Mga Pagtangis 5:1-22
5 O Jehova, hinumdumi an nahitabo ha amon.
Tan-awa ngan kitaa an amon kaalohan.+
2 An amon panurundon igintubyan ha mga estranghero, an amon mga balay igintubyan ha mga taga-iba nga nasud.+
3 Nagin mga ilo kami nga waray tatay; an amon mga nanay pariho hin mga balo.+
4 Kinahanglan magbayad kami basi makainom han amon kalugaringon nga tubig,+ ngan kinahanglan paliton namon an amon kalugaringon nga sungo.
5 Hiaabtan na kami han mga naglalanat ha amon;Kinakapoy na kami, pero diri kami ginpapapahuway.+
6 Igin-uunat namon an amon kamot ngadto ha Ehipto+ ngan ha Asirya,+ basi makakuha hin igo nga tinapay nga makakaon.
7 Waray na an amon mga kaapoy-apoyan nga nakasala, pero kinahanglan namon antuson an ira mga sayop.
8 Mga surugoon an nagmamando ha amon yana; waray nakakaagaw ha amon tikang ha ira kamot.
9 Gindadara namon an amon tinapay bisan kon mameligro an amon kinabuhi,*+ tungod han espada ha kamingawan.
10 An amon panit nagin sugad kapaso hin hudno, kay ginugutom gud kami.+
11 Ira ginpakaalohan* an mga asawa ha Zion, an mga birhen ha mga syudad han Juda.+
12 An mga prinsipe ginbitay pinaagi ha ira kamot,+ ngan an mga tigurang waray respetoha.+
13 An batan-on nga mga lalaki nagdadara han de-mano nga gilingan, ngan an mga bata nga lalaki nahipapakdol tungod han pagpas-an hin mabug-at nga sungo.
14 An mga tigurang waray na ha ganghaan han syudad;+ an batan-on nga mga lalaki diri na nagtutokar han ira musika.+
15 An kalipay nawara na ha amon kasingkasing; an amon pagsayaw nasaliwnan hin kabido.+
16 An korona nahulog tikang ha amon ulo. Kairo namon, kay nakasala kami!
17 Tungod hini an amon kasingkasing nasasakit,+Ngan tungod hini nga mga butang an amon mga mata nagsirom,+
18 Tungod han Bukid Zion, nga nagin binayaan;+ an mga sora* naglalakat-lakat na yana dida hito.
19 Mahitungod ha imo, O Jehova, nalingkod ka ha trono ha kadayonan.
An imo trono magpapadayon ha ngatanan nga henerasyon.+
20 Kay ano nga ginkakalimtan mo kami ha kadayonan ngan ginbayaan kami hin maiha gud nga panahon?+
21 Ibalik kami ngada ha imo, O Jehova, ngan magigin andam kami pagbalik ha imo.+
Himoa an amon mga adlaw nga magin pariho han naglabay.+
22 Pero iginsalikway mo gud kami.
Padayon ka nga nasisina gud ha amon.+
