Vei Ira na Iperiu 11:1-40
11 Na vakabauta oya noda vakadeitaka e lomada ni na yaco dina na ka eda nuitaka,+ na noda raica tale ga na ivakadinadina e vakaraitaka ni tiko dina na ka e sega ni raica na matada.
2 Ena vuku ni ka qo, e vakadinadinataki kina vei ira ena gauna makawa* ni vakadonui ira na Kalou.
3 Ena vuku ni vakabauta, eda kila kina nira buli* na ka kece mai lomalagi kei vuravura* ena vosa ga ni Kalou, o koya gona na ka e raici e basika mai na ka e sega ni raici.
4 Ena vakabauta i Epeli e cabora kina vua na Kalou na isoro e uasivia na nei Keni,+ qai vakadinadinataki vua ni yalododonu ena vuku ni vakabauta qo, ni vakadonuya sara ga na Kalou na nona isolisoli.+ Ena vuku ni nona vakabauta, e se vosa tiko ga+ o koya e dina ni sa mate.
5 Ena vakabauta i Inoki,+ e tokitaki kina me kua ni raica na mate, e sega ni laurai tale ena dua na vanua ni sa tokitaki koya na Kalou,+ ni a vakadinadinataki vua ni se bera ni tokitaki ni vakadonui koya na Kalou.
6 Koya gona, ke sega na vakabauta eda na sega ni vakamarautaka rawa na Kalou, ni o koya e torova na Kalou e dodonu me vakabauta ni bula dina tiko o koya, ni na vakaicovitaki ira tale ga era vakasaqarai koya ena yalogu.+
7 Ena vakabauta i Noa,+ ni vakasalataki koya na Kalou ena ka e se sega ni laurai,+ a vakaraitaka nona doka na Kalou ni taya na waqa+ me bula kina nona vuvale, ena nona vakabauta tale ga e vakavotui kina ni dodonu me lewai o vuravura,+ mani itaukei ni yalododonu ena vuku ni nona vakabauta.
8 Ena vakabauta i Eparama,+ e talairawarawa ni kacivi me lako ina vanua e lesi me na taukena, e mani lako, ia e sega ni kila na vanua e lako tiko kina.+
9 Ena nona vakabauta e tiko kina vakavulagi ena vanua e yalataki me vaka e tiko e vanuatani,+ qai bula voli ena valelaca+ vata kei Aisake kei Jekope, eratou itaukei vata ni vosa ni yalayala.+
10 Ni a waraka tiko na koro e dei na kena yavu, na koro e tauyavutaka qai tara na Kalou.+
11 Ena vakabauta tale ga i Sera, e soli kina vua na kaukaua me kunekunetaka na kawa, dina ni sa sivia na yabaki ni vakasucu gone,+ ni kila ni daudina o koya e yalataka.
12 Kena ikuri, na tagane a sega ni rawa ni vakawa,*+ era sucu na luvena,+ e vaka na kalokalo ni lomalagi na kedra levu, era sega tale ga ni wiliki rawa me vaka na nuku ni matasawa.+
13 Ena vakabauta, era yalodina o ira kece qo me yacova na mate, e dina ni se sega ni vakayacori vei ira na vosa ni yalayala,+ ia era raica vakayawa tu ga,+ era marautaka, era qai tukuna raraba nira vulagi, ni na lekaleka wale nodra tiko ena vanua.
14 Ni o ira na dau vosa va qo era vakadinadinataka nira vakasaqara tiko vagumatua na vanua ena qai nodra itikotiko.
15 Ia ke ra nanuma tiko ga na vanua era a biuta mai,+ ke rawarawa sara nodra lesu tale.
16 Ia qo era guta na vanua e vinaka cake, ya mai lomalagi. E sega kina ni maduataka na Kalou na nodra okati koya me nodra Kalou+ nira masu vua, ni sa vakarautaka e dua na koro me nodra.+
17 Ena vakabauta i Eparama, a soli Aisake kina me vakacabora ni vakatovolei+—e ciqoma ena marau na vosa ni yalayala a tu vakarau me cabora na luvena e duabau+—
18 dina ni a tukuni vua: “O koya ena qai okati me nomu kawa ena basika mai vei Aisake.”+
19 Ia e vakadinata o Eparama ni rawa vua na Kalou me vakaturi koya mai na mate, mai kea e soli tale vua na luvena, qo e vakatakarakarataka na ka me na yaco.+
