Raica sara na lewena

RA TAROGA NA ITABAGONE

Ena Toso Vinaka Vakacava na Vuli ke Caka ga e Vale?

Ena Toso Vinaka Vakacava na Vuli ke Caka ga e Vale?

Levu na gone nikua era sa vuli ga mai vale. Ke o dua vei ira, ena toso vinaka vakacava nomu vuli? Qo eso na ka ena rawa ni vukei iko. *

 Lima na ka o rawa ni cakava

  • Tuvana na ka mo cakava. Saga me tautauvata tiko ga na ka o cakava me vaka ga o tiko e koronivuli. Me tiko ga na gauna mo cakava kina nomu ka ni vuli, cakacaka e vale, kei na so tale na ka bibi. O rawa ni veisautaka qori me ganiti iko.

    iVakavuvuli vakaivolatabu: “Na ka kece e caka me. . . tuvanaki vakamatau.”—1 Korinica 14:40.

    “Raica na veisiga yadua me vaka ga ni o tiko e koronivuli. Cakava na ka kece ena kena gauna lokuci.”—Katie.

    Mo vakasamataka: Na cava na yaga ni nomu vola e dua na nomu ituvatuva qai vakabira ena dua na vanua e rawarawa ni o raica?

  • Saga mo dau lewai iko vinaka. Mo rawa ni yalomatua, ena vinakati mo dau qarava na itavi ena gauna o sa lokuca tu ke sega mada ni lomamu. Kua ni o dau lokuyara!

    iVakavuvuli vakaivolatabu: “Moni dau mamakutu, ni kua ni mokusiga ena nomuni cakacaka.”—Roma 12:11, ivakamacala e ra.

    “E dau dredre vakalevu meda lewai keda vinaka. E dau rawarawa meda soli iulubale qai kaya, ‘Au na qai cakava vakamalua na noqu ka ni vuli.’ Oti ga o sega sara ni cakava, o qai bera tu.”—Alexandra.

    Mo vakasamataka: Ena rawa vakacava ni o lewai iko vinaka ke dau tautauvata tu ga na gauna kei na vanua o cakava kina nomu ka ni vuli ena veisiga?

  • Me dua na vanua ni nomu vuli. Me tu vakarawarawa na ka o vinakata. Cakava vinaka na vanua mo vuli kina ena veisiga, ia qarauna ga me kua ni vakavuna nomu via moce. Qori e vanua ni vuli, sega ni vanua ni moce! Ke sega ni dua na rumu e tu mo vuli kina, o rawa ni vakayagataka na valenikuro, se rumu ni moce.

    iVakavuvuli vakaivolatabu: “Na lalawa ni tamata gumatua ena tini vinaka ga.”—Vosa Vakaibalebale 21:5.

    “Me kua ni tu e yasamu na polo ni qito, na iyaya ni vakatagi kei na qito ena vidio, porokaramutaka nomu talevoni me kua ni rogo. Ni o cakava qori, ena toso vinaka na nomu ka ni vuli. ”—Elizabeth.

    Mo vakasamataka: Na veiveisau cava o rawa ni cakava ena vanua o vuli kina mo kua kina ni vakawelei?

  • Tovolea mo dau vulica yadudua na nomu lesoni. Kua ni saga mo vulica e vica vata na lesoni ena dua ga na gauna, vulica yadudua. Ke sega, ena levu na nomu cala, ena sega ni oti totolo tale ga na ka o vulica tiko.

    iVakavuvuli vakaivolatabu: Vakayagataka vakavinaka na nomuni gauna.”—Efeso 5:16.

    “E sega ni dau dei na noqu vakasama ena ka au vulica tiko ni tiko e yasaqu na noqu talevoni. Au dau vakalusi gauna ena ka e sega na betena.”—Olivia.

    Mo vakasamataka: O rawa ni saga mo vakalevutaka nomu gauna mo vulica kina e dua na lesoni?

  • Dau cakava eso na ka ena nomu gauna galala. Dau taubale, vodo basikeli, se vakaukauayago. E rawa ni vakabulabulataki iko ni o dau cakava na ka o taleitaka. E kaya na ivola na School Power, “Ia mo cakava qori ni sa oti na nomu ka ni vuli. O na marautaka kina ni cakava na ka o taleitaka.”

    iVakavuvuli vakaivolatabu: “E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.”—Dauvunau 4:6.

    “E dau vulici e koronivuli na kena vakayagataki e dua na iyaya ni ivakatagi se na droini. Ni sa sega na vuli e koronivuli, au sa qai raica tu na kedra bibi na lesoni qori. Ena yaga vakalevu noda cakava tu eso na ka va qori me ikuri ni noda ka ni vuli.”—Taylor.

    Mo vakasamataka: Na cava o rawa ni cakava ena nomu gauna ni galala me rawa ni vakabulabulataki iko, me kua ni vakavucesa kina na nomu ka ni vuli?

^ para. 3 E levu tu na sala mo vuli mai kina e vale. Vakayagataka ga na vakatutu ena yaga vei iko ena ulutaga qo.