Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Vakacava Keu Vucesa?

Vakacava Keu Vucesa?

E dau vakavucesa vei ira e levu na tu e vale ni sega ni dua na ka me caka, se vanua me lakovi ni dau tau na uca ena yakavi. E kaya e dua na itabagone o Robert: “Ena so na gauna au dau dadabe sara tu ga niu sega ni kila se cava meu cakava.”

Ke o dau vakila tale ga qori, ena rawa ni vukei iko na ulutaga qo!

 Ka mo kila

  • Ena rairai sega ni veivuke na vakayagataki ni iyaya vakalivaliva.

    E yaga ena so na gauna na vakayagataki ni Internet, ia ena rawa ni tarova na nomu vakasamataka na ka mo cakava qai vakavuna tale na nomu vucesa. E kaya e dua na itabagone o Jeremy e yabaki 21: “Ena ciri tani tu na nomu vakasama ni o wadrava tu ga na mata ni kompiuta se talevoni qai sega na ka e lako tiko ena nomu vakasama.

    E vakadinata qori e dua na goneyalewa yabaki 23 o Elena, e kaya: “E vakaiyalayala na ka o rawa ni cakava ni o vakayagataka na iyaya vakalivaliva, baleta o na sega kina ni kauaitaka na ka dina e yaco tiko, qai kuria ga vakalevu na nomu vucesa na gauna o sega ni vakayagataka tiko kina!”

  • Ena veivuke vakalevu ke donu nomu ivakarau ni rai.

    Ena oti beka nomu vucesa ke tiko na ka o cakava? Ena vakatau vakalevu qori ena levu ni nomu taleitaka na ka o cakava tiko. Me kena ivakaraitaki, e nanuma lesu e dua na goneyalewa o Karen: “E levu na ka au dau cakava e koronivuli, ia e vakavucesa vei au na vuli. Ena vinakati mo kauaitaka na ka o cakava tiko mo kua kina ni vucesa.”

O bau kila? Sega ni iulubale ke sa sega ni dua na ka me caka, ia e gauna vinaka ga meda qara kina na ka meda cakava.

Ni o vakayagataka vakavinaka nomu gauna galala, e rawa ni vakatauvatani ina veika e vua ena dua na kau

 Ka o rawa ni cakava

Kua ni yalana na ka o dau taleitaka. Me so tale nomu itokani vovou. Qara e dua tale na ka o dau taleitaka mo cakava. Vakekeli ena so na ulutaga vovou. Ni levu na ka e tu mo cakava ena lailai kina na gauna mo tu taudua ga, qai sega kina ni vakavucesa na veimaliwai kei ira eso tale!

iVakavuvuli vakaivolatabu: “Na ka kece e cakava na ligamu mo qarava ena nomu igu taucoko.”​— Dauvunau 9:​10.

“Au vulica tiko qo na vosa vakaJaina, na Mandarin. Niu dau vakatovotovo gona ena veisiga au liaca kina na levu ni noqu dau taleitaka na vuli. Au taleitaka vakalevu niu cakava tiko e dua na ka. Au vakayagataka vakavinaka kina na noqu vakasama kei na noqu gauna.”​—Melinda.

Dei tiko ga ena nomu inaki. Ni tiko na inaki ni nomu cakava e dua na ka o na qai taleitaka ga vakalevu. Ena sega tale ga ni vakavucesa na vuli ni o dei tiko ena nomu inaki.

iVakavuvuli vakaivolatabu: “E sega ni dua tale na ka e vinaka vua na tamata . . . . me marautaka na nona cakacaka vakaukaua.”​— Dauvunau 2:​24.

“Ni voleka tiko ni oti noqu vuli, e walu na aua ena dua na siga na balavu ni noqu vuli lesoni baleta niu sega ni dau cakava qori e liu. E sega ni vakavucesa baleta niu dei ena noqu inaki. Au raica dei na icovi ni noqu cakacaka oya na tuvaitutu. Qori sara ga na ka e uqeti au tiko.”​—Hannah.

Lomavakacegu ena ka o sega ni veisautaka rawa. E tiko na gauna ena dau vakavucesa kina na ka o dau taleitaka mo cakava. Ena so tale na gauna era na vakadarodaro na nomu itokani, qai sega kina ni dua na ka mo cakava. Me kua gona ni vakacudrui iko qori se mo lomalomani iko kina, me tiko ga vei iko na rai donu.

iVakavuvuli vakaivolatabu: “O koya e marau na lomana e kana magiti tiko ga.”​— Vosa Vakaibalebale 15:15.

“E kaya vei au e dua na noqu itokani meu marautaka na gauna au tiko taudua kina. Na nomu saga mo veiraurautaka na gauna mo tiko kei ira eso tale, kei na nomu tiko taudua, e dua na ka meda saga meda vakamatauni keda kina.”​—Ivy.

Ni o vakayagataka vakavinaka nomu gauna galala, e rawa ni vakatauvatani ina veika e vua ena dua na kau