Raica sara na lewena

RA TAROGA NA ITABAGONE

Ka Meu Kila me Baleta na Qito

Ka Meu Kila me Baleta na Qito

Na qito e rawa ni yaga, rawa tale ga ni ca. E vakatau ena qito o qitora, kei na levu ni gauna o vakayagataka kina.

 E yaga vakacava na qito?

Na qito e rawa ni veivuke ena noda bulabula vinaka. E kaya na iVolatabu ni ‘yaga na vakaukaua yago.’ (1 Timoci 4:8.) E kaya o Ryan e dua na cauravou: “Na qito e sala vinaka ni vakaukaua yago, e vinaka cake mai na qito ena kompiuta.”

E veivuke ena noda cakacaka vata kei na noda lewai keda vinaka. E cavuti ena iVolatabu e dua na ivakatautauvata ni qito me vakavulici keda ena dua na tikina bibi. E kaya na iVolatabu: “Levu era cici ena veitaucici, ia e dua ga e vakaicovi.” E kaya tale: “O ira kece na vakaitavi ena dua na veisisivi, era na lewai ira vinaka sara ena ka kece.” (1 Korinica 9:​24, 25) Cava eda vulica kina? E vinakati na cakacaka vata ena gauna ni qito, e vinakati tale ga meda lewai keda vinaka meda muria kina na lawa ni qito. E tokona na vakasama qori e dua na itabagone o Abigail, e kaya: “Na qito e vakavulici au meu dau cakacaka vata qai veivosaki kei ira eso tale.”

Rawa ni kunea kina nomu itokani. Na qito e vanua ni sotasota. E kaya e dua na cauravou o Jordan: “Voleka ni qito kece e laurai kina na yalo ni veisisivi. Ia ke biu vakatikitiki na veisisivi, me gauna ga ni marau na qito, o na kunea e levu nomu itokani ena gauna ni qito.”

 Cava e rawa ni vakavuna me ca na qito?

Mataqali qito o digia. E kaya na iVolatabu: “O Jiova e vakadikevi koya e yalododonu kei koya e daucaka ca. E cati ira kece na taleitaka na itovo kaukaua.”​—Same 11:5.

Eso na qito e vakayacori kina na ivalavala kaukaua. Kena ivakaraitaki, e kaya e dua na goneyalewa o Lauren: “Na inaki ni veivacu mo vakamavoataka na kemu ikarua. Eda sega ni dau veivala na lotu vaKarisito, sega gona ni dodonu me ka marautaki vei keda na noda sarava na nodra vaculaki eso tale.”

Me vakasamataki: Ke o nanuma ni o na sega ni cakava na ivalavala kaukaua ke o vakaitavi se sarava ga na qito e vakayacori kina na itovo kaukaua, ia e duatani na ka e kaya na Same 11:5. O Jiova e cata na tamata e “taleitaka na itovo kaukaua,” sega ni o koya ga e cakava na ivalavala kaukaua.

iVakarau ni yalo. E kaya na iVolatabu: “Moni kua ni cakava e dua na ka ena veileti se yalo ni nanumi koya ga, ia moni yalomalumalumu ena nomuni okati ira na kena vo mera uasivi kemuni.”​—Filipai 2:⁠3.

Se mani cava e caka, ena laurai kina na yalo ni veisisivi ke rua tiko na ito. Ena sega ni marautaki na qito ke tiko na ivakarau ni rai qo, ‘O yau meu wini se mani cava e yaco.’ E kaya e dua na itabagone o Brian: “E rawarawa sara ni curumi iko na yalo ni veisisivi. Na vinaka ga ni nomu qito, na levu tale ga ni kena vinakati mo yalomalumalumu.”

Me vakasamataki: E kaya e dua na cauravou o Chris: “Keimami dau qito soka e veimacawa, eso era mavoa kina.” E vinaka mo taroga, ‘Na cava e dau vakavuna vakalevu na mavoa? Na cava meu cakava me kua ni levu kina na mavoa?’

Gauna e vakayagataki ena qito. E kaya na iVolatabu: “Vakadeitaka . . . na veika era bibi sara.”​—Filipai 1:​10.

Me donu na ka o vakaliuca, e dodonu me bibi duadua na veika vakayalo. Levu na qito e dau kania na gauna, se o mani vakaitavi kina se sarasara tu ga. E kaya e dua na goneyalewa o Daria: “Keirau dau veiba kei Na ena levu ni gauna au dau sara qito kina ena tivi, ni rawa ni vakayagataki na gauna qori ena so tale na ka yaga.”

Nomu vakabibitaka na qito e vaka ga nomu vakamasimataka vakasivia na kemu

Me vakasamataki: O dau rogoci rau nomu itubutubu ni rau vakasalataki iko ena veika mo vakabibitaka? E kaya e dua na goneyalewa o Trina: “Ni keitou dau sara qito vakaveitacini qai sega ni caka eso na ka bibi, e dau kaya o Na nira na saumi ga na dauqito ke keitou sarasara se sega. E dau tarogi keitou, ‘Ia o cei e saumi kemudou?’ A via kaya tiko o Na nira sa cakacaka rawa tu na dauqito. Ia ke keitou vakaweleweletaka neitou ka ni vuli se so tale na itavi bibi, sega ni macala keitou na bula vakacava ena gauna se bera mai. E via vakaraitaka tiko ga vei keitou o Na ni sega ni dodonu me ka bibi duadua ena neitou bula na qito se na sara qito.”