Kila na ka dina me baleta na iyaloyalo vakasisila. Na iyaloyalo vakasisila e beci kina e dua na ka a bulia na Kalou e dodonu me rokovi. Noda kila qo ena vukei keda meda cata na ka ca.—Same 97:10.

 Na kena ca. Na iyaloyalo vakasisila e vakalolovirataki ira na vakaraitaki kina. E beci tale ga kina o koya e sarava. Oya na vuna e tukuna kina na iVolatabu: ‘O koya e yalomatua e raica na ca qai vunitaki koya.’—Vosa Vakaibalebale 22:3.

 Ka mo vakadeitaka. E kaya na tamata yalodina o Jope: “Au sa veiyalayalati oti meu kua vakadua ni raica vakatani e dua na goneyalewa.” (Jope 31:1, Today’s English Version) Qo eso na ka o rawa ni vakadeitaka:

•  Au na sega ni vakayagataka na internet niu tiko taudua.

•  Au na bokoca totolo e dua na site e sega ni dodonu meu raica.

•  Au na kerea nona veivuke e dua na itokani matua ke dredre noqu biuta na saravi ni iyaloyalo vakasisila.

 Masulaka. E vakamamasu na daunisame vua na Kalou o Jiova: ‘Ni vagolea tani na mataqu meu kua ni raica na ka tawayaga.’ (Same 119:37) E vinakata o Jiova mo qaqa, ke o masuti koya ena vakaukauataki iko mo cakava na ka dodonu!—Filipai 4:13.

 Veitalanoa kei na dua. Bibi mo digia e dua na itokani nuitaki mo drau veitalanoataka na nomu leqa.—Vosa Vakaibalebale 17:17.

 Nanuma Tiko: Na gauna kece o vorata kina na iyaloyalo vakasisila, o sa qaqa tiko. Talaucaka vei Jiova na tikina qori qai vakavinavinakataka na kaukaua e solia mo cakava rawa kina. Ni o cata na iyaloyalo vakasisila, o sa vakamarautaka na lomana!—Vosa Vakaibalebale 27:11.