Raica sara na lewena

RA TAROGA NA ITABAGONE

Cava Noqu Rai me Baleta na Veivakadodonutaki?

Cava Noqu Rai me Baleta na Veivakadodonutaki?

 Vakasamataka mada

Ena vinakati meda vakadodonutaki ena so na gauna. Qori na ivakasala meda rawa ni vakavinakataka noda itovo ni rai, se ivakarau ni noda cakacaka. Ni o vakasamataka tiko qori, dikeva mada eso na ituvaki qo.

  1. E kaya nomu qasenivuli ni o sega ni vakayagataka e levu na gauna ena dua na vakadidike e koronivuli. E kaya: “Dodonu mo vakayagataka e levu na gauna ena vakadidike qo.”

    Cava o na cakava ena veivakadodonutaki va qori?

    1. Kua ni muria. (‘Sega ga ni dau taleitaki au o qasenivuli.’)

    2. Muria. (‘Au na muria nona ivakasala ena noqu vakadidike e tarava.’)

  2. O se qai samaka oti ga nomu rumu, ia e kaya o tinamu ni sa rui duka.

    Cava o na cakava ena veivakadodonutaki va qori?

    1. Kua ni muria. (‘Sega ni dau lomavakacegu o Na.’)

    2. Muria. (‘Meu tukuna na ka dina, e rawa niu samaka vinaka sara.’)

  3. Kaya o tacimu ni sega ni taleitaka nomu dau via lewai koya tiko.

    Cava o na cakava ena veivakadodonutaki va qori?

    1. Kua ni muria. (‘O cei mada o koya me tukuna mai va ya?’)

    2. Muria. (‘De dua meu dau yalovinaka vua.’)

Eso na itabagone e totolo nodra cudru nira vakadodonutaki, ke ka lailai mada ga. O va tale ga qori? Ke nomu leqa qori, o sa vakabula ika levu tiko! Na vuna? Na veivakadodonutaki ena vukei iko mo vulica kina eso na ka ena yaga ena gauna qo, vaka kina ni o sa uabula.

Kua ni vakalecalecava na veivakadodonutaki baleta ga ni o sega ni via rogoca

 Cava meu vakadodonutaki kina?

  • Ni o sega ni uasivi. E kaya na iVolatabu: “Eda dau tarabe kece.” (Jemesa 3:2) E vinakati gona meda dau vakadodonutaki kece.

    Au saga meu nanuma tiko nida sega ni uasivi kece, e tiki tale ga ni noda bula na cala eda dau cakava. Niu vakadodonutaki gona, au na saga meu vuli kina, meu kua ni tale ga ni tokaruataka na cala au cakava.”—David.

  • O rawa ni vinaka cake sara. E kaya na iVolatabu: “Mo tubera na tamata vuku, ni na vuku vakalevu.” (Vosa Vakaibalebale 9:9) Ke o ciqoma na veivakadodonutaki, ena yaga vakalevu vei iko.

    “Dau cala noqu rai me baleta na veivakadodonutaki. Au nanuma niu na beci kina. Ia qo au sa taleitaka, so mada ga na gauna au dau kerea meu vakadodonutaki. Meu rawa ni kila kina na veika meu vakavinakataka.”—Selena.

E vinaka meda kerea meda vakadodonutaki. Ia ke da sega ni kerea qai cawi mai, ena sega ni taleitaki. Kena ivakaraitaki, e wilika o Natalie e dua na kad qai sega ni taleitaka na ka e volai tu kina. E kaya: “Au domobula, au yalolailai tale ga. Dua na ka noqu sasaga, oti au qai vakasalataki tu va qo!”

O sa sotava oti e dua na ituvaki va qori? Ke vaka kina, na cava o cakava?

 Au na muria vakacava na veivakadodonutaki?

  • Vakarorogo.

    E kaya na iVolatabu: “Na tamata kilaka e lewa vinaka na nona vosa, kei koya e yalomatua e yalomalua tiko ga.” (Vosa Vakaibalebale 17:27) Kua ni vosa takoso ke dua e vosa tiko vei iko. Kua ni totolo tale ga nomu sauma de o qai veivutunitaka tale!

    “Au dau via veiba sara ga keu vakadodonutaki. Ia e dodonu meu vuli ena ka au vakadodonutaki kina, me rawa ni vinaka cake ena gauna tarava.”—Sara.

  • Kauaitaka na ka o vakadodonutaki kina, sega ni o koya e veivakadodonutaki tiko.

    O na rairai temaki mo vakalewa totolo nona malumalumu o koya e vakadodonutaki iko. Ia e vinaka mo muria na ivakasala vakaivolatabu, oya “mo totolo ni vakarorogo . . .  berabera ni vosa, . . .  berabera [tale ga] ni cudru.” (Jemesa 1:19) Eso na ka e dina kina na veivakadodonutaki. Kua ni vakalecalecava na veivakadodonutaki baleta ga ni o sega ni via rogoca.

    “Ni rau vakadodonutaki au noqu itubutubu, au dau cudru qai kaya, ‘Io au kila, au kila.’ Ia e yaga sara vakalevu noqu dau vakarogoci rau vinaka, qai muria nodrau ivakasala.”—Edward.

  • Kua ni namaka vakasivia na ka.

    Ni o vakadodonutaki, e sega ni kena ibalebale ni o ca. E vakaraitaka ga ni o sega ni uasivi me vakataki ira na kena vo. O koya mada ga e vakadodonutaki iko ena vinakati tale ga me vakadodonutaki ena so na gauna. E kaya kina na iVolatabu: “E sega ni dua na tamata yalododonu e vuravura me vakayacora tiko ga na ka vinaka.”—Dauvunau 7:20.

    “E vakadodonutaki au e dua noqu itokani, au qai nanuma ni sega ni veiganiti. Au vakavinavinakataka nona vosa vakadodonu, ia au sega ni taleitaka. Toso na gauna, au liaca ni dina eso na ka e kaya. Au vakavinavinakataka nona ivakasala, niu raica kina na veika meu vakavinakataka. De dua au raibaleta tu eso na veika qori.”—Sophia.

  • Vakavinakataka nomu isausau.

    E kaya na iVolatabu na “tamata yalomatua e muria na veivakadodonutaki.” (Vosa Vakaibalebale 15:5) Ni o cakava qori, o na sega ni rarawa kina, o na saga tale ga mo vakavinakataka na veika o malumalumu kina. Biuta nomu isausau qai vakamuria tiko na veika o rawata ena vica na vula tarava.

    “Na veivakadodonutaki e vinakati kina mo dau dina. Qori ena vukei iko mo vakatusa nomu cala, kere veivosoti, saga tale ga mo vakavinakataka nomu itovo.”—Emma.

Nanuma tiko: E kaya na iVolatabu: “Eda dau veivakavulici vakataki keda na tamata, me vaka ga nona vagatara na kaukamea na kaukamea.” (Vosa Vakaibalebale 27:17, Good News Translation) Na veivakadodonutaki e rawa sara ga ni vukei iko ena gauna qo, kei na gauna o sa uabula kina.