20 Ena vakabauta tale ga i Aisake, e vosa vakalougatataki Jekope+ kina kei Iso+ me baleta na veika e se bera mai.
21 Ena vakabauta i Jekope, e vosa vakalougatataki rau yadudua kina na luvei Josefa+ tagane ni sa voleka ni mate,+ e sokalou ni tautauri tiko ena ulu ni nona ititoko.+
22 Ena vakabauta i Josefa, e tukuna kina na nodra lako tani mai Ijipita na luvei Isireli, qai vakarota, ni sa voleka ni mate, na ka me caka ena sui ni yagona.*+
23 Ena vakabauta, erau vunitaki Mosese kina na nona itubutubu me vula tolu ena gauna e sucu kina,+ ni rau raica ni sa rui gone totoka,+ erau sega tale ga ni rerevaka na nona ivakaro na tui.+
24 Ena vakabauta i Mosese, a sega kina ni taleitaka me vakatokai me luvena* na raluve+ ni Ijipita ena gauna sa tamatabula kina,+
25 e digia ga me vakacacani vata kei ira na tamata ni Kalou, e sega ni vinakata me marautaka na ivalavala ca e lekaleka wale na kena kamica,
26 ni ka dokai sara vua na nona vakamadualaki me vaka ni o koya na Karisito, qai okata ya me iyau e talei cake mai na iyau kei Ijipita, ni vakanamata tu ena soli ni nona icovi.
27 Ena nona vakabauta e biuti Ijipita+ kina, ia e sega ni rerevaka na cudru ni tui+ ni dei tu ga, e vaka ga e raici koya tiko e tawarairai.+
28 Ena nona vakabauta, e vakananuma kina na Lakosivia kei na kureitaki ni dra, me kua kina ni tarai ira na nodra ulumatua o koya na dauveivakarusai.+
29 Ena vakabauta era takosova kina na Wasa Damudamu nira taubale ena qele mamaca,+ ia nira via muri yani na kai Ijipita, e qai tilomi ira na wasawasa.+
30 Ena vakabauta e bale kina na bai kei Jeriko ni oti na kena wavokiti me vitu na siga.+
31 Ena vakabauta i Reapi na saqamua, a sega kina ni mate vata kei ira na talaidredre ni a vakacegui rau na yamata.+
32 Na cava tale meu kaya? Keu talanoataki Kitioni,+ Peraki,+ Samisoni,+ Jefica,+ Tevita,+ Samuela,+ kei ira na parofita tale eso, ena sega ga na kena gauna.
33 Ena nodra vakabauta era vakadruka na veimatanitu,+ era vakadeitaka na ivalavala dodonu, tau vei ira na vosa ni yalayala,+ era sogota tale ga na gusudra na laione,+
34 era tarova na kaukaua ni bukawaqa,+ era dro bula mai na bati ni iseleiwau,+ era vakaukauataki mai na ituvaki malumalumu,+ era qaqa ena ivalu,+ era vakasava nodra mataivalu na meca.+
35 Era vakaturi+ mai na mate na wekadra lomani eso na yalewa, ia era vakararawataki mera mate eso tale na tagane nira sega ni ciqoma mera sereki ena ivoli, me nodra kina na veivakaturi e vinaka cake.
36 Eso tale era vakatovolei ena nodra vakalialiai, kanakuitataki, e sega ni o koya ga ya, era vesu ena sinucodo,+ era bala i valeniveivesu.+
37 Era vakaviriki ena vatu,+ era veilewaitaki, era varomusuki rua, era vakamatei ena iseleiwau,+ era vakaisulu ena vutinisipi,+ era vakaisulu ena vutinime, qo ena gauna era viakana voli kina, era vakararawataki,+ era vakalolomataki,+
38 e sega ga ni ganiti ira o vuravura. Era veilakoyaki voli ena veivanua dravuisiga, ena veidelana, ena veiqaravatu,+ kei na veivanua kilo e vuravura.
39 Ia o ira kece qo era sega ni raica na vakavotukanataki ni vosa ni yalayala, e dina ni a vakadinadinataki vei ira ena vuku ni nodra vakabauta,
40 ni sa raica rawa tu na Kalou e dua na ka e vinaka cake vei keda,+ mera kua kina ni uasivi keda meda yacova vata na bula uasivi.
iVakamacala e ra
^ Se “ira na noda qase.”
^ Se “tuvai veitaravi, vakarautaki.” Kir. katertisthtai.
^ Se “na ituvatuva ni ka kece.” Kir. aionas.
^ Kir., “E vaka ga na tamata sa mate tu.”
^ Se “ena nona veibulu.”
^ Se “luvena na luvei Fero yalewa.”
