O sa raica e dua me watimu vinaka? Ke vaka kina, o na kila vakacava ni sa ganiti koya me watimu?

 E bibi mo kua ni raica ga na irairai e sau. Io, na goneyalewa matavinaka mada ga ena rawa ni sega ni nuitaki, se na gonetagane rogo ena rawa ni ca na nona itovo. O na vinakata e dua o na lomavakacegu kina, e dua e tautauvata nomudrau itovo kei na isausau.​—Vakatekivu 2:18; Maciu 19:4-6.

 Mo kilai nomu itau vinaka. E bibi gona mo qaqarauni! De o na via raica ga na ka o taleitaka mo raica. Mo kua ni vakusakusa. Saga mo kila na rokana dina.

 Levu era veibuku era sega ni kila vinaka na nodra itau. E totolo wale ga nodra raica na veika era tautauvata kina: “Keirau taleitaka vata e dua na mataqali ivakatagi.” “Keirau taleitaka ni cakava vata e dua na ka.” “Keirau duavata ena ka kece ga!” Ia e bibi mo kua ni raica ga na irairai e sau. E bibi mo kila na ‘idivi ni tamata e loma.’ (1 Pita 3:4; Efeso 3:16) E ka vakayalomatua gona mo raica na nona itovo ni drau sega ni duavata ena dua na ka, kua ni kauaitaka tiko ga na ka drau duavata kina.

 Kena ivakaraitaki, vakasamataka mada na tikina qo:

•   E vakacava na nona rai ni drau sega ni duavata ena dua na ka, e dau vinakata me yaco ga na lomana, de dua ena “cudru” se “vosavakacaca”? (Kalatia 5:19, 20; Kolosa 3:8) Se dau yalorawarawa, e tu vakarau me vakarorogo ke veivosakitaki tiko na ka e sega ni beci kina na ivakavuvuli vakaivolatabu?​—Jemesa 3:17.

•   Vakacava, e dau via lewa kece ga na ka, se dau vuvu? E vinakata me kila kece na ka o cakava? E kaya o Nicole, “Au dau rogoca nira veivala na veibuku tiko nira sega ni veiqiriti. Oya na ivakatakilakila ca.”​—1 Korinica 13:4.

•   Na cava nodra rai eso me baleti nomu itau? Ena vinaka mo veitalanoa kei ira era kilai koya vinaka, me vakataki ira na matua vakayalo ena ivavakoso. Qori o na kila kina se “rogo vinaka” o koya, se sega.​—Cakacaka 16:1, 2.