Raica sara na lewena

RA TAROGA NA ITABAGONE

Au na Walia Vakacava na Lomabibi?

Au na Walia Vakacava na Lomabibi?

 Cava o na cakava?

Dikeva mada e rua na ituvaki qo:

E sega ni marau o Jennifer. E sega ni kilai na vuna e tagi tu ga kina e veisiga. E via tu taudua ga qai sega ni viakana. E sega ni dau moce se vakasama vinaka. E veinanuyaka o Jennifer: ‘Cava sa manati au? Ena va tu ga qo noqu bula?’

Dau qacoya na vuli o Mark qai rawaka vinaka e koronivuli. Ia qo sa bese na vuli sega ni vinaka tale ga nona ka ni vuli. E sega ni via vakaitavi ena qito e dau taleitaka tu e liu. Era sega ni kila nona itokani na cava e leqa vua, rau lomaleqa tale ga nona itubutubu. Vakacava na ka e yacovi Mark qo na veisau ga e dau yaco se dua na leqa sa tiko vua?

Ke o sotava tale ga na ituvaki va qori me vakataki Jennifer kei Mark, na cava o rawa ni cakava? Qo e rua na vakatutu:

  1. Saga mo walia ga vakataki iko

  2. Veitalanoa kei na dua o nuitaka

Ke o sega ni via veitalanoataka nomu leqa o na rairai muria ga na imatai ni vakatutu. Ia e sega ni vinaka qori ni kaya na iVolatabu: “E vinaka na le rua mai na le dua . . . Ke lutu e dua, ena vakaduri koya na kena isa. Ia na cava ena yacovi koya e lutu ni sega ni dua me vakaduri koya?”​—Dauvunau 4:​9, 10.

Kena ivakaraitaki: Kaya mada o gole ina dua na yasayasa e levu kina na basulawa o qai sese. Sa buto na vanua o sega ni kila e dua ena yasayasa ya. Cava o na cakava? E rawa ni o vaqara ga vakataki iko na gaunisala. Ia e vinaka cake mo kere veivuke vua e dua o nuitaka.

E rerevaki na lomabibi me vaka ga e dua na yasayasa e levu kina na basulawa. Eso na gauna ni o rarawa, ena rairai lekaleka ga qai seavu ni toso na gauna. Ia ke o rarawa tiko ena loma ni dua na gauna balavu e vinaka mo kere veivuke.

IVAKAVUVULI VAKAIVOLATABU: “Na tamata e tawasei koya . . . e saqata na vuku kece.”​—Vosa Vakaibalebale 18:1.

E vinaka cake na ikarua ni vakatutu, mo veitalanoa kei na nomu itubutubu se dua na uabula o nuitaka. Ena vukei iko vakalevu nomu veitalanoa kei na dua e walia rawa na lomabibi se so tale na ituvaki e vusolo tu kina na lomana.

O na rairai kaya: ‘Rau sega ni kila noqu itubutubu e dua na ka me baleta na ituvaki au sotava tiko!’ Vakacava rau sega dina ni kila e dua na ka? Ke duidui na kemu ituvaki mai na veika rau sotava ena rairai tautauvata na veika dou vakila. De dua rau kila na iwali ni nomu leqa!

IVAKAVUVULI VAKAIVOLATABU: “Vakaevei e sega ni laurai na vuku vei ira na itabaqase, kei na yalomatua vei ira na bula dede?”​—Jope 12:12.

Me nanumi: Ena yaga dina vei iko na ivakasala o rogoca ni o veitalanoa kei na nomu itubutubu se dua tale na uabula o nuitaka.

Na veika o vakila ni o lomabibi e vaka ga ni o sese ena dua na yasayasa rerevaki. E vinakati ena ituvaki qori mo kere veivuke

 Vakacava ke vinakati mo laurai vakavuniwai?

Ke o lomabibi e veisiga e vinaka mo na laurai sara ga vakavuniwai.

Na ivakatakilakila ni lomabibi e rawa ni tautauvata ga kei na veisau ni ivakarau ni yalo e namaki ni o sa dua na itabagone. Ia e kaukaua cake na ka e vakilai ni o lomabibi, e rawa ni balavu tale ga na kena vakilai voli. Ke sa balavu gona nomu rarawa voli mai qai sega ni oti rawa e vinaka mo kerei rau nomu itubutubu mo lai laurai vei vuniwai.

IVAKAVUVULI VAKAIVOLATABU: “E sega ni yaga na vuniwai vei ira na bula vinaka, e yaga ga vei ira na tauvimate.”​—Maciu 9:​12.

Sega ni dodonu mo madua ke o lomabibi. Levu tale ga na itabagone era dau lomabibi e rawa tale ga ni wali! Era na sega ni raici iko vakatani na nomu itokani dina ke o lomabibi.

Vakatutu: E bibi mo vosovoso. Ena taura na gauna mo qai walia na lomabibi, namaka tale ga ni na vinaka nomu bula ena so na siga, so tale na siga ena sega ni vinaka. *

 Sala mo walia kina na lomabibi

Ke mani vinakati mo laurai vakavuniwai se sega, o rawa ni cakava eso tale na ka mo walia kina na lomabibi. Kena ivakaraitaki, mo vakaukauayago vakalevu, kania na kakana bulabula, qai dau vakacegu vinaka. O rawa sara ga ni vakila na veisau ni o cakava qori. (Dauvunau 4:6; 1 Timoci 4:8) E vinaka mo vola tale ga na veika o dau vakila, nomu isausau, na veika e vakadredretaka nomu sasaga, kei na ka vinaka o sa cakava.

Ni o lomabibi se vusolo mada ga na lomamu ena ituvaki o sotava mo nanuma tiko: O na walia ga na lomabibi ke o ciqoma nodra veivuke eso tale, saga tale ga mo cakava na veika o rawata.

 Tikinivolatabu e rawa ni veivakacegui

  • “E voleka o Jiova vei ira sa ramusu na lomadra, e vakabulai ira sa dasila na yalodra.”​—Same 34:18.

  • “Biuta vei Jiova na nomu icolacola bibi, ena tokoni iko o koya. Ena sega vakadua ni laiva me bale na yalododonu.”​—Same 55:22.

  • “O yau o Jiova na nomu Kalou, au taura tiko na ligamu imatau, o koya e tukuna vei iko, ‘Kua ni rere. Au na vukei iko.’ ”​—Aisea 41:13.

  • “Kua vakadua ni lomaocaocataka na siga nimataka.”​—Maciu 6:​34.

  • ‘Na ka kece me vakaraitaki vua na Kalou, ena qai taqomaka na lomamuni na vakacegu ni Kalou e uasivia na vakasama kece.’​—Filipai 4:​6, 7.

^ para. 28 Ke o dau vakasamataka mo vakamatei iko, kere veivuke sara vakatotolo vua e dua na uabula o nuitaka. Me ikuri ni ivakamacala raica na imatai ni va na ulutaga ena Yadra! ni Epereli 2014, “Kua ni Soro!