Sa dua toka na gauna nomu veibuku tiko, ia vaka mo sa vakatitiqa. Vakacava o via tomana tiko ga se mo sa tinia? Ena vukei iko na ulutaga qo ena ka mo vakatulewataka.

Ena ulutaga qo

•  Ni o vakatitiqa

•  Ni o vakatulewa

•  Ke o vakatulewataka mo tinia na veibuku

 Ni toso tiko nodrau veibuku e dua na cauravou kei na dua na goneyalewa, de dua rau na liaca ni tiko eso na ka rau duidui kina. Kena ivakaraitaki:

•   Dua e taleitaka na gole i matasawa, dua tale e vinakata na taubale ena veiulunivanua.

•   Dua e vosalevu, dua tale e galugalu tu ga.

•   Dua e dau cakava na ka ena veiwali, dua tale e raica vakabibi na ka.

 O na raica ni duidui sara na ituvaki kece qori. Na kena imatai e sega ni tautauvata na ka rau taleitaka, na kena ikarua e duidui na nodrau itovo, na kena ikatolu e sega ni tautauvata rau vakabibitaka.

 Vakasamataka mada: Na tolu na ituvaki qori, i vei o nanuma ni na dredre ke mani yaco mo drau vakawati? Se na ituvaki cava drau rawa ni vakavinakataka?

 E rawa ni duidui sara na ka rau taleitaka na veiwatini se na nodrau itovo. Ia rau se rawa ni marautaka tiko ga nodrau vakawati. Ni tautauvata na ka rau taleitaka, sega ni kena ibalebale qori ni rau sa tautauvata ena ka kece. Ena so na ituvaki, e rawa ni rau marautaka na ka e taleitaka e dua vei rau, se rawa ni rau vuli mai na nodrau dui itovo.  a

 Ia e vinaka me tautauvata na ka o vakabibitaka kei koya o vakawatitaka, me vaka na ka vakayalo, nomudrau itovo kei na nomudrau vakaduiduitaka na ka e donu kei na ka e cala. Ke sega, e vinaka mo sa tinia nomudrau veibuku.

 Kena ivakaraitaki, dikeva mada na duidui ni vakabauta vakalotu. E kaya na ivola Fighting for Your Marriage: “Laurai ena levu na vakadidike nira dau veisere vakalevu o ira na veiwatini e duidui nodra vakabauta.”

 iVakavuvuli vakaivolatabu: “Kua ni cakacaka vata kei na dua e sega ni vakabauta, ni oni sega sara ga ni tautauvata.”—2 Korinica 6:14, Good News Translation.

 E kaya na iVolatabu o ira na vakawati era “na vakila na mosi kei na rarawa.” (1 Korinica 7:28, The New English Bible) Kua gona ni kidroa ni o na sotava qori ena gauna drau veibuku tiko kina.

 Ke basika eso na duidui lailai e sega ni kena ibalebale mo sa tinia nomudrau veibuku. O rawa ni taroga, Vakacava au rawa ni walia ena yalovinaka? Io ena vinakati mo drau bucina na itovo qori ni bera ni drau vakawati.

 iVakavuvuli vakaivolatabu: “Moni veilomani, ni veinanumi, ni yalorawarawa moni veivosoti.”—Efeso 4:32.

 Ia ke levu na ka drau sega ni duavata kina, e rawa ni dusia qori ni na sega ni rawa ni tini vinaka nomudrau veibuku. Ke dina qori, e vinaka mo kila rawa tiko ni bera ni drau qai vakawati!

 Bibi me nanumi: Ke o vakatitiqataki koya drau veibuku tiko se lomatarotarotaka ke sa veiganiti mo vakawati, ena vinaka mo raica vakabibi qori!

 iVakavuvuli vakaivolatabu: “O koya e yalomatua e raica na ca qai vunitaki koya, ia na yalowai e lako tu yani qai yacovi koya na leqa.”—Vosa Vakaibalebale 22:3.

 E rawa ni mosimosi ni cegu na veibuku. Ia ke dua vei kemudrau e vakatitiqataka nomudrau veibuku, de dua ena vinaka mo drau tinia.

 O na cakava vakacava qori? Mo kua ni tukuna ena text se email me sa cegu nomudrau veibuku. Ia digia e dua na vanua kei na gauna veiganiti mo drau veitalanoataka kina.

 iVakavuvuli vakaivolatabu: “Moni dui tukuna na ka dina.”—Sakaraia 8:16.

 Vakacava mo yalolailai beka ni sa cegu nomu veibuku? Sega. Nanuma tiko, na veibuku ena vukei iko mo vakatulewataka ke ganiti koya me watimu se sega. Ke mani tini mada ga nomu veibuku, o sa rawa ni vulica kina eso na ka mo vakavinakataka.

 Mo taroga: ‘Na cava au vulica ena veibuku qo? Vakacava e tiko eso na ka meu vakavinakataka? Na cava au rawa ni cakava keu mani veibuku tale?’