Raica sara na lewena

RA TAROGA NA ITABAGONE

Vakacava ke ra Talanoataki au Eso?

Vakacava ke ra Talanoataki au Eso?

 Vuna e ca kina

Eso na veitalanoa e ca, oya me tukuni na ka lasutaki me vakacacani kina na kemu irogorogo. Ke sega mada ga ni veivakaleqai na veika e tukuni, ena rawa ga ni mositi iko ni kaseti iko e dua drau dau veivolekati!​—Same 55:12-14.

“Au rogoca ni dua noqu itokani e kaseti au, e kaya niu sega ni dau veikauaitaki. E mositi au sara ga! Au sega ni kila se cava e kaya kina qori.”​—Ashley.

Ka dina: Ke drau veitokani voleka kei koya e talanoataki iko se sega, eda rarawa nira kaseti keda eso.

 iTukutuku ca, e dredre mo tarova

E tiko eso na vuna era talanoataki keda kina eso, raica mada qo:

Eda dau kauai. Eda dau taleitaka meda veimaliwai. Koya gona e dau kena ivakarau ga meda veitalanoa se da talanoataka e dua. E uqeti keda na iVolatabu meda “kauaitaka” tale ga na ka e baleti ira eso.​Filipai 2:4.

E dau kamikamica sara ga meda talanoataki ira eso tale!”​—Bianca.

“Meu kaya vakadodonu, au dau taleitaka meu kila na ka e cakava tiko e dua, au qai veitalanoataka. Au sega ni kila na vuna, au taleitaka ga.”​—Katie.

Vucesa. Ena gauna vakaivolatabu, eso e dau ‘nodra ivakarau mera vakamacalataka se rogoca eso na ka vou.’ (Cakacaka 17:21) E dina tale ga qori nikua!

“So na gauna ni sega na italanoa, e levu era bulia ga na nodra italanoa.”​—Joanna.

Yalolailai. Sa rauta me vakasalataki keda na iVolatabu meda kua ni vakatauvatani keda kei na so tale. (Kalatia 6:4) Ka ni rarawa nira dau kakase eso me seavu kina na nodra yalolailai.

“Na ka e cakava na daukakase ena tukuni koya ga. E vuvutaki koya e kaseta tiko. E talanoataka na veika lasutaki me baleta e dua me lomavinaka kina. E nanuma kina ni vinaka o koya.”​—Phil.

Ka dina: O taleitaka se sega, e dau noda ivakarau ga meda talanoataka eso tale, wili kina o iko.

 iTukutuku vinaka, me kua ni rawai iko

De dua ena dredre mo tarova na ka kece e talanoataki me baleti iko, ia o na rawa ni digia na ka mo cakava. Ke o kila nira talanoataki iko tiko e levu, e rua na ka mo cakava.

KENA IMATAI: Kua ni kauaitaka. Ena levu na gauna, na kena iwali vinaka ga mo kua ni kauaitaka, oya ke sega ni yaga na ka e tukuni. Muria na ivakasala vakaivolatabu qo: “Mo kua ni cudru totolo.”​—Dauvunau 7:9.

“Era veitalanoataka eso niu veivosaki tiko kei na dua na cauravou, keirau se sega mada ga ni sota! Au dredre sara ga niu rogoca na itukutuku qori, au sega ni kauaitaka.”​—Elise.

“Nomu iyaragi vinaka duadua ni vinaka na kemu irogorogo. Ke dua na italanoa ca e tukuni me baleti iko, era na sega ni vakabauta e levu baleta ni vinaka tiko na kemu irogorogo. Na ka dina me baleti iko e yaga sara.”​—Allison.

iVukevuke: Vola (1) na ka e tukuni me baleti iko kei na (2) e vakacava na ivakarau ni lomamu ni o rogoca. Ni ‘tu lo ga e lomamu na ka o via tukuna,’ ena rawarawa mo guilecava.​—Same 4:4.

KENA IKARUA: Lai vosa vua e kaseti iko. Ena so na ituvaki, e ca sara ga na ka e tukuni, o nanuma kina mo lai raici koya e kaseti iko.

“Ke o lai raici koya e tekivuna na kakase, ena kila kina ni ka e tukuna ena lai rogoca o koya e kaseti. Rawa tale ga ni drau veivakameautaki se veivosakitaka na leqa e yaco.”​—Elise.

Ni bera ni o lai raici koya e kaseti iko, vakasamataka mada eso na ivakavuvuli vakaivolatabu qo qai tarogi iko ena taro qori.

  • “O koya e tukuna na ka ni bera ni rogoca, e lialia.” (Vosa Vakaibalebale 18:13) ‘Vakacava e dina na itukutuku qo? E dina na veika e tukuni vei au, se tauri cala?’

  • “Me totolo ni vakarorogo na tamata yadua, me berabera ni vosa, me berabera ni cudru.” (Jemesa 1:19) ‘E gauna vinaka qo meu lai raici koya e kaseti au? E donu na inaki ni noqu via lai raici koya? Se vinaka meu lai raici koya ena dua tale na gauna ni sa oti na noqu cudru?’

  • “Na ka kece dou vinakata mera cakava vei kemudou na tamata, dou cakava tale ga vei ira.” (Maciu 7:12) ‘Keu tu ena kena ituvaki, na cava au vinakata me caka? Na vanua cava au na vinakata me keirau veitalanoataka kina na leqa qo? Na vosa kei na itovo cava e yaga ena ituvaki qo?’

iVukevuke: Vola rawa na veika o nanuma mo kaya, ni bera ni o lai raici koya e kaseti iko. Waraka me oti e dua se rua na macawa, wilika tale na veika o sa vola qai raica ke o via veisautaka eso na ka. Veivosakitaka tale ga kei rau na nomu itubutubu se dua nomu itokani matua na ka o navuca, qai kerea nodratou ivakasala.

Ka dina: Levu na ka ena noda bula eda sega ni lewa rawa, e vakatale ga kina na kakase. Ia sega ni kena ibalebale me lewai iko!