Vakatakila e Vola o Joni 4:1-11
4 Oti qo au raica ni tadola e dua na katuba mai lomalagi, na imatai ni domo au rogoca e vaka na biukila, e kaya vei au: “Lako mai cake qo, au na vakaraitaka vei iko na ka e dodonu me yaco.”
2 Ni oti na ka kece qo e sobuti au na kaukaua ni yalo tabu, au raica e dua na idabedabe vakaturaga ni tu mai lomalagi, e dabe tiko e dua ena idabedabe vakaturaga.+
3 O koya e dabe tiko kina e vaka na vatu jasipa+ kei na vatu satiusa* na kena irairai, qai wavokita na idabedabe vakaturaga na drodrolagi e vaka na emeralita na kena irairai.+
4 E wavokita na idabedabe vakaturaga qo e 24 tale na idabedabe vakaturaga, au qai raica nira dabe tiko kina e 24 na qase+ era tokara na isulu vulavula, e toka e uludra na isalanitui koula.
5 E lako mai na idabedabe vakaturaga na liva,+ e rogo na domo kei na kurukuru,+ e toka tale ga ena mata ni idabedabe vakaturaga e vitu na cina e caudre tiko, qo e vakaibalebaletaka na vitu na yalo ni Kalou.+
6 E tiko ena mata ni idabedabe vakaturaga e dua na wasawasa iloilo+ e vaka na karisitala.
Eratou tiko volekata, eratou wavokita tale ga na idabedabe vakaturaga e va na kabula,+ e robota na yagodratou na yalokanimata, e liu vaka kina e muri.
7 Na imatai ni kabula e vaka na laione,+ na ikarua ni kabula e vaka na luvenibulumakau tagane,+ na ikatolu ni kabula+ e vaka na mata ni tamata, kei na ikava ni kabula+ e vaka na ikeli e dau vuka.+
8 E yaono na tabadratou na va na kabula qo, e robota na tabadratou kei na ruku ni tabadratou na yalokanimata.+ Eratou sega ni cegu ena siga kei na bogi ena nodratou kaya: “E savasava, e savasava, e savasava o Jiova*+ na Kalou, o koya e Kaukaua Duadua, o koya e bula e liu, o koya e bula tiko qo, o koya tale ga e lako tiko mai.”+
9 Ena gauna kece eratou vakalagilagia, eratou vakarokoroko, eratou vakavinavinaka tale ga na kabula vei koya e dabe tiko ena idabedabe vakaturaga, o koya e tawamudu na nona bula,+
10 era tekicuva na 24 na qase+ vei koya e dabe tiko ena idabedabe vakaturaga mera sokalou vei koya e tawamudu na nona bula, era biuta tale ga na nodra isalanitui ena mata ni idabedabe vakaturaga ra qai kaya:
11 “E ganiti kemuni Jiova,* na neimami Kalou, me nomuni na lagilagi,+ na vakarokoroko,+ kei na kaukaua,+ ni oni bulia na ka kece,+ ena nomuni lewa era bula, era buli kina.”
