Raica sara na lewena

RA TAROGA NA ITABAGONE

Meu Tinia Neirau Veikilai? (Wase 2)

Meu Tinia Neirau Veikilai? (Wase 2)

Na imatai ni ka mo cakava, digia na vanua kei na gauna vinaka mo drau veitalanoa kina. Na cava na kena ibalebale qori?

Vakasamataka mada na ka o vinakata me caka vei iko. (Maciu 7:12) O na vinakata me vakasavui e matanalevu na itukutuku qori? Sega.

Ke rawa, ena vinaka mo kua ni tinia nomudrau veikilai ni o katona na nomu itukutuku ena talevoni, se o vakauitukutuku ena talevoni, se imeli. Ia mo digia na gauna kei na vanua mo drau veitalanoataka kina na tikina bibi qo.

Na cava mo kaya ni sa kena gauna mo tukuna kina na lomamu? E uqeti ira na lotu vaKarisito na yapositolo o Paula mera dau “tukuna na ka dina” vei ira na kainodra.​—Efeso 4:25.

E bibi mo maqosataka na ka o tukuna qai dei kina. Vakamatatataka na vuna o nanuma kina mo sa tinia nomudrau veikilai.

Sega ni tukuni mo vakayatuyatutaka na nona malumalumu, se o vakalewai koya. E vinaka mo kua ni kaya, “O sega ni cakava qo” se “O sega sara ga ni cakava ya,” ena vinaka mo veisautaka qori ina ka o vinakata—Au taleitaka e dua e dau . . .” se “Au nanuma me sa tini na veikilai qo baleta ni . . .”

Mo kua ni vakamalumalumu se rogoca na ka era vakatukuna eso. Nanuma tiko, ni o digia mo tinia na veivosaki ena dua na inaki vinaka. Qarauni nomu itau gona, de coriti iko tale ena nona ilawaki qaseqase mo veisautaka nomu vakatulewa. E kaya e dua na goneyalewa o Lori, “Niu tinia oti ga na neirau veikilai kei noqu itau, sa dau matararawa voli ga e veigauna. De dua e cakava qori meu lomani koya kina. A via ca toka vei au. Ia e sega ni mai veisautaka noqu vakatulewa na nona ivukivuki.” Io me vakataki Lori, e bibi mo kila na ka o vinakata qai dei ena nomu vakatulewa. Me sega na nomu sega.​—Jemesa 5:12.

Revurevu ni Kena Tini na Veikilai.

Kua ni kurabui ni o na rarawataka ni sa mai tini na nomudrau veikilai. De o na vakila tale ga na ka e sotava na daunisame, ni kaya: “Au sa lomaleqa qai yalolailai vakalevu, au lako voli ena rarawa ena siga taucoko.”​—Same 38:6.

De dua era na uqeti iko na nomu itokani e vinaka na nodra inaki, mo solia tale vua na gauna. Mo qarauna sara! O iko ga o na vakila na vinaka se ca ni nomu vakatulewa, sega ni o ira na nomu itokani. Mo kua gona ni rere, dei ena nomu vakatulewa, dina ga ni o na rarawataka na veika e yaco.

Mo kila tiko, ni toso na gauna ena seavu nomu rarawa. Ena vinaka mo muria eso na ivakasala qo me yaga vei iko.