Surat kan Tito 1:1-16

  • Pangumusta (1-4)

  • Hi Tito magpipili hin mga tigurang (5-9)

  • Sawaya an mga rebelyoso (10-16)

1  Tikang kan Pablo nga uripon han Dios ngan apostol ni Jesu-Kristo uyon ha pagtoo han mga pinili han Dios ngan ha husto nga kahibaro han kamatuoran, nga uyon ha debosyon ha Dios  ngan iginbasar ha paglaom nga kinabuhi nga waray kataposan+ nga maiha na nga iginsaad han Dios nga diri makakagbuwa;+  kondi ha iya itinanda nga panahon, iginpahibaro niya an iya pulong pinaagi han pagsangyaw nga igintapod ha akon+ uyon ha sugo han aton Paratalwas, an Dios;  para kan Tito, nga tinuod nga anak nga kapariho namon hin pagtoo: Makarawat mo unta an diri matupngan nga pagkabuotan ngan kamurayawan tikang ha Dios nga Amay ngan kan Kristo Jesus nga aton Paratalwas.  Ginbilin ko ikaw ha Creta basi tadungon mo an mga butang nga may depekto* ngan magpili hin mga tigurang ha tagsa nga syudad, sugad han akon instruksyon ha imo:  kon may bisan hin-o nga lalaki nga waray igin-aakusar ha iya, bana hin usa la nga babaye, an mga anak tumuroo ngan diri gin-aakusaran nga nagkikinabuhi hin maraot* o rebelyoso.+  Kay sugad nga tinaporan han Dios, an usa nga paramangno kinahanglan waray igin-aakusar ha iya, diri nag-iinsister han iya karuyag,+ diri madagmit masina,+ diri parahubog, diri bayolente,* diri hakog nga namimiling hin mga paagi basi makabentaha,  lugod maabiabihon,+ mahigugmaon ha kaopayan, maopay an panhunahuna,*+ matadong, maunungon,+ may pagpugong ha kalugaringon,+  nakapot hin marig-on ha masasarigan nga pulong* may kalabotan ha iya arte ha pagtutdo,+ basi may kapas hiya ha pag-aghat* pinaagi han maopay* nga katutdoan+ ngan ha pagsaway+ ha mga nakontra. 10  Kay damu nga tawo an rebelyoso, paraistorya hin waray pulos, ngan paralimbong, labi na an mga nasuporta ha pagturi.+ 11  Kinahanglan itik-om an ira mga baba, kay padayon nga ginbubungkag hini mismo nga mga tawo an bug-os nga mga panimalay pinaagi ha pagtutdo hin mga butang nga diri nira angay igtutdo basi la makabentaha ha diri tangkod nga paagi. 12  An usa ha ira, nga ira mismo propeta, nagsiring: “An mga taga-Creta mga buwaon, magpintas nga ihalas nga mga hayop, mga hubya ngan malamon.” 13  Tinuod ini nga pamatuod. Tungod hini mismo nga hinungdan, padayon nga sawaya hira hin istrikto, basi magin mahimsog hira ha pagtoo, 14  nga diri naghahatag hin atensyon ha mga susmatanon han mga Judio ngan mga sugo han mga tawo nga nagsasalikway han kamatuoran. 15  An ngatanan nga butang malimpyo ha limpyo nga mga tawo;+ pero ha mga tawo nga mahugaw ngan waray pagtoo waray butang nga limpyo, kay an ira hunahuna ngan an ira konsensya mahugaw.+ 16  Iginpapasamwak nira ha publiko nga nakilala hira ha Dios, pero iginsasalikway nira hiya pinaagi han ira mga buhat,+ kay mangil-ad hira ngan diri masinugtanon ngan diri kwalipikado ha bisan ano nga klase han maopay nga buhat.

Mga footnote

O “may kulang.”
O “nga sutil.”
O “nangangastigo.”
O “may maopay nga pagturotimbang.”
O “ha masasarigan nga mensahe.”
O “pagsagdon.”
O “makapahimsog; mapulsanon.”