Raica sara na lewena

RA TAROGA NA ITABAGONE

Cava Meu Kere Veivosoti Kina?

Cava Meu Kere Veivosoti Kina?

Cava o na cakava ena ituvaki qo?

  1. E cudruvi iko nomu qasenivuli ni o gone ca tiko ena kalasi.

    Vakacava e dodonu mo kere veivosoti vua, ke o nanuma ni sa sivia tale nona cudru?

  2. E rogoca nomu itokani ni o vakaucacataki koya.

    Vakacava e dodonu mo kere veivosoti vua, ke dina mada ga na ka o tukuna?

  3. O cudruvi nomu ta o qai vosa lesu vua.

    Vakacava e dodonu mo kere veivosoti vua, ke o kila mada ga ni cudruvi iko?

Na isaunitaro kece qori na io. Ia cava na vuna mo kere veivosoti kina ke o donu mada ga?

 Vuna mo kere veivosoti kina

  • Vakaraitaka ni o yalomatua. Ni o vakadinata ni cala na ka o tukuna se cakava, qori e dusia ni o vakaraitaka tiko eso na itovo ena yaga vakalevu ni o sa uabula.

    “Na yalomalumalumu kei na vosovoso ena uqeti keda meda kere veivosoti, eda na vakarorogo tale ga.”—Rachel.

  • Uqeta na veiyaloni. O ira na kere veivosoti era na saga mera dau veiyaloni, ia era na sega ni kaya nira dina, e cala o koya kadua.

    “Ke o kila mada ga ni o dina, e bibi ga mo kere veivosoti. E sega ni saumi noda kaya ‘Vosoti au,’ ia e rawa ni vinaka tale kina na veitokani.”—Miriam.

  • Vakila na vakacegu. Ke o vakamosia na yalona e dua ena ka o tukuna se na ka o cakava, e vaka e dua na icolacola bibi. Ni o kere veivosoti, ena taluva vei iko na icolacola qori. *

    “Eso na gauna au dau vosa vakariri vei ta se o na, ia e dredre meu kere veivosoti. Ia niu kere veivosoti, au vakila na lomavakacegu niu vakavuna tale na veiyaloni ena vuvale.”—Nia.

    Ni o veivutunitaka na ka o cakava ena rawa ni vaka e dua na icolacola bibi, ia o na vakila na bula vakacegu ni o kere veivosoti

E ka ni sasaga na kere veivosoti? Io! Kena ivakaraitaki, o Dena e dua na goneyalewa e dau kere veivosoti vakavica vei tinana ni dau viavialevu vua. E kaya: “E sega ni ka rawarawa meda kaya ‘Vosoti au.’ Vaka ga e dua na ka e tao tiko ena noqu itilotilo me tarova na noqu vosa!”

 O na cakava vakacava?

  • Ke rawa, lai kere veivosoti sara ga vua. Ni o cakava qori, ena kila o koya ni o veivutunitaka dina na ka o cakava. Ke o kere veivosoti ni o text ena talevoni, ena sega ni vakabauti iko. Ke o vakauta mada ga e dua na ivakatakilakila ni irairai ni mata e rarawa tu (emoji), ena sega ni vakabauti iko.

    Vakatutu: Ke o sega ni rawa ni lai raici koya mo kere veivosoti, tovolea mo qiri se vola vua e dua na kad. Se mani cava o via cakava, tuvana vinaka nomu vosa.

    iVakavuvuli vakaivolatabu: “Na loma ni tamata yalododonu e vakasama mada qai vosa.”—Vosa Vakaibalebale 15:28.

  • Kere veivosoti ena kena gauna totolo duadua. Ke o yaraka tiko mo kere veivosoti, ena levu ga na leqa, ena vakaleqa tale ga nomu veimaliwai kei koya o vakararawataka.

    Vakatutu: Biuta e dua na isausau. Me va qo, ‘Au na kere veivosoti nikua.’ Vakadeitaka na gauna mo kere veivosoti kina, qai cakava sara.

    iVakavuvuli vakaivolatabu: “Veiyaloni vakatotolo.”—Maciu 5:25.

  • Kere veivosoti mai vu ni lomamu. Ke o kaya “Vosoti au ni va qori na nomu rai,” qori e sega ni kere veivosoti! E kaya o Janelle: “Ena dokai iko o koya o vakararawataka ke raica ni o kaya vakadodonu ni bale ga vei iko na cala o cakava.”

    Vakatutu: Mo kere veivosoti eliu. Kua ni kaya, “Au na kere veivosoti ga ke o kere veivosoti mai liu.”

    iVakavuvuli vakaivolatabu: “Meda guta mada ga na bula veiyaloni.”—Roma 14:19.

^ para. 19 Ke o vakayalia se vakacacana na ka e sega ni nomu, ena ka vakayalomatua mo kere veivosoti, mo sauma lesu tale ga.