Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Na Cava Meu Kauaitaka Kina na Noqu iSulusulu?

Na Cava Meu Kauaitaka Kina na Noqu iSulusulu?

E tukuni iko nomu isulusulu, ya na vuna e bibi kina mo kauaitaka na ka o dara. Na cava e tukuna me baleti iko nomu isulusulu?

 Tolu na rai cala, kei na sala mo vorata kina

iMatai ni rai cala: Me lewa nomu isulusulu na tabana ni itukutuku.

E kaya e dua na goneyalewa o Theresa: “Na levu ni itukutuku ni veivoli e biu mai me baleta e dua na mataqali isulu, e vakavuna meu via muria na isulusulu va ya ena so na gauna. Na levu ga ni nomu vakasamataka na itaba ni isulu o raica, na levu ga ni nomu vinakata na isulu va ya.”

E sega ni bacani ira ga na yalewa na itukutuku ni veivoli. E kaya na ivola The Everything Guide to Raising Adolescent Boys: “E bacani ira tale ga vakalevu na tagane na itukutuku ni veivoli. Sa ra tekivu taketetaki ira sara ga na gonetagane na dauveivoli nira se gone.”

Ka mo cakava: E kaya na iVolatabu: “Na tamata yalowai e vakabauta na vosa kece, ia o koya e yalomatua e vakasamataka na nona ilakolako kece.” (Vosa Vakaibalebale 14:15) O rawa ni muria na ivakavuvuli ya ena nomu vakalewa vinaka na itukutuku ni veivoli o raica. Kena ivakaraitaki, ni o raica na itukutuku ni veivoli e vakaraitaki kina na isulu “veivagarogaroi,” e vinaka mo taroga:

  • ‘O cei ena yaga vakalevu vua keu muria na isulusulu ya?’

  • ‘Na cava ena tukuna me baleta noqu ivakarau ni bula?’

  • ‘Vakacava qori dina na noqu ivakarau ni bula kei na ka au vakavulici kina?’

Vakatutu: Vakaraica vinaka me dua na macawa na itukutuku ni veivoli kei na ka e vakaraitaki ena so tale na tabana ni itukutuku me baleta na isulu. Na ivakarau ni bula cava e uqeta? Vakacava e vakaraitaki ena itukutuku ni dodonu mo muria e dua na ivakarau sa ra muria tiko e levu? E kaya e dua na goneyalewa o Karen: “E kaukaua na veivakamuai me rairai vinaka kina e dua, dara na isulu totoka qai vakaraitaka na maresa ni yagona. Era kila qori o ira na dau vakarautaka na itukutuku ni veivoli ra qai taketetaki ira vakalevu na itabagone.”

iKarua ni rai cala: Muria na isulusulu sa takalevu tu nikua mo taleitaki kina.

E kaya e dua na gonetagane o Manuel: “Ni taka vou mai e dua na mataqali isulusulu, sa macala ga nira na muria e levu. Ke o sega ni muria, o na vakalewai.” E tokona qori e dua na goneyalewa o Anna: “Na levu wale ga ni nona vinakata e dua me taleitaki e lai muria kina na mataqali isulusulu e taka vou mai.”

Ka mo cakava: E tukuna na iVolatabu: “Kua ni muria na ivakarau ni veika vakavuravura qo.” (Roma 12:2) O rawa ni muria na ivakavuvuli qori ni o raica na nomu isulu qai taroga:

  • ‘Au digitaka vakacava na noqu isulu?’

  • ‘E bibi meu dara na isulu e cakava mai e dua e kilai levu?’

  • ‘Au dau via vakadrukai ira eso tale ena noqu isulusulu?’

Vakatutu: Kua ni leqataka e vou se taleitaki nomu isulusulu, se madra qai sega ni taleitaki. E bibi cake me kilai ni o nuidei, o rawa ni vakatulewa ga vakataki iko. Qori ena vukei iko mo lomavakacegu qai sega ni nuiqawaqawataka na ka mo cakava mo taleitaki kina.

iKatolu ni rai cala: Levu ga ni kena ‘veivagarogaroi, kena vinaka.’

E kaya e dua na goneyalewa o Jennifer: “Meu tukuna vakadodonu, au dau via dara sara ga ena so na gauna na isulu e veivagarogaroi, me vaka na kena e rui lekaleka, kabita na yago, qai ka lalai.”

Ka mo cakava: E kaya na iVolatabu: “Me kua ni kemuni idivi na veika e sau . . . me kemuni idivi ga na tamata e loma.” (1 Pita 3:3, 4) Ni o muria na ivakasala qori, vakacava e vinaka cake na isulu e dreta na mata se na itovo e tara na loma ni tamata?

Vakatutu: Ena vukei iko vakalevu ena nomu vakatulewa me baleta ‘na isulusulu’ na yalomalumalumu. Era na rairai sega ni duavata kei na vakasama qori e levu nikua. Ia vakasamataka ga va qo:

Drau sa bau veitalanoa kei na dua e dau levu nona vosa qai tukutukuni koya? Ena rairai sega sara ga ni kidava o koya ni sa votivoti toka vei iko na ka e cakava!

Na isulusulu e vaka ga na veivosaki, e votivoti ke laurai kina na ‘yalo ni nanumi koya ga’

Qori tale ga na ka ena yaco ke o sega ni qarauna nomu isulusulu. Na isulu o dara ena vakavuna nodra vakaraici iko eso tale. E rawa sara ga nira nanuma ni veilecayaki tu nomu bula, o nanuma ni o dua na ka. E rawa tale ga ni vakauitukutuku cala nomu isulusulu.

Saga mo yalomalumalumu, ena vukei iko qori mo qarauna nomu isulusulu. E kaya e dua na itabagone o Monica: “E sega ni tukuni mo vakaisulu vakataki ira na bubu mo vakaraitaka kina ni o yalomalumalumu. E bibi ga mo veidokai, qai kua ni cakava na ka o na beci kina.”