o vulica e dua tale na vosa, ena rabailevu nomu veimaliwai qai levu nomu itokani vou.”

E kaya e dua na itabagone o Mary ni vakanuideitaki koya nona vulica e dua na vosa vou. E tukuna: “E dredre meu marautaka na ka au dau cakava, ia dua na ka noqu marau niu vulica e dua na vosa vou. Au dau marau vakalevu ena gauna au vulica kina e dua na matavosa. E vinaka na ivakarau ni lomaqu.”

O Gina sa tukuni oti mai, e raica ni vakaikuritaka nona marau ena cakacaka vakaitalatala nona wasea na ka dina ena iVolatabu ena vosa vagalu. E tukuna: “E marautaki dina niu raica na nodra marau ena gauna au vunau kina vei ira ena nodra vosa!”

Kena dina: Na vulici ni dua tale na vosa ena vukei iko mo kunea eso na itokani vou, ena vakanuideitaki iko, ena vakaibalebale tale ga nomu cakacaka vakaitalatala. Qori e dua na iwalewale mana me wasei kina ena “veimatanitu kece, veiyavusa, veimatatamata, kei na duivosavosa” na itukutuku vinaka.​—Vakatakila 7:9, ivakamacala e ra.