Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Na Cava Meu Cakava Niu Tauvimate?—Wase 1

Na Cava Meu Cakava Niu Tauvimate?—Wase 1

O kila e dua na itabagone e tauvimate bibi tiko? Vakacava e tauvi iko tiko e dua na mate, se vakaleqai e dua na tikiniyagomu e tarova nomu cakava eso na itavi era marautaka na nomu icaba?

Ke dina qori, o na yalolailai ena so na gauna. Ia e tiko ena iVolatabu e rua na itukutuku veivakacegui.

  • E kila na kemu ituvaki na Dauveibuli, na Kalou o Jiova. E bibi sara ni ‘kauaitaki iko o koya.’—1 Pita 5:7.

  • E inaki ni Kalou o Jiova me vakaotia na mate kece! O na wilika qori ena iVolatabu ena Aisea 33:24 kei na Vakatakila 21:1-4.

Era vakacegui e levu na itabagone era bula vakatauvimate nira vakabauta na Kalou kei na nona vosa ni yalayala. Raica mada qo e va na kena ivakaraitaki.

 YEIMY

Niu yabaki 11, au sa veitosoyaki ga ena idabedabe qiqi. Au sega mada ga ni cakava rawa na cakacaka rawarawa, me vaka na kena laveti eso na ka mamada.

Niu yabaki lima, e tauvi au e dua na mate e vakaleqa na masela ni yagoqu na muscular dystrophy, e yalana sara ga na ka meu cakava. Au yalolailai ena so na gauna niu sega ni cakava rawa na ka era cakava noqu icaba. Ia erau vakacegui au vakayago, vakayalo tale ga na noqu itubutubu kei ira na mataveitacini ena ivavakoso. Au sa veiqaravi tiko vakatabakidua, era dau tomani au na mataveitacini ena vuli iVolatabu.

E tukuna o Jisu ni siga yadua e tu vata kei na kena lomaocaoca. (Maciu 6:34) Au saga meu kauaitaka mada ga e dua na siga, au tekia tale ga eso na isausau au rawa ni sauva. Au vakanamata tu ina vuravura vou ni Kalou niu sa na rawata na “bula dina,” niu sa na galala vakadua mai na tauvimate bibi qo.—1 Timoci 6:19.

Mo vakasamataka: E raica o Yeimy ni yaga me “tekia na isausau e rawa ni sauva.” O na vakatotomuri koya vakacava?—1 Korinica 9:26.

 MATTEO

E tekivu mosi na dakuqu niu se yabaki ono, ratou mani kaya na vuniwai ni mosi ya e lako vata kei na noqu tubu. Ni oti e dua na yabaki, sa qai laurai ni dua na vuce e tiko ena noqu suitu.

Au mani sele, eratou kauta tani rawa na dauniveisele e 40 na pasede na vuce. Ia ena loma ga ni rua na vula, e lesu tale mai na vuce! Tekivu ena gauna qori, au sa dau laurai vakalevu vei vuniwai, caka vei au e levu na veiqaravi, au sa qai yalolailai ga.

Ena so na gauna, e mosi na vuce qori me vaka niu suasualaki, vakabibi na dakuqu kei na serequ. Ia au sega ni via vakasamataka vakalevu na kequ ituvaki. Au vakasamataka nira vosota tale tiko ga eso na ituvaki mosimosi, ia se donu tiko ga nodra rai. E vukei au vakalevu me donu noqu rai niu nuitaka na vosa ni yalayala ni Kalou o Jiova me vakaotia na rarawa.—Vakatakila 21:4.

Mo vakasamataka: Mo vosota tiko me vakataki Matteo, ena yaga vakacava nomu vakasamataka na vosa ni yalayala ni Kalou me vakaotia na rarawa?—Aisea 65:17.

 BRUNA

Niu sega ni rairai tauvimate, era nanuma eso niu gogo. Ia na kena dina, e dredre vei au meu cakava eso na cakacaka lalai, vuli lesoni, seu duri mai na loga.

Niu yabaki 16, e tauvi au na mateniua, e bau vakararawataki au dina qai vakaleqa na noqu cakacaka kei na noqu solia noqu vinaka kece ena itavi vaKarisito. Au wilika vakavica na 1 Pita 5:7, e tukuna: “Moni biuta vua [na Kalou] na nomuni lomaocaoca kece, ni kauaitaki kemuni o koya.” E vakaukauataki au ni tukuni ni kauaitaki keda yadua o Jiova me yacova mai nikua.

Mo vakasamataka: Me vakataki Bruna, ena yaga vakacava vei iko nomu biuta vei Jiova na nomu lomaocaoca?—Same 55:22.

 ANDRÉ

Era raici au eso me vaka e dua na gone yabaki 10. Au sega ni beitaki ira baleta ni va ga qori na kequ irairai.

Niu yabaki rua e tauvi au e dua na mataqali kenisa, e tekivu mai na noqu suitu me yaco ina noqu mona. Era kauta laivi na mate na vuniwai ia na veiqaravi e caka vei au e vakaleqa na noqu tubu. Nikua, na kequ balavu e 1.37 na mita. Levu era nanuma niu lasutaki ira niu tukuna niu sa yabaki 18!

Ena ivavakoso, era dokai au na mataveitacini. Era sega ni vagonelailaitaki au me vaka era cakava na gone e koronivuli. Au saga me donu na noqu rai me baleta na kequ ituvaki. Io, au marau niu mai kilai Jiova, na ka vinaka e rawa ni vakila e dua! Se mani ka dredre cava au sotava, au vakadeitaka ni na karoni au o Jiova. Niu vakasamataka na vuravura vou e yalataka na Kalou o Jiova, e vukei au me donu tiko ga noqu rai.—Aisea 33:24.

Mo vakasamataka: Na cava e tukuna kina o André ni “ka vinaka e rawa ni vakila e dua” na nona mai kilai Jiova?—Joni 17:3.