Raica sara na lewena

Na Website ni iVakadinadina i Jiova

Digia na Vosa vakaViti

RA TAROGA NA ITABAGONE

Au na Vorata Vakacava na Veitemaki?

Au na Vorata Vakacava na Veitemaki?

E vola na yapositolo o Paula: “Niu via cakava na ka e dodonu, e tiko ga vei au na ca.” (Roma 7:​21) Vakacava o dau vakila tale ga qori? Ena vukei iko na ulutaga qo mo vorata na veitemaki mo cakava kina na ka ca.

 Ka mo kila

Na veimurimuri e dau tini ga ena veitemaki. E kaya mada ga na iVolatabu ni “ilala ca e vakacacana na itovo vinaka.” (1 Korinica 15:33) Nodra veivakamuai eso tale, se na tabana ni itukutuku ena uqeti iko mo coko ena ituvaki e rawarawa sara kina mo temaki. Ena rawa tale ga ni vakavuna mo “muri ira na ilala levu mo caka ca kina.”​—Lako Yani 23:2.

“Nomu vinakata mo taleitaki se mo vakailala, o na cakava kina na ka era cakava tiko na kena vo, mo rawa ni nodra itokani tiko ga kina.”​—Jeremy.

Mo nanuma tiko qo: Ena dredre mo vorata na veitemaki, ke o kauaitaka vakasivia na nodra nanuma eso tale.​—Vosa Vakaibalebale 29:25.

Nanuma tiko: Kua ni vakalaiva nodra veivakamuai nomu icaba mera temaki iko mo beca na ivakatagedegede o tuberi kina.

 Ka mo cakava

Kila na ka o vakabauta. Ke o sega ni kila na ka o vakabauta, o na vaka ga na matakau veikauyaki, nira na lewai iko eso tale. E vinaka mo muria na ivakasala vakaivolatabu: “Ni vakadeitaka na dina ni ka kece, ni taura matua na ka vinaka.” (1 Cesalonaika 5:​21) Na levu ga ni nomu kila na ka o vakabauta, o na taura matua kina na veika o vulica. O na vorata tale ga na veika e veisaqasaqa kei na ka o vakabauta.

Vakasamataka qo: Cava mada o vakabauta kina ni na yaga vei iko na ivakatagedegede savasava i Jiova?

“Era dau dokai au sara ga e levu niu dei ena ka au vakabauta, qai sega ni rawai ena veitemaki.”​—Kimberly.

iVakaraitaki vinaka vakaivolatabu: Taniela. E se rairai itabagone o Taniela, sa “nakita e lomana” me talairawarawa ina lawa ni Kalou.​—Taniela 1:8.

Ke o sega ni kila na ka o vakabauta, o na vaka ga na matakau veikauyaki, nira na lewai iko eso tale

Kila nomu malumalumu. E cavuti ena iVolatabu na “gagadre vakaitabagone,” qai dau kaukaua qori ni o se gone. (2 Timoci 2:​22) E okati kina na gagadre ni veiyacovi, na veimurimuri kei na nomu via lewa iko ga.

Mo nanuma tiko: E kaya na iVolatabu ni “vakatovolei e dua ni bacani koya qai siwati koya na nona gagadre ca.” (Jemesa 1:​14) Na gagadre cava o dau temaki kina vakalevu?

“Tukuna vakadodonu na veitemaki o dau rawai kina. Vakekeli ena ka mo cakava mo vorata kina na veitemaki qori, vakavola tale ga na tikina mo cakacaka kina. Na gauna o na temaki tale kina, o sa kila na ka mo cakava.”​—Sylvia .

iVakaraitaki vinaka vakaivolatabu: Tevita. E dau rawai ena so na gauna ena nodra veivakamuai eso tale, se na nona gagadre mada ga. Ia e vuli mai na nona cala o Tevita, qai saga me vakavinakataka. E masuti Jiova: “Ni bulia na lomaqu me savasava, kemuni na Kalou, qai biuta e lomaqu e dua na yalo vou, na kena e tudei.”​—Same 51:10.

Lewa matau. E kaya na iVolatabu: “Me kua ni rawai iko na ca, mo rawa tiko ga na ca ena vinaka.” (Roma 12:21) Kena ibalebale ena sega ni vinakati mo rawai ena veitemaki. O na rawa ni digia mo cakava na ka e donu.

Vakasamataka mada qo: Ni o temaki, na cava o na cakava me kua ni tini ina leqa?

“Au dau vakasamataka na ituvaki ni noqu bula keu rawai ena veika au temaki kina. Au na lomavakacegu kina? De dua ena lekaleka ga. Vakacava ni oti na gauna qori, au na lomavakacegu tiko ga? Sega, au na vakila na rarawa. E sega sara ga ni dua na kena yaga!”​—Sophia .

iVakaraitaki vinaka vakaivolatabu: Paula. A vakatusa ni dau cala nona rai, ia e lewa vinaka na ka me cakava. E vola: “Au vakamalumalumutaka na yagoqu, au qai vakabobulataka.”​—1 Korinica 9:​27, ivakamacala e ra.

Nanuma tiko: O iko sara ga o na vakatulewa ena kena vorati na veitemaki.

O na sega ni temaki tu ga me tawamudu. E kaya o Melissa, e yabaki 20: “Na veitemaki lelevu e vakilai ena gauna ni vuli, sa sega soti ni kilai vakalevu nikua. Niu vakasamataka na tikina qori, e vakanuideitaki ni veitemaki ena gauna qo ena totolo ga na kena oti. Dua na gauna niu railesu, au rawa ni kaya ni yaga dina noqu vorata rawa na veitemaki kece qori.”