Raica sara na lewena

RA TAROGA NA ITABAGONE

Au na Vorata Vakacava na Veitemaki ni Veiyacovi?

Au na Vorata Vakacava na Veitemaki ni Veiyacovi?

“Niu tiko e koronivuli, ke dua e kaya ni sa veiyacovi era na nanuma na vo ni gonevuli ni dodonu mera cakava tale ga qori. Mera taleitaki kina vei ira nodra itokani.”—Elaine, yabaki 21.

O bau temaki mo veiyacovi nira cakava tiko qori eso tale?

E vakasaurarataki iko e dua o domona mo drau veiyacovi?

Ke vaka kina, ena vukei iko na ulutaga qo mo vorata na nodra veitemaki eso tale kei na nomu gagadre mo rawa ni vakatulewa kina vakavinaka.

 iTalanoa buli kei na kena dina

ITALANOA BULI: Era sa veiyacovi kece (vaka vo ga o au).

KENA DINA: Ena dua na vakadidike, e laurai ni vica ga na itabagone era yabaki 18 era kaya nira sa veiyacovi, ia e dua na iwiliwili levu vei ira qori era se sega ni veiyacovi. Kena ibalebale, sega ni o ira “kece” na itabagone era sa veiyacovi.

ITALANOA BULI: Ena vinaka nomudrau veimaliwai ni drau veiyacovi.

KENA DINA: Era rairai nanuma eso na cauravou ni vinaka qori me rawa nira vakasaurarataki ira kina na goneyalewa mera veiyacovi. Ia e sega ni dina qori, ena biuti yalewa o tagane ni oti ga nodrau veiyacovi. Ena vakavuna me rarawa vakalevu o yalewa ni nanuma na domoni koya tiko ga o tagane. *

ITALANOA BULI: E kaya na iVolatabu ni cala na veiyacovi.

KENA DINA: E veiuqeti na iVolatabu ena rai donu me baleta na veiyacovi. Ia e kaya ni dodonu me rau veiyacovi ga na tagane kei na yalewa rau veiwatini.—Vakatekivu 1:28; 1 Korinica 7:3.

ITALANOA BULI: Au na rarawa vakalevu niu muria na ivakavuvuli vakaivolatabu.

KENA DINA: O na marau ke o veiyacovi ga ni o vakamau. O na sega kina ni lomaleqa, sega ni veivutunitaka e dua na ka, o na taqomaki tale ga. Qori na ka o na sega ni vakila ke o veiyacovi ni bera na vakamau.

Nanuma tiko: O na sega ni rarawa ke o waraka mo veiyacovi ga ena gauna ni vakamau. Ia o na sotava na leqa ni o veiyacovi ni bera na vakamau.

 Sala mo vorata kina na veivakasaurarataki ni veiyacovi

  • Dei ena ka e dodonu. E kaya na iVolatabu o ira na yalomatua “era vakayagataka nodra vakasama e vakavulici me vakaduiduitaka na ka e donu mai na ka e cala.” (Iperiu 5:14) Ni o dei ena ka e dodonu ena dredre mo temaki.

    “Au dau saga vagumatua meu cakava na ka e dodonu, me vinaka tale ga na kequ irogorogo. Au na sega tale ga ni tu ena dua na vanua ena rawarawa kina meu temaki.”—Alicia, yabaki 16.

    Vakasamataka mada: O vinakata me vakacava na kemu irogorogo? E vinaka ke vakadonui iko e dua tale ena kemu irogorogo?

  • Vakasamataka na kena ca. E kaya na iVolatabu: “Na ka kece e kaburaka e dua, ena tamusuka tale ga.” (Kalatia 6:7) Vakasamataka mada, ena tara vakacava nomudrau bula ena veigauna se bera mai ke drau temaki mo drau veiyacovi? *

    “Na veiyacovi ni bera na vakamau e rawa ni vakavuna na yalolailai, rarawa, o sega tale ga ni lomani. Rawa ni vakavuna tale ga na bukete e sala, kei na mate ca ni veiyacovi.”—Sienna, yabaki 16.

    Vakasamataka mada: E kaya na ivola Sex Smart: “Ke ra vakasaurarataki iko nomu itokani mo cakava na ka ena vakaleqai iko, vakacava qori na itokani e dodonu mo veimaliwai kei ira se rogoca nodra ivakasala?”

  • Rai donu. E sega ni ca na veiyacovi. Ia e kaya na iVolatabu ni dodonu mera marautaka ga na veiwatini ena nodra bula kece.—Vosa Vakaibalebale 5:18, 19.

    “Dua na isolisoli totoka na veiyacovi. E vinakata gona na Kalou me marautaki, ia me muri na kena ituvatuva e vakarautaka o koyaoya me qai caka ena gauna ni vakamau.”—Jeremy, yabaki 17.

    Vakasamataka mada: Ke mani yaco na gauna mo vakawati, o na rawa ni qai veiyacovi kei watimu. O na marautaka vakalevu, o na sega tale ga ni sotava kina na leqa sa cavuti oti mai.

^ para. 8 Sega ni o ira kece na cauravou era dau veivakasaurarataki ena veiyacovi. E levu na vanua, era veivakasaurarataki sara ga na yalewa vei ira na tagane mera veiyacovi.

^ para. 17 E rawa ni sotavi kina e levu na leqa, wili kina na bukete e sala. Ena vakatau ena nomudrau dui yabaki ni bula, e rawa ni okati tale ga me cala vakalawa na ivalavala ni veiyacovi kei ira na gone.