Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Cava Meu Kila me Baleta na Veivakasagai?​—Wase 2: Lomavakacegu Tale

Cava Meu Kila me Baleta na Veivakasagai?​—Wase 2: Lomavakacegu Tale

 Ora na lomamu

Levu era maduataka na nodra vakasagai. Era rairai nanuma ni bale vei ira. Kena ivakaraitaki o Karen sa yabaki 19, a vakasagai ena gauna e yabaki 6 kina me yaco ina 13. E kaya: “E vakararawataki au tiko ga na ora ni lomaqu. Au kaya lo, ‘Na cava au galuvaka tiko kina na noqu vakasagai?’”

Ke va tale ga qori nomu rai, wilika mada na ivakamacala qo:

  • O ira na gone era sega ni vakayalotaka na veiyacovi. Kena ibalebale ni sega ni bale vei ira na nodra sagai.

  • O ira na gone era dau nuitaki ira na qase, era sega ni kila nodra ilawaki na tamata ca, rawarawa kina nira vakaleqai. E kaya na ivola The Right to Innocence: “Era qaseqase na dau veivakasagai, era sega ni yacova na gone na nodra ilawaki.”

  • E rawa nira taleitaka na veiyacovi na gone nira vakasagai. Ke yaco qori, mo kila tiko ni na va ga qori na yagomu ni dua e vakatara. E sega ni kena ibalebale ni o vakadonuya mo vakasagai se bale vei iko.

Vakatutu: Vakasamataka e dua na gone o kila e tiko ena yabaki ni bula o a vakasagai kina. Taroga, ‘O nanuma ni bale vua nona vakasagai?’

E va qori na ka e vakasamataka o Karen ena gauna e mea tiko kina e tolu na gone, e dua sa voleka ni yabaki ono, na yabaki sara ga e tekivu vakasagai kina. E kaya, “Au kila ni se yalowai na gone ena yabaki qori, au va tale ga ya ena gauna au tekivu vakasagai kina.”

Kena dina: E bale vei koya e veivakasagai na ka e yaco. E kaya na iVolatabu: “Ena saumi vua na tamata ca na nona caka ca.”​—Isikeli 18:20.

 Bibi mo talaucaka na lomamu

O na lomavakacegu ni o talaucaka na ka e yaco vua e dua o nuitaka. E kaya na iVolatabu: “Na itokani dina e loloma ena veigauna, e tacida ena gauna ni rarawa.”​—Vosa Vakaibalebale 17:17.

O rairai nanuma ni na taqomaki na kemu irogorogo ni o galuvaka na ka e yaco. De vaka na bai me taqomaki iko mo kua ni rarawa kina vakalevu. Ia ena sega ni dua e vukei iko ke o galu tiko ga.

Na bai e taqomaki iko ena rawa ni vakalatilati ena nomu vukei

E vakadinadinataka e dua na goneyalewa o Janet ni lomavakacegu ni talaucaka na lomana. E kaya: “Niu se gone a vakasagai au e dua au nuitaka, au galuvaka tiko me vica na yabaki. Ena gauna ga au talaucaka kina vei tinaqu, e vaka ga e taluva mai tabaqu e dua na icolacola bibi.”

Ni vakasamataka lesu o Janet na ka e yacovi koya, e kila na vuna era maduataka kina eso mera talaucaka na lomadra. E kaya: “E ulutaga dredre me veivosakitaki na veivakasagai. Ia vei au, e ora tiko ga na lomaqu. E bibi meu vakaraitaka totolo.”

 “Gauna ni veivakabulai”

Ni o vakasagai e rawa ni cala nomu rai, o nanuma ni o tawayaga, o yalolailai, se o ivakarawa ga ni ka me vakacegui kina na nodra garogaro. O na rawa ni kauta tani na rai cala qori ni o vakayagataka vinaka na “gauna ni veivakabulai.” (Dauvunau 3:⁠3) Na cava mo cakava?

Vulica na iVolatabu. E tiko ena iVolatabu na rai ni Kalou, e “kaukaua . . . me talaraki kina na veika sa vakawakana tu,” wili kina na nomu rai cala. (2 Korinica 10:4, 5) Kena ivakaraitaki, wilika qai vakasamataka na vica na tikinivolatabu qo: Aisea 41:10; Jeremaia 31:3; Malakai 3:16, 17; Luke 12:6, 7; 1 Joni 3:19, 20.

Masu. Ni ora na lomamu se o nanuma ni o tawayaga, “biuta vei Jiova na nomu icolacola bibi.” (Same 55:22) E tiko o koya e kauaitaki iko!

Qase ni ivavakoso. Era vakavulici na tagane lotu vaKarisito qo mera “vaka na ivunivuni mai na cagi, na ivakaruru mai na uca bi.” (Aisea 32:⁠2) Era na vukei iko me donu nomu rai, mo guilecava tale ga na ka sa sivi.

iTokani vinaka. Saga mo veimaliwai kei ira na tagane kei na yalewa era bulataka na itovo vaKarisito. Vulica na ivakarau ni nodra veimaliwai. Toso na gauna, o na qai kila ni sega ni tamata kece era na vakasagai ira era tukuna nira lomana.

Qori na ka bibi e vulica na goneyalewa o Tanya. Ni se gone, era dau vakasagai koya e levu na tagane. E kaya: “Na tagane sara ga keirau dau veivolekati e qai vakasagai au tale.” Toso na gauna e qai kila o Tanya nira tiko na tagane era dau vakaraitaka na loloma dina. E raica vakacava qo?

E veisau nona rai ni dau veimaliwai kei na dua na veiwatini rau bulataka na itovo vaKarisito. E kaya: “Au raica ena itovo nei tagane nira sega ni veivakalolomataki na tagane kece. E taqomaki watina tale ga, qori na ka e nakita na Kalou.” *​—Efeso 5:28, 29.

^ para. 27 Ke o lomabibi vakabalavu, o sega ni dau kana, o vakamavoataki iko, vakayagataka na waigaga ni veivakamatenitaki, sega ni moce vinaka, se vakasamataka mo vakamatei iko, e bibi mo raici vuniwai.