Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Ena Yaga Vakacava Vei au na iVolatabu?—Wase 1: Kila Nomu iVolatabu

Ena Yaga Vakacava Vei au na iVolatabu?—Wase 1: Kila Nomu iVolatabu

E kaya o Briana: “Au dau saga meu wili iVolatabu, ia sa rui balavu!”

E dau va tale ga qori nomu rai? E rawa ni vukei iko na ulutaga qo!

 Vuna me wiliki kina na iVolatabu

Vakacava e dau vakavucesa na wili iVolatabu? Ke vaka kina, sega ni o iko ga o vakila tiko qori. O na rairai kaya ni vinaka cake na sara tivi kei na vidio mai na wili iVolatabu, ni udolu na tabana, e lailai na matanivola qai sega na itaba!

Ia vakasamataka mada va qo: Ke o kunea e dua na katoniyau talei e makawa, sega ni vakabekataki o na via kila na ka e tiko e loma.

E dua gona na katoniyau talei na iVolatabu. E tu kina e levu na vatu talei me vaka na vuku e rawa ni vukei iko mo

  • Vakatulewa vinaka

  • Veimaliwai vinaka kei rau nomu itubutubu

  • Kunea na itokani dina

  • Vosota na lomaocaoca

E se yaga tiko ga vakacava nikua na ivola makawa qori? Baleta ni “vakavuna na Kalou na iVolatabu kece.” (2 Timoci 3:​16) E vakadeitaka qori ni yavutaki vinaka na ivakasala e tu kina.

Na katoniyau talei na iVolatabu e tu kina na vatutalei me vaka na vuku

 Sala mo wilika kina na iVolatabu

Dua na sala oya mo wilika taucoko na iVolatabu. O na kila kina na itukutuku kece e umani ena iVolatabu. E levu na sala o rawa ni wilika kina na iVolatabu. Dikeva e rua na kena ivakaraitaki:

  •  O rawa ni wilika taucoko na 66 na ivola ena iVolatabu, mai na Vakatekivu ina Vakatakila.

  •  O rawa ni wilika na ka e yaco veitaravi se na veitaravi ni gauna e yaco kina.

Vakatutu: O na raica ena iKuri A7 ni Vakadewa ni Vuravura Vou na veitaravi ni ka e yaco ni se bula e vuravura o Jisu.

Na ikarua ni sala mo wilika kina na iVolatabu oya mo digia e dua na italanoa e veidonui vinaka kei na ituvaki o sotava tiko. Kena ivakaraitaki:

Vakatutu: Ni o wili iVolatabu, e vinaka me vakanomodi na vanua o wiliwili kina, me kua kina ni gole tani nomu vakasama.

Na ikatolu ni sala oya mo digia e dua na italanoa ena iVolatabu se Same. Wilika, qai vakasamataka se cava o vulica kina. Ni oti nomu wiliwili, qai vakasamataka eso na taro va qo:

  •  Na cava e biuta kina qo o Jiova ena iVolatabu?

  •  Na cava e vakaraitaka qo me baleta na itovo i Jiova kei na sala e dau vakayacora kina na ka?

  •  Au na muria vakacava na ka au vulica kina?

Vakatutu: Vakayagataka na New World Translation study edition mo raica kina na vidio, mape, kei na so tale na ivukevuke me yaga kina nomu wili iVolatabu.