Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Na Cava au Tavalaki au Kina?

Na Cava au Tavalaki au Kina?

 Na cava na ibalebale ni nona tavalaki koya e dua?

Qo na nona vakamavoataki koya ga e dua ni vakayagataka na isele gata. Qo e dua na kena iwalewale. E tiko tale eso na iwalewale me vaka na nona vakamai koya, yacaraka, se mokulaka na yagona. Na ulutaga qo e vakatabakidua ga ena nona tavalaki koya e dua, na kena ivakavuvuli e vauca eso tale na iwalewale.

Kilakila mada: Dina se Lasu.

  1. O ira ga na goneyalewa era dau tavalaka na yagodra.

  2. O koya e tavalaka na yagona e beca na ivakaro ni iVolatabu ena Vunau ni Soro 19:28, e kaya: “Ni kua ni tavalaka na yagomuni.”

Kena isau:

  1. Lasu. Dau matau vei ira na goneyalewa mera tavalaka na yagodra, ia eso tale ga na cauravou era dau tavalaki ira se vakamavoataki ira nira muria eso tale na iwalewale.

  2. Lasu. Na ka e tukuni ena Vunau ni Soro 19:28 e dusia na ivakarau butobuto ena gauna makawa, e sega ni dusia na tikina e vakamacalataki ena ulutaga qo. Io, e tiko gona na vuna vinaka e sega ni vinakata kina na Dauveibuli dauloloma meda vakamavoataki keda ga.​—1 Korinica 6:12; 2 Korinica 7:1; 1 Joni 4:8.

 Na cava era cakava kina qori eso?

Kilakila mada: Na iyatuvosa cava o nanuma ni donu?

Era tavalaki ira eso . . .

  1. mera vosota kina na nodra rarawa.

  2. nira via vakamatei ira ga.

Kena isau: A. Levu era tavalaki ira era sega ni via mate. Era via vakaceguya ga na nodra yalolailai.

Rogoca mada na ka era tukuna eso na itabagone me baleta na nodra tavalaki ira.

E kaya o Celia, sa yabaki 20: “E vakacegui au sara ga.”

E kaya o Tamara, sa yabaki 16: “E vaka me noqu icegucegu. E vinaka me mosi na yagoqu, me kua ga ni mosi na yaloqu.”

E kaya o Carrie, sa yabaki 18: “Au sega ni vinakata meu rarawa. Niu tavalaki au e vakaseavutaka na noqu rarawa, au qai vakila ga na mosi ni yagoqu.”

E kaya o Jerrine, sa yabaki 17: “Na gauna kece au tavalaki au kina, e vaka ga meu sega ni vakila na ka e yaco wavokiti au tiko, au guilecava vakadua na noqu leqa. Au ciqoma na veisau.”

 Ke o dau cakava, o na walia vakacava?

E dua na kena iwali vinaka, mo masu vua na Kalou o Jiova. E kaya na iVolatabu: “Moni biuta vua na nomuni lomaocaoca kece, ni kauaitaki kemuni o koya.”​—1 Pita 5:7.

Vakatutu: Mo masu ga vakalekaleka, o rawa ni tukuna vei Jiova, “Au vinakata moni vukei au.” Toso na gauna, o na qai talaucaka na lomamu vua “na Kalou e dau vakacegui keda ena ka kece.”​—2 Korinica 1:3, 4.

Na masu e sega wale ga ni vakacegui iko, o sa veivosaki sara tiko ga kei na Tamamu vakalomalagi, e yalataka: “Au na vukei iko, au na tokoni iko ena ligaqu imatau daudina.”​—Aisea 41:10.

Era vakacegui e levu e nodra malumalumu mera tavalaki ira nira vosa vua e dua na itubutubu, se dua e qase cake era nuitaka. Rogoca mada qo na ka eratou tukuna e tolu na goneyalewa eratou cakava qori.

 Taro mo vakasamataka

  • Ni o qara veivuke, o cei mo vakaraitaka vua?

  • Na cava mo tukuna vei Jiova ni o masulaka na tikina qori?

  • O rawa ni tukuna e rua na iwalewale (e sega ni veivakamavoataki) mo vakayagataka me seavu kina nomu nuiqawaqawa?