Levu na itabagone era sega ni kauaitaka tu na veiqaravi, ni rawa ni taura e dua na gauna me qai tauvimate bibi e dua vei rau na itubutubu.

Ia vakacava ke rau tauvimate nomu itubutubu ni o se qai tubu cake tiko? Dikeva na ka rau sotava e rua na itabagone qo.

•  Na italanoa kei Emmaline

•  Na italanoa kei Emily

E tauvi tinaqu na Ehlers-Danlos syndrome (EDS), e mate mosimosi qai sega na kena iwali. Na mate qori e tara na isema ni yago, kuli ni yago, kei na sala ni dra.

E qai ca ga vakalevu na ituvaki kei Na ena loma ni tini na yabaki sa oti, ni sega ni dua na iwali ni mate qori. Levu na gauna e dau malumu na pamu ni dra e yagona e lai rivarivabitaki kina na nona bula. Ena so na gauna sa dau vinakata ga me mate ena levu ni mosi e vakila e yagona.

Keitou iVakadinadina i Jiova vakavuvale, qai dua na ka nodra dau veivakacegui na lewe ni ivavakoso keitou lewena! Kena ivakaraitaki, dua na goneyalewa keirau yabaki vata a volavola vei keitou vakavuvale. E kaya ni lomani keitou vakalevu e tu vakarau tale ga me vukei keitou ena ka keitou vinakata. E talei dina na itokani va qori!

E vukei au vakalevu na iVolatabu. Kena ivakaraitaki, dua vei ira na tikinivolatabu au taleitaka na Same 34:18, e kaya: “E voleka o Jiova vei ira sa ramusu na lomadra.” Dua tale na Iperiu 13:⁠6, e kaya: “E dau vukei au o Jiova, au na sega ni rere.”

Au raica ni vakaibalebale dina vei au na ikarua ni tikinivolatabu. Au dau rerevaka de qai mate o tinaqu. Dua na ka noqu lomani koya, au dau vakavinavinakataka na siga yadua au tiko vata kina kei koya. Na tikinivolatabu qori e vakanuideitaki au me baleta na veigauna se bera mai kei na ituvaki cava ga e salavata mai.

Dua tale na ka au rerevaka tiko. Na EDS e mate ni kawa, a tauvi buqu kei tinaqu, qo sa tauvi au. Ia na Iperiu 13:6 e vakadeitaka vei au ni o Jiova ena “vukei au” ena ituvaki qori.

Ena gauna mada ga qo au saga meu vakavinavinakataka ga na veika sa tiko rawa. Meu guilecava na veika sa sivi qai kua ni leqataka na veigauna se bera mai. E dau vakavu lomabibi vei au keu vakatauvatana na ka sa sega ni rawata o Na kei na veika e dau rawata e liu. Ia e kaya na iVolatabu ni ka ni veivakatovolei eda sotava e “lekaleka qai mamada” ni vakatauvatani kei na inuinui ni bula tawamudu se bera mai.​—2 Korinica 4:​17; Vakatakila 21:​1-4.

Vakasamataka mada: Cava e vukei Emmaline me donu tiko ga kina nona rai? E rawa vakacava ni donu tiko ga nomu rai ni o sotava na veika dredre?

Niu se vuli tiko ena sekeneri, a tarai Ta vakalekaleka na lomabibi. E vaka ga sa yali na tamaqu dina qai sosomitaki ena dua na tagane vou. Tekivu mai na gauna qori sa dau vakila o Ta na rarawa, rere vakalialia, kei na nuiqawaqawa. E tinikalima na yabaki nona sotava tiko mai na ituvaki qori. Dua na ka na kena mosi vua me rarawa tiko, dina ga ni kila ni sega ni dua na vuna vinaka me va kina qori!

Keitou iVakadinadina i Jiova, dua na ka nodra dau tokoni keitou vakavuvale o ira ena ivavakoso keitou lewena. Era yalovinaka ra qai vakaraitaka na yalo ni veikauaitaki dina. Era dau vakauqeti tamaqu ni tiko na kena yaga ena ivavakoso. Niu raica nona vosota tiko o Ta na ituvaki e sotava, au sa qai lomani koya ga vakalevu.

Au nanumi tamaqu sara ga. E turaga mamarau, ia qo sa lomaocaoca qai vakila vakalevu na rarawa. E ca na lomaqu niu raica nona vala tiko e veisiga kei na meca e sega ni laurai e tiko ena loma ni nona vakasama.

Ia dua na ka nona sasaga o Ta me bulabula tiko ga kina. Ni sotava e dua na ituvaki dredre e wilika vakalalai na iVolatabu ena dua na siga ke vica mada ga na tikina. Qori e vakaukauataki koya sara ga vakalevu. Na ituvatuva lailai qori e veivakabulai. Dua na ka na levu ni noqu sakitaki koya ena gauna e sotava kina na ituvaki qori.

Au taleitaka vakalevu na Niemaia 8:​10, e kaya: “Kaukaua na marau e solia o Jiova.” Au vakila na dina ni tikinivolatabu qori. Na marau au vakila niu maliwai ira na tamata i Jiova ena soqoni, vakaitavi qai vakaogai au ena veika vakayalo, e vukei au vakalevu qori ena ituvaki dredre au sotava. Au vakila tale ga na vakacegu. Au vulica ena ivakaraitaki i tamaqu se mani dredre cava o sotava, o Jiova ena tokoni iko tu ga.

Vakasamataka mada: E tokoni tamana vakacava o Emily ena nona tauvimate bibi? O na vukea vakacava e dua e yalolailai?