Raica sara na lewena

RA TAROGA NA ITABAGONE

Na Cava Meda Dau Dina Kina?

Na Cava Meda Dau Dina Kina?

 Vuna era sega ni dau dina kina eso

Na vuravura nikua, sa sega ni raici vakabibi na dau dina. Eso era na rairai kaya:

  • ‘Keu tukuna na ka dina vei rau noqu itubutubu, au na rawa ni cudruvi.’

  • ‘Keu na kopi ena veitarogi qo, Au na pasi.’

  • ‘Keu na sega ni butakoca qo, Au na maroroi ilavo meu volia kina.’

‘Na cava na kena leqa?’ eso era na rairai taroga. ‘Era sega ni dau dina na tamata kece, se vakacava?’

Kena isau, sega. Levu na itabagone nikua era vakabauta ni yaga meda dau dina, e tiko tale ga na vuna vinaka. E kaya na iVolatabu, “Na ka kece e kaburaka e dua ena tamusuka tale ga.” (Kalatia 6:⁠7) Eda na tamusuka na ka eda tea, se mani vinaka se ca.

Kena ivakaraitaki, na ca ni lasu.

“Au lasutaki tinaqu ni keirau dau veitalanoa kei na dua na cauravou. E kila vinaka o koya niu lasu tiko. E sega ni vosota rawa o tinaqu niu lasutaki koya ena ikatolu ni gauna. E vakatabui vei au na ka me rua na macawa, au sega ni vakatarai meu vakayagataka noqu talevoni se sara TV me dua na vula. Au muduka sara ga na lasutaki rau noqu itubutubu!”​—Anita.

Vakasamataka mada: Na cava e taura kina na gauna me qai nuitaki Anita tale kina o tinana?

E kaya na iVolatabu: “Oni sa biuta tani na veidabui, ni tukuna ga na ka dina vua na kainona.”​—Efeso 4:⁠25.

“Au lasutaki rau noqu itubutubu, au nanuma ni rau sega ni kidava, yacova na gauna rau tukuna lesu kina vei au na ka au tukuna. Au sega ni vakasamataka rawa na ka au tukuna, e sega sara ga ni dina. O na sega ni lasu, ke o dau tukuna na ka dina!”​—Anthony.

Vakasamataka mada: Na cava a rawa ni cakava o Anthony me kua ni madua kina?

E kaya na iVolatabu: “Na tabenigusu lasu e sevaka o Jiova, ia o ira e dodonu nodra ivalavala e taleitaka o koya.”​—Vosa Vakaibalebale 12:22.

“Dua noqu itokani e dau vakatubutaka nona italanoa. Au taleitaki koya, au dau saga meu kua ni kauaitaka sara nona italanoa. Sa bau dredre dina meu vakabauti koya se nuitaki koya.”​—Yvonne.

Vakasamataka mada: Ni vakatubutaki na italanoa kei na so na lasu “lalai,” ena vakaleqa vakacava na kena irogorogo na itokani i Yvonne?

E Kaya na iVolatabu: “Keitou vinakata me keitou dina ena ka kece.”​—Iperiu 13:⁠18.

Na yavu malumalumu ena vakaleqa na tabavale, e vaka kina na lasu ena vakaleqa na kemu irogorogo

 Vuna meda dau dina kina

Vakasamataka eso na ka vinaka e rawati nida dau dina.

“A taubale tiko e liu vei au e dua na marama qai lutu nona ilavo. Au kacivi koya meu vakasuka nona ilavo. Dua na ka nona vakavinavinaka qai tukuna: ‘Sega ni laurai vakalevu nikua na itovo va qori.’ Dua na ka marautaki nida cakava na ka dodonu!”​—Vivian.

Vakasamataka mada: Na cava e kidroataka kina na marama ya ena ka e cakava o Vivan? E yaga vakacava vei Vivian na nona dau dina?

E Kaya na iVolatabu: “Era marau o ira . . . era cakava tu ga na ka dodonu.”​—Same 106:⁠3.

“E neitou bisinisi vakavuvale me keitou sasamaki ena tabavale qai vakavinakataka tale ga. Eso na gauna ni keitou sasamaki tiko keitou dau raica nira lutu tu eso na ilavo. Keitou dau biuta na ilavo ena desi voleka duadua. E votivoti vua e dua na cakacaka e kea na neitou dau dina, e dau kaya: ‘Qori e tini ga na sede!’. Ia kila na cava? E dau nuitaki keitou o koya.”​—Julia.

Vakasamataka mada: Ena yaga vakacava vei Julia nona dau dina ke mani vinakata e dua nona ivola ni cakacaka me kunea tale kina dua nona cakacaka?

E Kaya na iVolatabu: “Gumatua sara mo vakaraitaka ena mata ni Kalou ni ganiti iko nona veivakadonui, na tamata cakacaka e sega ni dua na ka e maduataka.”​—2 Timoci 2:​15.

“Au taura na kequ isau ni 80 na aua sega ni 64. A rawa sara ga niu maroroya, ia au mani sega ni cakava rawa qori. E marautaka na marama dau qarava na ilavo niu vakaraitaka vakadodonu vua. E toso vinaka na bisinisi, ia au sega ni via maroroya na ilavo ya ni sa na wili vakabutako.”​—Bethany.

Vakasamataka mada: E vinaka cake mo butakoca e dua na kabani mai nomu butakoca e dua na tamata?

E Kaya na iVolatabu: “Ni sevaka o Jiova na tamata lawakica, ia e veitokani voleka kei ira na yalododonu.”​—Vosa Vakaibalebale 3:⁠32.