O vakabauta ni bulia na ka kece na Kalou? Ke o vakabauta dina, sega ni o iko ga e va qori nomu rai. E levu tale ga na itabagone kei na uabula era duavata kei iko. Ia eso tale era vakabauta ni sega ni veibuli o koya e “Cerere Duadua.”

O bau kila? Levu vei ira era vakabauta na ka e buli kei na bula vakaidewadewa e dau totolo nodra kaya na cava era vakabauta, ira e sega ni matata vei ira na vuna era vakabauta kina.

• Eso era vakabauta ni bulia na ka kece na Kalou ni vakavulici mai valenilotu.

• E levu era vakabauta na bula vakaidewadewa nira vakavulici kina mai koronivuli.

Ena uqeti iko na ulutaga qo mo vaqaqacotaka qai vakamacalataka na ka o vakabauta me baleta na veika buli. Se bera qori, ena vinakati taumada mo taroga eso na taro va qo:

Na cava e bibi kina na taro qori? E uqeti iko na iVolatabu mo vakayagataka nomu vakasama kei na “yalomatua.” (Roma 12:1) Me kua ni vakatau nomu vakabauta na Kalou ena

• ivakarau ni lomamu (Au kila ni tiko e dua e cecere duadua)

• na ka era tukuna eso tale (Au vakaitikotiko kei ira na daulotu)

• veimurimuri (Rau susugi au noqu itubutubu meu vakabauta na Kalou​—se ke sega)

E dodonu mo vakadeitaka vakataki iko ni bula dina tiko na Kalou, me dei nomu vakabauta.

O vakadeitaka vakacava ni bula dina tiko na Kalou? Ena yaga vakalevu vei iko na ulutaga e tiko ena ka Me Vakaleweni “Na Cava Au Vakabauta Kina na Kalou?” Ena vukei iko tale ga na ka era kaya eso na itabagone.

“Niu rogoca na nona vakamacalataka tiko o noqu qasenivuli na sala e cakacaka kina na yagoda, au vakabauta sara ga ni bula dina tiko na Kalou. E tiko kece na nodra itavi na duidui tikiniyago, ena ka lalai sara ga. Eda sega mada ga ni kila na ka era cakava. E vakatubuqoroqoro dina!”​—Teresa.

“Niu raica e dua na tabavale, na waqa ni saravanua se na motoka, au dau taroga, O cei e buli ira?’ E bulia na motoka e dua na tamata vuku. Baleta me cici na motoka, ena vinakati mera cakacaka vata na kena gacagaca lalai. Ke bulia na motoka e dua na tamata, e tiko tale ga e dua e buli keda.”​—Richard.

“Ke o vakasamataka ni taura e vica vata na drau na yabaki mera qai kila na tamata vuku e dua mada ga na iwase lailai kei vuravura. Ena ka vakalialia meda qai sega ni vakabauta ni bulia na vuravura qori e dua e tu vua na vuku!”​—Karen.

“Na levu ga ni noqu vulica na ka vakasaenisi, sa seavu tale ga noqu vakabauta na bula vakaidewadewa. Kena ivakaraitaki, au vakasamataka na veika vakafika me baleta na veika buli kei na vakasakiti ni keda ibulibuli, eda mataqali tamata vakacava, eda vu mai vei, kei na noda icavacava. Na inaki ni bula vakaidewadewa me vakamacalataka na veika va qori kei na nodra bula na manumanu. Ia e sega ni rawa ni vakamacalataka na vuna eda duatani kina na tamata. Au raica ni vinakati e levu na ‘ivakadinadina’ mo vakabauta kina na bula vakaidewadewa mai nomu vakabauta na Dauveibuli.”​—Anthony.

Vakacava ke ra vakalialiai iko nomu lewenikalasi ni o vakabauta e dua na ka o sega ni raica? Vakacava ke ra kaya ni “ivakadinadina” ni bula vakaidewadewa na veika vakasaenisi?

Kena iMatai, mo vakadeitaka na ka o vakabauta. Kua ni o cudru se madua. (Roma 1:16) Mo nanuma tiko qo:

1. Sega ni o iko ga o sotava tiko qori, levu era se vakabauta tiko ga na Kalou. Wili kina o ira na tamata vuku kei ira na vuli vinaka. Kena ivakaraitaki, era vakabauta eso na saenitisi ni bula dina tiko na Kalou.

2. Nira kaya eso nira sega ni vakabauta na Kalou, de dua era sega ga ni kilai koya vinaka. Qori e vakavuna mera taroga eso na taro va qo, “Ke bula dina na Kalou, na cava eda sotava kina na rarawa?” E vakavuna qori nodra lomatarotaro e levu.

3. Me kauaitaki nodra “bula vakayalo” na tamata. (Maciu 5:3) Wili kina nodra vakabauta ni bula dina tiko na Kalou. Ke dua e vakabauta ni sega ni bula dina na Kalou, me vakamacalataka sara ga o koya na vuna, sega ni o iko.​—Roma 1:18-20.

4. E tiko na vuna meda vakabauta kina na Kalou. E tiko na ivakadinadina ni sega ni tu tu ga eda sa basika. E sega tale ga na ivakadinadina nida basika mai ena dua na ka mate.

Na cava mo tukuna ke dua e taroga na vuna o vakabauta kina na Kalou? Dikeva mada qo eso.

Ke tukuna e dua: “Era vakabauta ga na Kalou o ira na sega ni vuli.”

O na rawa ni kaya: “O vakabauta dina na ivakavuvuli qori? Au sega ni duavata kina. Era vakaitavi ena dua na vakadidike e sivia na 1,600 na parofesa vakasaenisi ena univesiti, e dua na ikatolu era vakabauta na Kalou. * Nira vakabauta na Kalou na parofesa qori, o na kaya nira sega ni vuku?”

Ke tukuna e dua: “Ke bula tiko na Kalou, na cava eda sotava tiko kina na rarawa?”

O na rawa ni kaya: “De dua o sega ni taura rawa na cakacaka ni Kalou​—de dua ni sega ni tarova na noda rarawa. E dina ya? [Waraka me sauma.] E vakacegui au sara ga niu mai kila na vuna eda sotava tiko kina na veika rarawa. Me matata, ena vinakati mo kila vinaka e levu tale na vakavuvuli vakaivolatabu. O via kila e levu tale na ka?”

Ena vakaraitaki ena ulutaga e tarava na vuna e sega ni vakacegui ira kina e levu na ivakavuvuli ni bula vakaidewadewa.