Raica sara na lewena

RA TAROGA NA ITABAGONE

E ka ni Lasa na Wede?

E ka ni Lasa na Wede?

 Na cava na wede?

Era nanuma eso ni wede e laurai ena ka o tukuna se cakava mo vakaraitaka kina ni o domona e dua. Ia, vakacava e cala ke o vakaraitaka ni o domona e dua? Sega. E kaya e dua na goneyalewa o Ann: “Ke o taleitaka tiko e dua qai vinakata mo drau veibuku, o na tekivu ga ena wede.”

Ena vakamacalataki ena ulutaga qo na ivukivuki ni wede e nanumi ni dodomo dina, ia e cala na kena inaki.

E kaya o Deanna: “E bibi na vakarorogo ke o via bucina e dua na veiwekani voleka kei na dua. Ia e duatani ke o vakamosia na yalona ni o raica tu ga vakamamada nomudrau veiwekani.”​.

 Na cava era wede kina eso?

Eso era wede mera dokadokai ira. E kaya kina e dua na goneyalewa o Hailey: “Nomu liaca ni o sa rawa ni wedeva e dua ena uqeti iko mo cakava tiko ga.”

Ke sega ni donu nomu inaki ni o domona e dua, o sa vakamosia tiko ga kina na lomana. Ia ke o nakita na ka o cakava mo dokadokai iko kina, e vinaka mo taroga na vuna o cakava kina qori. E tukuna na iVolatabu: “Na yalowai e marautaka na ka lialia.”​—Vosa Vakaibalebale 15:21.

E kaya kina o Hailey: “E rairai ka ni lasa na wede, ia e sega ni dau vinaka na kena itinitini.”

 Na cava e rerevaki kina?

  • Na wede ena vakacacana na kemu irogorogo.

    E kaya o Jeremy: “O koya e wede e sega ni nuitaki qai yalowai. O na vakila ni sega ni dau dina qai nanumi koya ga.

    E tukuni ena iVolatabu: “Na loloma. . . e sega ni kauaitaka ga na ka e baleti koya.”​—1 Koronica 13:​4, 5.

    Vakasamataka mada: Na mataqali ivakarau ni vosa kei na ivukivuki cava ena kilai kina ni o wede?

  • E vakamosi yalo na wede.

    E kaya o Jaqueline: “Ke’u sotava e dua na dau wede, au sega ni via maliwai koya. E rairai vosa ga vei au niu dua na yalewa. O ira na dau wede era sega ni kauaitaki au dina; ra nanumi ira ga.

    E tukuni ena iVolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.”​—1 Koronica 10:24.

    Vakasamataka mada: Vakacava ke cala nomu nanuma ni dua e domoni iko tiko? Ke vaka kina, e vakacava na ivakarau ni lomamu ni o kila ni cala nomu nanuma? Cava o na cakava ena ituvaki qori mo kua kina ni vakamosia na yalona e dua tale?

  • E seva na inaki ni nomu dodomo ni o wede.

    E kaya o Olivia: “O koya e dau wede e sega ni tamata mo drau veibuku se mo vakamautaka. Ena rawa vakacava niu kila se nuitaka e dua e sega ni vinaka na nona inaki ni veibuku?

    E kaya na daunisame o Tevita: “Au yawaki ira tale ga na vunitaka na kedra roka dina.”​—Same 26:4.

    Vakasamataka mada: Na mataqali tamata vakacava e taleitaka na dau wede? O na via veitokani kei ira na mataqali tamata va qori?