Raica sara na lewena

RA TAROGA NA ITABAGONE

Au na Vakavulica Vakacava Noqu Lewaeloma?

Au na Vakavulica Vakacava Noqu Lewaeloma?

O na vakatauvatana ina cava nomu lewaeloma?

  • kabasi

  • iloilo

  • itokani vinaka

  • turaganilewa

E donu kece na isaunitaro qori. Na ulutaga qo ena vakamacalataka na vuna.

 Cava na lewaeloma?

Oya nomu kila mai vu ni lomamu na ka e donu kei na ka e cala. E kaya na iVolatabu ni “vaka na lawa e volai e loma ni tamata.” (Roma 2:15, Contemporary English Version) Na lewaeloma vinaka ena vukei iko mo vakatulewataka na ka o na cakava, se na ka o sa cakava oti.

  • Nomu lewaeloma e vaka na kabasi. Ena dusimaki iko ena sala dodonu mo kua ni sotava kina na leqa.

  • Nomu lewaeloma e vaka na iloilo. E vakaraitaka nomu itovo, ivakarau ni lomamu, vakasama kei na nomu rai.

  • Nomu lewaeloma e vaka na itokani vinaka. Ena vakasalataki iko, ke o vakarorogo vua ena rawa vinaka tale ga nomu sasaga.

  • Nomu lewaeloma e vaka na turaganilewa. Ena beitaki iko ni o cakava na ka e cala.

Na lewaeloma vinaka ena vukei iko mo vakatulewa vakavuku.

Nanuma tiko: E bibi nomu lewaeloma ni na vukei iko mo (1) vakatulewa vakavuku qai (2) vakadodonutaka na cala o cakava.

 Vuna mo vakavulica kina nomu lewaeloma

E kaya na iVolatabu “me vinaka tiko ga na nomuni lewaeloma.” (1 Pita 3:16) Ena dredre mo cakava qori ke sega ni vakavulici nomu lewaeloma.

“Au na lasutaki rau noqu itubutubu, se sega sara ga ni tukuna vei rau na vanua au tiko kina. Ni se qai tekivu e vakaleqa noqu lewaeloma, ia toso na gauna vaka e sega tu ni dua na ka vei au.”—Jennifer.

Toso na gauna, e uqeti Jennifer nona lewaeloma me tukuna vei rau nona itubutubu na ka e yaco tiko, sa sega tale ga ni lasutaki rau.

Vakasamataka mada: Gauna cava e dodonu me vakasalataki Jeniffer kina nona lewaeloma?

“E dredre qai veivakaocai ni rua na ivakarau ni bula. Ni o vakalaiva nomu lewaeloma me vakatulewa cala, ena rawarawa mo cakava eso tale na vakatulewa cala.”—Matthew.

Eso e sega sara tu ga ni cakacaka nodra lewaeloma. E kaya na iVolatabu nira “sega tale ni qai kila na madua.” (Efeso 4:19) E tukuna na Good News Translation: “Ra sega mada ga ni kila vakalailai na madua.”

Vakasamataka mada: Vakacava ena rawa vinaka nodra sasaga o ira na sega ni kauaitaka na cala era cakava? Na leqa cava era na sotava?

Nanuma tiko: Me vinaka nomu lewaeloma, ena vinakati mo vakayagataka nomu “vakasama mo vakaduiduitaka na ka e donu mai na ka e cala.”—Iperiu 5:14.

 O na vakavulica vakacava nomu lewaeloma?

Ena vinakati mo muria e dua na ivakaraitaki mo rawa ni vakatauvatana kina na ka o cakava. Eso era muria nodra ivakaraitaki:

  • nodra vuvale kei na itovo vakavanua

  • nodra itokani

  • kei ira na kilai levu

Ia e cecere sara na ivakatagedegede era tu ena iVolatabu. E sega ni kurabuitaki qori ni iVolatabu e “vakavuna na Kalou,” o koya e buli keda, e kila tale ga na ka e yaga vei keda.—2 Timoci 3:16.

Dikeva mada eso na kena ivakaraitaki.

IVAKATAGEDEGEDE: “Keitou vinakata me keitou dina ena ka kece.”—Iperiu 13:18.

  • Ena vukea vakacava nomu lewaeloma na ivakatagedegede qori ni o temaki mo lasu ena veitarogi, lawakitaki rau nomu itubutubu, se butako?

  • Ke uqeti iko nomu lewaeloma mo dina ena ka kece, ena yaga vakacava vei iko ena gauna qo kei na gauna se bera mai?

IVAKATAGEDEGEDE: “Dro tani mai na veiyacovi tawadodonu.”—1 Korinica 6:18.

  •  Ena vukea vakacava nomu lewaeloma na ivakatagedegede qori ni o temaki mo raica na iyaloyalo vakasisila, se veiyacovi ni bera na vakamau?

  • Ke uqeti iko nomu lewaeloma mo dro tani mai na veiyacovi tawadodonu, ena yaga vakacava vei iko ena gauna qo kei na gauna se bera mai?

IVAKATAGEDEGEDE: “Moni veilomani, ni veinanumi, ni yalorawarawa moni veivosoti.”—Efeso 4:32.

  •  Ena vukei iko vakacava na ivakatagedegede qori ke basika na duidui vei ratou na tacimu se nomu itokani?

  • Ke uqeti iko nomu lewaeloma mo veivosoti qai veinanumi, ena yaga vakacava vei iko ena gauna qo kei na gauna se bera mai?

IVAKATAGEDEGEDE: “O Jiova . . . e cati ira kece na taleitaka na itovo kaukaua.”—Same 11:5.

  •  Ena vukei iko vakacava na ivakatagedegede qori ni o digia na iyaloyalo se tivi mo sarava, kei na qito ena vidio?

  • Ke uqeti iko nomu lewaeloma mo cata na iyaloyalo voravora, ena yaga vakacava qori vei iko ena gauna qo, kei na gauna se gauna se bera mai?

ITALANOA DINA: “Au dau tomani ira noqu itokani era dau qito voravora ena vidio. E qai kaya vei au o ta meu kua ni qitora tale. Ia niu golevi ira noqu itokani au na qito tale ena vidio. Niu yaco mai vale, au na sega vakadua ni tukuna e dua na ka. Ena tarogi au o ta, ia au na tukuna ga ni vinaka tu na ka kece. Dua na siga au wilika na Same 11:5, e ca sara ga na lomaqu ena ka au cakava tiko. Au mani vakadeitaka meu muduka noqu qito ena vidio. Gauna qo, au sa sega tale ni qito. Ni raica e dua noqu itokani na ka au cakava, e uqeti koya talega me muduka na qito qori.”—Jeremy.

Vakasamataka mada: Gauna cava sa qai uqeti Jeremy kina nona lewaeloma, qai muria ena gauna cava? Cava o vulica ena italanoa i Jeremy?

Nanuma tiko: Nomu lewaeloma e vakavotuya na ivakarau ni nomu vakasama, lomamu kei na nomu rai. Cava e kaya na lomamu me baleti iko?